ខេត្តព្រះវិហារ ៖ កាលពីព្រឹកថ្ងៃទី១៩ វិច្ឆិកា ឆ្នាំ២០១០ កន្លងទៅនេះ មន្ទីរកសិកម្មខេត្តបានប្រារព្ធពិធីទិវាស្រែបង្ហាញប្រព័ន្ធប្រពលវប្បកម្មដំណាំស្រូវ (ប.វ.ស) និងចែកសំភារជូនប្រជាកសិករក្នុងរដូវប្រមូលផលនៅភូមិដាន ឃុំថ្មី ស្រុកគូលែន ក្រោមអធិបតីភាពលោកស ថាវី អភិបាលរងខេត្ត។ អញ្ជើញចូលរួមក្នុងពិធីនោះមានម្ចាស់ជំនួយកម្មវិធីស្បៀងអាហាររបស់សហភាពអឺរ៉ុបលើវិស័យកសិកម្មដែលជាដៃគូជាមួយអង្គការ FAO អង្គការពុទ្ធសាសនាដើម្បីអភិវឌ្ឍន៍ មន្ត្រីមន្ទីរកសិកម្មខេត្ត អភិបាល-អភិបាលរងស្រុកគូលែន ក្រុមប្រឹក្សាស្រុកគូលែន មេឃុំ ក្រុមប្រឹក្សាឃុំថ្មី ឃុំភ្នំពេញ និងប្រជាកសិករទទួលកញ្ចប់ពូជដែលបានទៅចូលរួមចំនួន៤ភូមិក្នុងឃុំពីរ។
លោកពឹង ទ្រីដា ប្រធានមន្ទីរកសិកម្មខេត្តបានធ្វើការកោតសរសើរដល់ប្រជាកសិករទាំងអស់ដែលបានអនុវត្តតាមការណែនាំរបស់អ្នកជំនាញបច្ចេកទេសក្នុងការដាំដំណាំស្រូវតាមបច្ចេកទេសថ្មីតាមរយៈការផ្តល់ទុនពីម្ចាស់ជំនួយ ទាំងសំភារទាំងពូជ ។ ការផលិតដំណាំស្រូវតាមបែបបុរាណនៅលើទឹកដីខេត្តព្រះវិហារគឺជាច្រើនសតវត្សមកហើយ ព្រោះជាខេត្តដែលមានដីប្រកបដោយជីជាតិសំរាប់ការផលិតដំណាំកសិកម្មដូចជាដំណាំស្រូវមានទិន្នផលខ្ពស់ដោយមិនចាំបាច់ប្រើជីវិទ្យាសាស្ត្រក៏អាចទទួលផលបានខ្ពស់ដែរ ក៏ប៉ុន្តែបើតាមការសង្កេតឃើញកន្លងទៅ ប្រជាកសិករនៅក្នុងតំបន់នេះអាចផលិតស្រូវក្នុង១ហិកតាទិន្នផលទទួលបានត្រឹមតែ២,៥តោនទៅ៣តោនតែប៉ុណ្ណោះ ។ ផ្ទុយទៅវិញ បន្ទាប់ពីមានការបង្ហាត់បង្រៀនតាមបែបបច្ចេកទេសរបស់មន្ត្រីជំនាញផ្នែកដាំដុះដំណាំស្រូវរបស់មន្ទីរកសិកម្មខេត្ត និងការផ្តល់ទុនជាសំភារ និងពូជស្រូវល្អៗសុទ្ធដូចជាផ្ការំដួលនិងសែនពិដោរពីអង្គការជាដៃគូ បច្ចុប្បន្នប្រជាកសិករចំនួន២ស្រុកក្នុងតខេត្ត គឺស្រុកជ័យសែន និងស្រុកគូលែនដែលមានចំនួន២.៦៦០គ្រួសារទទួលបានទិន្នផលទ្វេដងដោយក្នុង១ហិកតាពី៦ទៅ៦,៧តោន ។
លោកពឹង ទ្រីដា បានបញ្ជាក់ថា បន្ទាប់ពីមានការចុះផ្ទាល់ពីជំនាញនៃមន្ទីរកសិកម្មខេត្តពេលនេះធ្វើឱ្យប្រជាកសិករកំពុងតែទទួលបាននូវក្តីសង្ឃឹមលើជោគវាសនាអនាគតរបស់ពួកគាត់ក្នុងការផលិតដំណាំស្រូវស្របពេលដែលរាជរដ្ឋាភិបាលកម្ពុជាកំពុងតែផ្តោតទៅលើផែនការនាំអង្ករចេញទៅលក់នៅឯបរទេស ។ តាមការសង្កេតឃើញក្នុងរយៈពេល៥ឆ្នាំកន្លងមកនេះដោយមានការយកចិត្តទុកដាក់ក្នុងការចុះបង្ហាញផ្ទាល់ពីមន្ត្រីជំនាញបច្ចេកទេសរបស់មន្ទីរកសិកម្មខេត្តតាមរយៈការសហការជាមួយដៃគូអង្គការអន្តរជាតិនានា បច្ចុប្បន្នប្រជាកសិករក្នុងខេត្តកំពុងទទួលភោគផលពីដំណាំកសិកម្មភាគច្រើនគឺដំណាំស្រូវគួរជាទីមោទនៈសំរាប់ការកែប្រែជីវភាពរបស់ពួកគាត់ឱ្យកាន់តែប្រសើរឡើង។ នៅក្នុងពិធីទិវាស្រែបង្ហាញប្រព័ន្ធប្រពលវប្បកម្មនាព្រឹកនោះ បណ្តាម្ចាស់ជំនួយមានអង្គការFAO អង្គការពុទ្ធសាសនាដើម្បីអភិវឌ្ឍ ក៏បានឡើងធ្វើចំណាប់អារម្មណ៍ និងពន្យល់បន្ថែមបន្ទាប់ពីប្រជាកសិករទទួលបានសំភារពូជ និងជីដែលជាទុនសំរាប់ប្រជាកសិករយកទៅបង្កបង្កើនផល។ តំណាងម្ចាស់ជំនួយបានជំរុញ និងដាស់តឿនដល់ប្រជាកសិករពេលទទួលបានការឧបត្ថម្ភពីម្ចាស់ជំនួយជាសំភារ និងពូជ ហើយត្រូវយកទៅប្រើប្រាស់ឱ្យចំគោលដៅដើម្បីទាញយកភោគផលជួយដល់ខ្លួនឯង ហើយនេះជាប្រយោជន៍យ៉ាងសំខាន់ដើម្បីលើកស្ទួយជីវភាពរស់នៅរបស់ប្រជាពលរដ្ឋតាមជនបទ ។
លោកស ថាវី អភិបាលរងខេត្ត បានថ្លែងថា នៅខេត្តព្រះវិហារភាគច្រើនប្រជាកសិករតែងតែធ្វើកសិកម្មតាមបែបបុរាណ ហើយទទួលបានទិន្នផលទាបដែលមិនអាចបំពេញសេចក្តីត្រូវការក្នុងជីវភាពគ្រួសារ ដែលខ្លះមិនបានពេញមួយឆ្នាំផង។ លោកបានបញ្ជាក់ថា អ្នកខ្លះដើម្បីបំពេញសេចក្តីត្រូវការក្នុងជីវភាពក៏បានសំរេចចិត្តធ្វើចំណាកស្រុកទាំងប្រថុយប្រថានទៅតំបន់ផ្សេងៗដែលជាហេតុធ្វើឱ្យប្រជាពលរដ្ឋទាំងអស់នោះងាយស្រួលទទួលការរងគ្រោះបាត់បង់ទាំងភូមិឋាន ទាំងស្រែចំការ។ លោកអភិបាលរងខេត្តបានពន្យល់ដល់ប្រជាពលរដ្ឋថា បច្ចុប្បន្នរាជរដ្ឋាភិបាលកម្ពុជាដែលមានសម្តេចអគ្គមហាសេនាបតីតេជោហ៊ុន សែន ជានាយករដ្ឋមន្ត្រីបានដាក់ចេញនូវគោលនយោបាយនាំចេញអង្ករទៅបរទេស ដែលទាំងនេះហើយជាឱកាសដ៏ល្អសំរាប់ប្រជាកសិករក្នុងការផលិតស្រូវ និងជាឱកាសផ្តល់ការងារធ្វើឱ្យជីវភាពប្រជាកសិករមានការរីកចំរើនឈានទៅកាត់បន្ថយភាពក្រីក្រ។
លោក ស ថាវី បានរំលឹកដល់ប្រជាកសិករថា ទាំងអស់គ្នាតោងមានការចងចាំថា ដើម្បីផលិតស្រូវអង្ករឱ្យមានទិន្នផលខ្ពស់ត្រូវអនុវត្តតាមពាក្យស្លោកមួយចំនួនគឺ១-គ្រាប់ពូជសុទ្ធល្អ គឺធានាដល់គុណភាពសំណាប, ២-សំណាបល្អ គឹធានាដល់សន្ទូងមានសុខភាពល្អ, ៣-សន្ទូងល្អគឺទទួលបានទិន្នផលខ្ពស់, ៤-ស្រែគឺជាសួនដំណាំ និងជាប្រភពចំណូលគ្រួសារដែលត្រូវតែថែទាំប្រៀបដូចជាម្តាយថែទាំចិញ្ចឹមកូន,៥-ស្រូវគឺជាព្រះមេរុ និងជាជីវិតមនុស្សលោកទាំងមូល។ ក្នុងឱកាសនោះដែរ គណៈអធិបតី និងម្ចាស់ជំនួយបានប្រគល់តង់ទំហំ៦គុណ៨ម៉ែត្រសំរាប់ហាលស្រូវក្នុងមួយគ្រួសារទទួលបានតង់១ សរុប៤ភូមិស្មើនឹង៦៦០តង់ ៕
ចែករំលែកព័តមាននេះ