ព្រះសង្ឃ៣អង្គក្លែងខ្លួនជាជនស៊ីវិលចេញប្ល.ន់ព្រះសង្ឃដូចគ្នា ត្រូវបែកការណ៍
- កំពង់ស្ពឺ
ខេត្តកំពង់ស្ពឺ ៖ ព្រះសង្ឃចំនួន៣អង្គក្លែងខ្លួនជាជនស៊ីវិល ចេញធ្វើសកម្មភាពប្ល.ន់ទ្រព្យសម្បត្តិ
ខេត្តកំពង់ស្ពឺ ៖ ព្រះសង្ឃចំនួន៣អង្គក្លែងខ្លួនជាជនស៊ីវិល ចេញធ្វើសកម្មភាពប្ល.ន់ទ្រព្យសម្បត្តិរបស់ព្រះសង្ឃដូចគ្នា ត្រូវបានកម្លាំងសមត្ថកិច្ចស្រុកបសេដ្ឋ ចាប់ខ្លួនបានកាលពីវេលាម៉ោង៧និង៣០នាទីយប់ថ្ងៃទី០១ ខែតុលា ឆ្នាំ២០២២ នៅក្នុងវត្តស្វាយចារ្យ ឃុំស្តុក ស្រុកគងពិសី ខេត្តកំពង់ស្ពឺ ក្រោយពីចេញប្ល.ន់បានសម្រេចរួចគេចខ្លួន។
នគរបាលស្រុកបសេដ្ឋបាននិយាយឱ្យដឹងថា មានព្រះសង្ឃមួយអង្គព្រះនាម វ៉ាត សុខវៀត ព្រះជន្ម២០ព្រះវស្សា គង់នៅវត្តធម្មមង្គល ស្ថិតក្នុងភូមិត្រពាំងផ្លុង ឃុំភារីមានជ័យ ស្រុកបសេដ្ឋ ខេត្តកំពង់ស្ពឺបានមកដាក់ពាក្យបណ្តឹងថា នៅយប់ថ្ងៃទី៣០ ខែកញ្ញា ឆ្នាំ២០២២ ព្រះអង្គត្រូវបានជនសង្ស័យមួយក្រុមស្ទាក់ប្ល.ន់យកទូរសព្ទដៃមួយគ្រឿងម៉ាក iphone និងលុយ២ម៉ឺនរៀល ពេលដែលព្រះអង្គនិមន្តចេញពីវត្តទៅរកទិញបារី។ ព្រះសង្ឃអង្គនេះ បានបញ្ជាក់ឱ្យដឹងថា ព្រះអង្គត្រូវបានគេវា.យបណ្តាលឱ្យប៉ោងមុខនិងជាំភ្នែក ។
នគរបាលស្រុកដដែល បានឱ្យដឹងបន្ថែមថា ក្រោយទទួលបានបណ្តឹងភ្លាមៗ កម្លាំងជំនាញក៏បានបើកការស៊ីបអង្កេតឈានដល់កំណត់មុខសញ្ញាសង្ស័យហើយក៏បានឃាត់ខ្លួនមកសាកសួរ។ ដោយក្នុងនោះបានឃាត់ខ្លួនព្រះសង្ឃ៣អង្គ រួមមាន១-ព្រះនាម ផុន មករា ព្រះជន្មអាយុ១៦ព្រះវស្សា ២-ព្រះនាម ឌឿន វណ្ណដេត ព្រះជន្ម១៦ព្រះវស្សា និង៣-ព្រះនាម រឿន ធារ៉ា ព្រះជន្ម១៤ព្រះវស្សា ដែលគង់បួសរៀននៅវត្តខាងលើមកកាន់អធិការដ្ឋាន។
នគរបាលស្រុកដដែលបានបញ្ជាក់បន្ថែមឱ្យដឹងទៀតថា ក្រោមការសាកសួររបស់សមត្ថកិច្ចជំនាញ ព្រះសង្ឃទាំង៣អង្គនេះបានសារភាពថា ពិតជាបានក្លែងខ្លួនដោយស្លៀកពាក់ស៊ីវិលធ្វើសកម្មភាពប្ល.ន់ព្រះសង្ឃព្រះនាម វ៉ាត សុខវៀត នោះមែន ហើយពេលប្ល.ន់រួចក៏វិលចូលវត្តវិញគ្រងស្បង់ធម្មតា។
សមត្ថកិច្ចបានបញ្ជាក់ថា ការចាប់ផ្សឹកនេះមានកិច្ចសហការជាមួយធម្មការស្រុកគងពិសី លោកគ្រូព្រះអនុគណស្រុកគងពិសី និងព្រះគ្រូចៅអធិការវត្តស្វាយចារ្យបានផ្សឹកព្រះសង្ឃទាំង3អង្គនោះប្រគល់ជូនសមត្ថកិច្ចស្រុកបសេដ្ឋចាត់ការតាមច្បាប់នាព្រឹកថ្ងៃទី២ តុលា ឆ្នាំ២០២២ ។
បច្ចុប្បន្នមុខសញ្ញាជនសង្ស័យចំនួន3នាក់ខាងលើនាំយកមកសាក់សួរនៅអធិការនគរបាលបសេដ្ឋកសាងសំណុំរឿងចាត់ការតាមនិតិវិធីច្បាប់៕
ចែករំលែកព័តមាននេះ