Xavi ក្តៅស្លឹកត្រចៀកចំពោះការសម្រេចចិត្តអាជ្ញាកណ្តាល ក្រោយចាញ់ Inter យប់មិញ
អ៊ីតាលី ៖ លោក Xavi គ្រូបង្វឹកក្រុម Barcelona បានស្នើអាជ្ញាកណ្តាលត្រូវតែពន្យល់ពីការសម្រេចចិត្ត
អ៊ីតាលី ៖ លោក Xavi គ្រូបង្វឹកក្រុម Barcelona បានស្នើអាជ្ញាកណ្តាលត្រូវតែពន្យល់ពីការសម្រេចចិត្ត
អ៊ីតាលី ៖ លោក Xavi គ្រូបង្វឹកក្រុម Barcelona បានស្នើអាជ្ញាកណ្តាលត្រូវតែពន្យល់ពីការសម្រេចចិត្តរបស់ពួកគេ ក្រោយក្រុមរបស់ខ្លួនចាញ់ក្រុមម្ចាស់ផ្ទះ Inter Milan ដោយលទ្ធផល ១ទលនឹង០ ការប្រកួតវគ្គសន្សំពិន្ទុក្នុងពូលពានរង្វាន់ UEFA Champions League នៅឯកីឡដ្ឋាន San Siro កាលពីយប់មិញ។
លោក Slavko Vincic ជនជាតិស្លូវ៉ាគីអាជ្ញាកណ្តាលកាត់សេចក្តីនៅក្នុងការប្រកួតនេះ បានសម្រេចបដិសេធគ្រាប់បាល់បញ្ចូលទីរបស់ Barca ដែលស៊ុតដោយខ្សែបម្រើ Pedri ដោយសារតែបាល់ប៉ះដៃមិត្តរួមក្រុមរបស់គេគឺខ្សែប្រយុទ្ធ Ansu Fati មុនការស៊ុតបញ្ចូលទី ក្រោយអាជ្ញាកណ្តាលបានពិនិត្យវីដេអូជំនួយ (VAR) នៅលើទីលាន ដោយមិនស្នើជំនួយទៅកាន់អ្នកត្រួតពិនិត្យនៅក្នុងបន្ទប់ឡើយ។ ខណៈដែលខ្សែការពារ Eric Garcia អះអាងថា បាល់ប៉ះដៃ Fati មិនគួរត្រូវពិន័យឡើយ ដោយសារខ្ទាតពីដៃអ្នកចាំទី Andre Onana ដែលគូប្រជែង។
រឿងនឹកស្មានមិនដល់មួយទៀតក៏បានកើតឡើង បន្ទាប់ពីខ្សែការពារ Denzel Dumfries របស់ក្រុមម្ចាស់ផ្ទះបង្កកំហុសដៃប៉ះបាល់នៅក្នុងប្រអប់គ្រោះថ្នាក់ ប៉ុន្តែត្រូវបានអាជ្ញាកណ្តាលបដិសេធ និងមិនត្រួតពិនិត្យប្រព័ន្ធ VAR ឡើយ។
ក្រោយបញ្ចប់ការប្រកួតនេះ លោក Xavi បាននិយាយថា «នេះជារឿងអយុត្តិធម៌ ហើយយើងមិនអាចបកក្រោយបានឡើយ។ អាជ្ញាកណ្តាលគួរតែត្រូវផ្តល់ការពន្យល់។ ច្បាស់ណាស់វាជាបាល់ប៉ះដៃ ខ្ញុំពិតជាខឹងណាស់»។
Barca កំពុងស្ថិតនៅចំណាត់ថ្នាក់លេខ៣ ក្នុងពូលC ខណៈនៅ៣ប្រកួតទៀតដែលត្រូវលេងក្នុងវគ្គសន្សំពិន្ទុ។ Xavi អាយុ៤២ឆ្នាំបានបន្ថែមចុងក្រោយថា «ឥឡូវនេះ យើងមានការប្រកួតចុងក្រោយចំនួន៣ យើងស្ថិតក្នុងស្ថានភាពមិនងាយស្រួលទេ។ Inter មាន ៦ពិន្ទុ យើងមាន ៣ពិន្ទុ ហើយ Bayern មាន ៩ពិន្ទុ»៕ (ដកស្រង់ចេញពី Daily Mail)
ចែករំលែកព័តមាននេះ