ខេត្តបន្ទាយមានជ័យ ៖ ខេត្តបន្ទាយមានជ័យ មានប្រជាពលរដ្ឋរងគ្រោះដោយត្រូវពស់ចឹកមានចំនួនសរុប៣៩៥នាក់ តែគ្មានអ្នករងគ្រោះដល់អាយុជីវិតទេ ក្នុងអំឡុងពេលគ្រោះទឹកជំនន់កំពុងជន់លិច គិតត្រឹមថ្ងៃទី០៤ តុលា ឆ្នាំ២០២២ ។…
ខេត្តបន្ទាយមានជ័យ ៖ ខេត្តបន្ទាយមានជ័យ មានប្រជាពលរដ្ឋរងគ្រោះដោយត្រូវពស់ចឹកមានចំនួនសរុប៣៩៥នាក់ តែគ្មានអ្នករងគ្រោះដល់អាយុជីវិតទេ ក្នុងអំឡុងពេលគ្រោះទឹកជំនន់កំពុងជន់លិច គិតត្រឹមថ្ងៃទី០៤ តុលា ឆ្នាំ២០២២ ។
លោកវេជ្ជបណ្ឌិត ឡេ ចាន់សង្វាត ប្រធានមន្ទីសុខាភិបាលខេត្តបន្ទាយមានជ័យបានប្រាប់ថា នៅក្នុងខេត្តបន្ទាយមានជ័យ ប្រជាពលរដ្ឋបានរងគ្រោះដោយសារពស់ចឹកមានចំនួន៣៩៥នាក់ (ស្រី១០៥នាក់) តែសំណាងដែរ ដែលគ្មានរងគ្រោះដល់ជីវិត ព្រោះបានជួយសង្គ្រោះទាន់ពេលនៅតាមមន្ទីពេទ្យខេត្ត និងមន្ទីពេទ្យបង្អែក និងតាមបណ្តាស្រុក/ក្រុងទាំង៩ ។ នេះបើគិតចាប់ខែមករា ដល់ខែកញ្ញា ឆ្នាំ២០២២ ភាគច្រើនរងគ្រោះនៅអំឡុងទឹកជំនន់ជន់លិចក្នុងខេត្តបន្ទាយមានជ័យ មានរយៈពេលជិត១ខែ ។
លោកបានបញ្ជាក់ទៀតថា ប្រជាពលរដ្ឋដែលរងគ្រោះដោយសារពស់ចឹកមានចំនួន៣៩៥ ត្រូវពស់ស្រការចាស់, ពស់ពព្លាក់, ពស់ខៀវ, ពស់ហនុមានកន្ទុយខ្លោច, ពស់ខៀវភ្នែកធំ និងពស់សមុទ្រ ហើយមានចំនួន១២៨នាក់ បានរងគ្រោះដោយពស់វែកក្របី, ពស់វែករនាម, ពស់វែកដំបូក, ពស់ក្រាយស, ពស់ក្រាយលឿង, ពស់ក្រាយ និងក្បាលក្រហម។
លោកវេជ្ជបណ្ឌិត ឡេ ចាន់សង្វាត បានបញ្ជាក់ទៀតថា រយៈពេល១ខែអំឡុងខែកញ្ញា ឆ្នាំ២០២២ មានប្រជាពលរដ្ឋក្នុងខេត្តបន្ទាយមានជ័យ និងមកពីខេត្តឧត្តរមានជ័យ ដែលត្រូវបានប្រើប្រាស់វ៉ាក់សាំងការពារព្យាបាលពស់ចឹកមានវ៉ាក់សាំងប្រភេទHemato Polyvalant មានចំនួន៩៩ដប ។
លោកបានផ្តាំផ្ញើដល់ប្រជាពលរដ្ឋនៅរដូវទឹកជំនន់បានជន់លិចប៉ះពាល់ផ្ទះសំបែង ត្រូវចូលប្រុងប្រយ័ត្នការពារទុកជាមុននៅប្រទេសកម្ពុជា ក្រុមអ្នកជំនាញខាងសត្វពស់បានសំគាល់ឃើញថា មានពស់ពិសចំនួន១២ប្រភេទ ដែលជាមូលហេតុមានគ្រោះដល់មនុស្ស ក្នុងនោះមានពស់៦ប្រភេទ ដែលបង្កគ្រោះថ្នាក់ញឹកញាប់ មានពស់វែកក្របី, ពស់វែកដំបូក, ពស់ហនុមាន, ពស់ក្រាយ ឬថ្នាំងអំពៅខ្មៅ, ពស់បៃតង២ប្រភេទទៀត ។
មានពស់៥ប្រភេទទៀត ដែលមានច្រើនរស់នៅក្នុងព្រៃ មានពស់វែករនៀម, ពស់ពព្លាក់, ពស់ស្រការចាស់, ពស់ក្រាយលឿងខ្មៅ, ពស់ក្រាយក្បាលក្រហម, ពស់ទី១២មានពស់សមុទ្រ ដែលអាចបង្ករគ្រោះថ្នាក់ដល់អ្នកនេសាទ ៕
ចែករំលែកព័តមាននេះ