បវរស្ត្រីតំបន់គ្រីមៀឆ្នាំ២០២២ រងការពិន័យពីអាជ្ញាធររុស្ស៊ី ក្រោយបង្កកំហុសមួយ
តំបន់គ្រីមៀ ៖ អាជ្ញាធររុស្ស៊ីប្រចាំតំបន់គ្រីមៀ (Crimea) ដែលទីក្រុងមូស្គូបានដាក់បញ្ចូលពីអ៊ុយក្រែន
តំបន់គ្រីមៀ ៖ អាជ្ញាធររុស្ស៊ីប្រចាំតំបន់គ្រីមៀ (Crimea) ដែលទីក្រុងមូស្គូបានដាក់បញ្ចូលពីអ៊ុយក្រែនក្នុងឆ្នាំ ២០១៤ ត្រូវបានចាប់ខ្លួន និងផាកពិន័យលើបវរស្ត្រីតំបន់គ្រីមៀម្នាក់ ដោយចោទប្រកាន់ពីបទច្រៀងចម្រៀងរបស់អ៊ុយក្រែន។
នាង Olga Valeyeva ត្រូវបានអាជ្ញាធរចោទប្រកាន់ពីបទបង្ខូចកិត្តិយសយោធារបស់រុស្ស៊ី និងលើកកម្ពស់និមិត្តសញ្ញាពួកជ្រុលនិយម បន្ទាប់ពីវីដេអូមួយបង្ហាញពីការច្រៀងចម្រៀង «Red Viburnum» ដ៏ល្បីល្បាញ ដែលជាចម្រៀងស្នេហាជាតិរបស់ប្រជាជាតិអ៊ុយក្រែន។
Valeyeva ត្រូវបានផាកពិន័យជាប្រាក់ចំនួន ៤ម៉ឺនរូបិ៍ល ដែលនឹងប្រមាណ ៦៨៤ដុល្លារអាមេរិក។ ខណៈដែលស្ត្រីម្នាក់ទៀត (មិត្តភក្តិ) ដែលច្រៀងបទចម្រៀងជាមួយ Valeyeva ត្រូវបានដាក់ពន្ធនាគាររយៈពេល១០ថ្ងៃ។ ជាមួយគ្នានោះ ក្រសួងមហាផ្ទៃដែលដំឡើងដោយរុស្ស៊ីនៅតំបន់គ្រីមៀ បានបង្ហោះវីដេអូបង្ហាញពី Valeyeva និងមិត្តភក្តិរបស់នាងធ្វើការសុំទោសជាសាធារណៈចំពោះការច្រៀងបទនេះ។
Valeyeva ត្រូវបានគេដកស្រង់សម្តីដោយប្រព័ន្ធផ្សព្វផ្សាយរុស្ស៊ីថា «ខ្ញុំគ្រាន់តែច្រៀងចម្រៀងអ៊ុយក្រែនតែប៉ុណ្ណោះ ដោយមិនមានអត្ថន័យស៊ីជម្រៅនោះទេ»។
Valeyeva អាយុ៣៤ឆ្នាំ បានឈ្នះការប្រកួតបវរស្ត្រី «Mrs Beauty Queen – Crimea ប្រចាំឆ្នាំ ២០២២» ដែលប្រារព្ធឡើងនៅទីក្រុង Sevastopol កាលពីចុងខែឧសភាកន្លងទៅ។
គួរបញ្ជាក់ថា បទ «Red Viburnum» ត្រូវបានផ្សារភ្ជាប់ជាមួយការស្នេហាជាតិរបស់អ្នកជាតិនិយមអ៊ុយក្រែន។ ហើយផ្នែកនៃបទនេះ ត្រូវបានដាក់បញ្ចូលក្នុងចម្រៀងរបស់ក្រុមតន្ត្រីរ៉ុកជើងចាស់អង់គ្លេស «Pink Floyd» កាលពីដើមឆ្នាំនេះ ដើម្បីបង្ហាញការគាំទ្រសម្រាប់ប្រជាជនអ៊ុយក្រែនប្រឆាំងនឹងការឈ្លានពានរបស់រុស្ស៊ី។
រដ្ឋាភិបាលអ៊ុយក្រែន ដែលកងទ័ពរបស់ខ្លួនបាននិងកំពុងវាយបកប្រឆាំងនឹងកងកម្លាំងឈ្លានពានរបស់រុស្ស៊ី បានប្តេជ្ញាចិត្តដណ្តើមយកទឹកដីដែលបាត់បង់ទាំងអស់របស់ខ្លួនត្រឡប់មកវិញ ក្នុងនោះរួមទាំងតំបន់គ្រីមៀផងដែរ៕ (ប្រភពពី BBC)
ចែករំលែកព័តមាននេះ