រាជធានីភ្នំពេញ ៖ សម្តេចតេជោ ហ៊ុនសែន នាយករដ្ឋមន្ត្រីបានពោលពាក្យអាណិតអាសូរដល់អ្នកកំពុងបម្រើការងារនៅតាមផ្ទះ ដោយសារពេលខ្លះគ្មានឈប់សម្រាករវល់រហូត ពេលខ្លះហូបបាយរហូតដល់ម៉ោង១២យប់ជាងក៏មានដោយសាររងចាំម្ចាស់ផ្ទះនៅហូបបាយរួច។
ថ្លែងក្នុងពិធីប្រគល់សញ្ញាបត្រដល់និស្សិតបញ្ជាប់ការសិក្សានៅវិទ្យាស្ថានវ៉ាន់ដា នាព្រឹកថ្ងៃទី០៣ តុលា ឆ្នាំ២០២២នេះ បានសម្តែងការអាណិតដល់បងប្អូនប្រជាពលរដ្ឋមួយចំនួនដែលកំពុងបម្រើការងារនៅតាមផ្ទះ ដោយសារគួកគេរវល់ណាស់ពេលខ្លះបានហូបបាយដល់ម៉ោងជាង១២យប់ក៏មានទម្រាំរួចដៃ។
ការបញ្ជាក់របស់សម្តេចតេជោនេះ បន្ទាប់ពីមានអ្នកមួយចំនួនអះអាងថា ខ្លួនរវល់ណាស់ក្នុងមួយថ្ងៃៗ។ប៉ុន្តែសម្តេចបានគូសបញ្ជាក់ថា៖«កុំនិយាយថា រវល់ស្រុកខ្មែរគ្មានអ្នកណារវល់ជាងហ៊ុន សែនទេ ប៉ុន្តែខ្ញុំទទួលស្គាល់អ្នករវល់ជាងគេ គឺមេផ្ទះ។អីញ្ចឹងបានខ្ញុំចេះតែនិយាយថា អ្នកដែលធ្វើការនៅតាមផ្ទះ គួរត្រូវយោគយល់ផង! ខ្ញុំអាសូវណាស់ទាំងមេដោះក្តី អ្នកធ្វើម្ហូបក្តី នៅផ្ទះខ្ញុំ ខ្ញុំតែងផ្តល់ឱកាសនិងផ្តល់ការឧបត្ថម្ភ»។
សម្តេចបានលើកឡើងថា ការធ្វើបែបនេះកុំឲ្យពេលលើកបាយទទួលទាននឹកឃើញដល់ក្រុមគ្រួសារដែលកំពុងពិបាក ដូច្នេះយើងត្រូវការពារអ្នកទាំងនេះ ហើយកុំកំម្អកដោយអ្នកខ្លះហូបបាយដល់ម៉ោង១០យប់មិនទាន់ចប់ទេ។អត់គិតថា អ្នកដែលត្រូវលាងចាន តើគ្នាហត់នឿយយ៉ាងណា។
សម្តេចគូសបញ្ជាក់ថា៖«អាហ្នឹងខ្ញុំនិយាយអីញ្ចឹងចុះ ដូចជាបទពិសោធននៃការរស់នៅក្នុងគ្រួសារមួយ។បើថ្ងៃណាចំថ្ងៃបុណ្យខ្ញុំជាមួយគ្រួសារខ្ញុំឆាប់ហូបបាយដើម្បីឲ្យក្មេងៗបានដើរលេង ឬក៏គេចែកវេនគ្នាដើរលេង ប៉ុន្តែវាមិនសប្បាយ»។
ជាមួយគ្នានោះដែរ សម្តេចក៏បានស្នើដល់អ្នកដែលមានអ្នកបម្រើការងារក្នុងផ្ទះ ឬមេដោះកុំធ្វើការហូបបាយយូរ(អង្គៀមទំពាអៀង)រហូតដល់ម៉ោង១០យប់មិនទាន់ឈប់ទៀតដោយមិនបានគិតថា អ្នកបម្រើនៅក្នុងផ្ទះគ្នារង់ចាំលើកចានឆ្នាំងទៅលាង រហូតដល់ទម្រាំបានដេកជិត១២ហើយ។ ហើយព្រលឹមម៉ោងមិនទាន់៥ផងឡើងដាំឲ្យយើងហូបទៀត។
សម្តេចក៏បានលើកឡើងថា សម្តេចមិនទម្លាប់ឲ្យអ្នករស់នៅជាមួយសម្តេចទៅដេកផ្ទះផ្សេងទៀត គឺនៅផ្ទះជាមួយគ្នារហូតអ្នកខ្លះមានប្តីប្រពន្ធក៏បានរកផ្ទះឲ្យដេកផ្សេងហើយមកធ្វើការបន្ត។
សម្តេចក៏បានលើកឡើងថា អ្នកដែលរស់នៅជាមួយសម្តេចដែលបានរៀនគួរសម សម្តេចក៏បានបញ្ជូនឲ្យទៅរៀនបណ្តុះបណ្តាលរហូតដល់សាកលវិទ្យាល័យឲ្យមានចំណេះដឹងផងដែរ៕
ចែករំលែកព័តមាននេះ