ខេត្តមណ្ឌលគិរី ៖ រដ្ឋបាលខេត្តបានចេញសេចក្តីជូនដំណឹងអំពីដំណើរការច្រកព្រំដែនទាំង៣ ដែលត្រូវបានបើកដំណើរឡើងវិញ ចាប់ពីថ្ងៃទី១ ខែតុលា ឆ្នាំ២០២២តទៅ ។ ច្រកទ្វារព្រំដែនសំខាន់ៗចំនួន៣ក្នុងខេត្តនេះ រួមមាន…
ខេត្តមណ្ឌលគិរី ៖ រដ្ឋបាលខេត្តបានចេញសេចក្តីជូនដំណឹងអំពីដំណើរការច្រកព្រំដែនទាំង៣ ដែលត្រូវបានបើកដំណើរឡើងវិញ ចាប់ពីថ្ងៃទី១ ខែតុលា ឆ្នាំ២០២២តទៅ ។ ច្រកទ្វារព្រំដែនសំខាន់ៗចំនួន៣ក្នុងខេត្តនេះ រួមមាន ច្រកទ្វារព្រំដែនទ្វេភាគីឡាប៉ាខេ នៅស្រុកកែវសីមា ច្រកទ្វារព្រំដែនទ្វេភាគីដាក់ដាំ នៅស្រុកអូររាំង និងច្រកទ្វារព្រំដែនទ្វេភាគីណាំលៀ នៅស្រុកពេជ្រាដា ។
ការបើកឱ្យដំណើរការឡើងវិញនូវច្រកទ្វារព្រំដែនទ្វេភាគីនៅក្នុងភូមិសាស្ត្រខេត្តមណ្ឌលគិរីនេះ គឺតាមបណ្តោយខ្សែបន្ទាត់ព្រំដែនជាមួយខេត្តដាក់ឡាក់ ខេត្តដាក់ណុង និងខេត្តប៊ិញភឿក ប្រទេសវៀតណាម ។
រដ្ឋបាលខេត្តអនុញ្ញាតឱ្យបើកដំណើរការឡើងវិញនូវការធ្វើដំណើរចេញចូល និងការធ្វើចរាចរណ៍ទំនិញឆ្លងកាត់តាមច្រកទ្វារព្រំដែន ទាំង៣នេះ ចាប់ពីថ្ងៃទី១ ខែតុលា ឆ្នាំ២០២២តទៅ ។ បើតាមសេចក្តីជូនដំណឹងរបស់រដ្ឋបាលខេត្ត ចំពោះការអនុញ្ញាតឱ្យដំណើរការបើកច្រកទ្វារ ព្រំដែនឡើងវិញនេះ ក៏ត្រូវអនុវត្តតាមការណែនាំ របស់រាជរដ្ឋាភិបាល និងក្រសួងក្រសួងសុខាភិបាលដែរ ។
ចំពោះអ្នកដំណើរចូលមិនតម្រូវឱ្យធ្វើតេស្ត PCR ៧២ម៉ោង មុនចូលមកកម្ពុជា និងមិនតម្រូវឱ្យធ្វើតេស្តរហ័សនៅព្រំដែន ពេលមកដល់កម្ពុជានោះទេ ។ ដើម្បីជាការលើកទឹកចិត្តចំពោះអ្នកដំណើរចូល គួរគប្បីធ្វើតេស្តរហ័សដោយខ្លួនឯង និងភ្ជាប់មកជាមួយកាតចាក់វ៉ាក់សាំង ដើម្បីបង្ហាញជូនអាជ្ញាធរច្រកទ្វារ ។ ចំពោះអ្នកដំណើរចេញ ត្រូវអនុវត្តតាមការណែនាំរបស់ភាគីវៀតណាម និងត្រូវដាក់ជាប់ជាមួយនូវកាតចាក់វ៉ាក់សាំងជំងឺកូវីដ-១៩ផងដែរ ។ ចំពោះអ្នកដំណើរដែលមិនបានចាក់វ៉ាក់សាំង នៅពេលចូលមកកម្ពុជា ត្រូវធ្វើចត្តាឡីស័កចំនួន ១៤ថ្ងៃ តាមការណែនាំរបស់ក្រសួងសុខាភិបាល ។
ដោយឡែក សម្រាប់អ្នកដំណើរចេញ ត្រូវអនុវត្តការធ្វើចត្តាឡីស័ក តាមការណែនាំនិងការកំណត់របស់ភាគីវៀតណាម ។ ដើម្បីឱ្យដំណើរការនៃការបើកច្រកទ្វារឡើងវិញមានភាពរលូន និងជាការជួយសម្រួលដល់ការ ធ្វើដំណើរចេញចូលរបស់ប្រជាពលរដ្ឋ និងការធ្វើចរាចរណ៍ទំនិញឆ្លងកាត់ព្រំដែនទៅវិញទៅមក រដ្ឋបាលខេត្ត បានស្នើឱ្យប្រធានទីស្នាក់ការត្រួតពិនិត្យច្រកទ្វារព្រំដែនទ្វេភាគីទាំង៣ ជួបប្រជុំធ្វើការងារជាមួយខាងច្រកទ្វារភាគីវៀតណាម ធ្វើការផ្សព្វផ្សាយឱ្យបានទូលំទូលាយជូនដល់ប្រជាពលរដ្ឋ ក្រុមហ៊ុន សហគ្រាស បានជ្រាប និងសហការជាមួយកងកម្លាំងមានសមត្ថកិច្ចពាក់ព័ន្ធទាំងអស់ក្នុងការគ្រប់គ្រង និងសម្របសម្រួលសកម្មភាពនៅតាមច្រកទ្វារព្រំដែនទ្វេភាគីទាំងអស់ ដើម្បីធានាបាននូវការធ្វើដំណើរ និងការដោះដូរទំនិញឆ្លងកាត់ព្រំដែនមានភាពល្អប្រសើរ ៕
ចែករំលែកព័តមាននេះ