គេសង្កេតឃើញចាប់តាំងពីថ្ងៃរសៀលរហូតដល់វេលាម៉ោង៨និង០៣នាទីយប់ ថ្ងៃទី០២ ខែតុលា ឆ្នាំ២០២២ មេឃនៅតែបន្តភ្លៀងធ្លាក់ខ្លាំងឡើងៗជាប់ជានិច្ច បង្កឱ្យទៅជាជំនន់ទឹកភ្លៀងហូរចូល
ខេត្តប៉ៃលិន ៖ បើតាមសេចក្តីរាយការណ៍បានឱ្យដឹងថា គេសង្កេតឃើញចាប់តាំងពីថ្ងៃរសៀលរហូតដល់វេលាម៉ោង៨និង០៣នាទីយប់ ថ្ងៃទី០២ ខែតុលា ឆ្នាំ២០២២ មេឃនៅតែបន្តភ្លៀងធ្លាក់ខ្លាំងឡើងៗជាប់ជានិច្ច បង្កឱ្យទៅជាជំនន់ទឹកភ្លៀងហូរចូលក្នុងផ្សារសាលាក្រៅ ស្រុកសាលាក្រៅ និងលិចលង់ភូមិនានាជាច្រើននៅក្បែរនោះដែរ បណ្ដាលឱ្យទឹកចូលទៅក្នុងផ្ទះរបស់ប្រជាពលរដ្ឋ ធ្វើឱ្យអណ្តែតសម្ភារៈផ្ទះបាយដូចជា ចាន ឆ្នាំង ធុងជ័រ និងធ្វើឱ្យសើមសម្លៀកបំពាក់ជាដើម។
បើតាមប្រភពព័ត៌មានបានឱ្យដឹងទៀតថា ទន្ទឹមនឹងនេះដែរ ទឹកភ្លៀងដ៏ធំ១មេនេះ បានធ្វើឱ្យលិចភូមិមួយចំនួន ស្ថិតនៅក្នុងឃុំស្ទឹងត្រង់ ស្រុកសាលាក្រៅ ខេត្តប៉ៃលិន ធ្វើឱ្យប្រជាពលរដ្ឋត្រូវជម្លៀសចេញពីផ្ទះទៅរកទីទួលសុវត្ថិភាពផងដែរ។
ប្រភពដដែលបានបញ្ជាក់ថា ស្របពេលនោះ លោកជំទាវ បាន ស្រីមុំ អភិបាលខេត្តប៉ៃលិន បានអញ្ជើញចុះពិនិត្យស្ថានភាពជំនន់ទឹកភ្លៀង និងចាត់ចែងកម្លាំងក្រុមការងារ អាជ្ញាធរមូលដ្ឋានជួយអន្តរាគមន៍ដល់ប្រជាពលរដ្ឋភ្លាមៗ ខណៈពេលដែលភ្លៀងនៅតែបន្តធ្លាក់ឥតឈប់ បណ្តាលអោយទឹកហូរលិចកំណាត់ផ្លូវជាតិលេខ៥៩ ចំណុចទីប្រជុំជនស្រុកសាលាក្រៅ និងកំណាត់ផ្លូវត.ភ្ជាប់ពីផ្លូវជាតិលេខ៥៩ ឆ្ពោះទៅទីប្រជុំជនឃុំស្ទឹងត្រង់ ធ្វើឱ្យម្នាក់ៗស្ទើរតែត្រៀមខ្លួនមិនទាន់ក្នុងការប្រមូលសម្ភារៈកុំឱ្យអណ្តែតទឹក។
ប្រភពដដែលបញ្ជាក់ទៀតថា លើសពីនេះ លោកជំទាវអភិបាលខេត្ត ក៏បានចុះទៅពិនិត្យមើល ប្រជាពលរដ្ឋដែលរងគ្រោះដោយការហូរច្រោះដីភ្នំបាក់មកលើលំនៅដ្ឋាន ដើម្បីនាំទៅរកទីដែលមានសុវត្ថិភាពឱ្យបានទាន់ពេលវេលា។
ទោះបីជាយ៉ាងណាក៏ដោយ រហូតមកដល់ពេលនេះ គេមិនទាន់ឃើញមានមនុស្សណាម្នាក់ ឬសត្វចិញ្ចឹមរងគ្រោះដោយសារជំនន់ទឹកភ្លៀងនោះឡើយ៕
ចែករំលែកព័តមាននេះ