ឥណ្ឌានឹងបង្កើតអាកាសយានដ្ឋាន៨០ទីតាំងបន្ថែមទៀត នៅរយៈពេល៤-៥ឆ្នាំខាងមុខ
ឥណ្ឌា ៖ និយតករអាកាសចរណ៍របស់ប្រទេសឥណ្ឌាបាននិយាយថា ឥណ្ឌាទំនងជានឹងសាងសង់
ឥណ្ឌា ៖ និយតករអាកាសចរណ៍របស់ប្រទេសឥណ្ឌាបាននិយាយថា ឥណ្ឌាទំនងជានឹងសាងសង់អាកាសយានដ្ឋានជិត ៨០ទីតាំងបន្ថែមទៀតនៅរយៈពេលពី ៤ ទៅ ៥ ឆ្នាំ ខាងមុខ។ ហើយទន្ទឹមនឹងនោះ អាកាសយានដ្ឋានត្រូវការបំពេញតម្រូវការយ៉ាងជាក់លាក់បំផុត ដើម្បីចាប់ផ្តើមប្រតិបត្តិការជើងហោះហើររបស់ខ្លួន។ នេះបើយោងតាមប្រភពពី Business Insider ចេញផ្សាយកាលពីថ្ងៃទី០២ ខែតុលា។
ក្នុងរយៈពេល៨ឆ្នាំចុងក្រោយនេះ ចំនួនអាកាសយានដ្ឋានរបស់ឥណ្ឌាកើនឡើងពី ៧៤ ដល់ ១៤១ទីតាំង។ ហើយបើតាមការបញ្ជាក់ពីក្រសួងអាកាសចរណ៍ស៊ីវិល វានឹងកើនឡើងដល់ ២២០ទីតាំងនៅរយៈពេល ៤ ទៅ ៥ ឆ្នាំខាងមុខ។ ហើយជាមួយគ្នានោះ ក្រសួងបានផ្តល់ការអនុម័តជាគោលការណ៍ សម្រាប់ការបង្កើតអាកាសយានដ្ឋានបៃតង ឬ Greenfield ចំនួន ២១ទីតាំងនៅទូទាំងប្រទេសដែលរួមមាន៖
-អាកាសយានដ្ឋាន Mopa នៅរដ្ឋ Goa
-អាកាសយានដ្ឋាន Navi Mumbai, Shirdi និង Sindhudurg នៅរដ្ឋ Maharashtra
-អាកាសយានដ្ឋាន Kalaburagi, Vijayapura, Hassan និង Shivamogga នៅរដ្ឋ Karnataka
-អាកាសយានដ្ឋាន Dabra នៅរដ្ឋ Madhya Pradesh
-អាកាសយានដ្ឋាន Kushinagar និង Noida (Jewar) នៅរដ្ឋ Uttar Pradesh
-អាកាសយានដ្ឋាន Dholera និង Hirasar (Rajkot) នៅរដ្ឋ Gujarat
-អាកាសយានដ្ឋាន Karaikal នៅរដ្ឋធានី Puducherry
-អាកាសយានដ្ឋាន Dagadarthi (Nellore), Bhogapuram និង Orvakal (Kurnool) នៅរដ្ឋ Andhra Pradesh
-អាកាសយានដ្ឋាន Durgapur នៅរដ្ឋ West Bengal
-អាកាសយានដ្ឋាន Pakyong នៅរដ្ឋ Sikkim
-អាកាសយានដ្ឋាន Kannur នៅរដ្ឋ Kerala
-អាកាសយានដ្ឋាន Hollongi (Itanagar) នៅរដ្ឋ Arunachal Pradesh។
ហើយរហូតមកដល់ពេលនេះ អាកាសយានដ្ឋានបៃតង ដែលបានដំណើរការមានចំនួន ៨ទីតាំងហើយ ដូចជា Durgapur, Shirdi, Sindhudurg, Pakyong, Kannur, Kalaburagi, Orvakal និង Kushinagar។
យោងតាមក្រសួងអាកាសចរណ៍បានបង្ហាញថា មជ្ឈមណ្ឌលបានផ្តល់ការបោសសំអាតទីតាំងដល់រដ្ឋាភិបាលរដ្ឋ Himachal Pradesh សម្រាប់ការអភិវឌ្ឍអាកាសយានដ្ឋានបៃតងថ្មីនៅតំបន់ Nagchala និង Mandi។ ក្រៅពីនេះ អាកាសយានដ្ឋានចំនួន ៣៥ផ្សេងទៀត នឹងត្រូវបង្កើតឡើងសម្រាប់ការចុះចតឧទ្ធម្ភាគចក្រ និងយន្តហោះចុះចតលើទឹក ដែលត្រូវបានកំណត់ក្នុងគោលដៅសម្រាប់ការអភិវឌ្ឍន៍ អំឡុងឆ្នាំសារពើពន្ធ ២០២២-២៣ ស្ថិតក្រោមកម្មវិធីអភិវឌ្ឍន៍អាកាសយានដ្ឋានក្នុងតំបន់របស់រដ្ឋាភិបាលហៅកាត់ថា «RCS-UDAN»៕
ចែករំលែកព័តមាននេះ