មន្ត្រីជាន់ខ្ពស់ម្នាក់រងការរិះគន់ ក្រោយនិយាយចំអកលើសំណើដ៏សំខាន់របស់សិស្សស្រីម្នាក់
ឥណ្ឌា ៖ ការឆ្លើយតបបែបចំអករបស់មន្ត្រីជាន់ខ្ពស់ជាស្ត្រីម្នាក់ ចំពោះការស្នើសុំរបស់សិស្សស្រីម្នាក់ទៅ
ឥណ្ឌា ៖ ការឆ្លើយតបបែបចំអករបស់មន្ត្រីជាន់ខ្ពស់ជាស្ត្រីម្នាក់ ចំពោះការស្នើសុំរបស់សិស្សស្រីម្នាក់ទៅ
ឥណ្ឌា ៖ ការឆ្លើយតបបែបចំអករបស់មន្ត្រីជាន់ខ្ពស់ជាស្ត្រីម្នាក់ ចំពោះការស្នើសុំរបស់សិស្សស្រីម្នាក់ទៅកាន់រដ្ឋាភិបាល សម្រាប់ការផ្តល់ជូនសំឡីអនាម័យដោយឥតគិតថ្លៃដល់សិស្សស្រីគ្រប់រូបបានបង្កឱ្យមានប្រតិកម្មយ៉ាងខ្លាំងនៅក្នុងប្រទេសឥណ្ឌា។
យោងតាមប្រភពពីសារព័តមាន BBC បានរាយការណ៍ថា ក្មេងស្រីជំទង់ដែលមានឈ្មោះថា Riya Kumari បានស្នើសុំសំណើដ៏សំខាន់មួយនេះ នៅឯសិក្ខាសាលាមួយដែលរៀបចំឡើងដោយអង្គការ UNICEF នៅក្នុងរដ្ឋ Bihar ភាគខាងកើតប្រទេសឥណ្ឌា។
ស្ថិតនៅក្នុងកម្មវិធី Sashakt Beti, Samriddh Bihar (Empowered Daughters, Prosperous Bihar) សិស្សស្រីរូបនោះ បានសួរទៅមន្ត្រីជាន់ខ្ពស់ដែលចូលរួមកម្មវិធីថា តើរដ្ឋាភិបាលអាចផ្តល់ឱ្យក្មេងស្រីនូវសំឡីអនាម័យដោយឥតគិតថ្លៃដែលមានតម្លៃចន្លោះ ២០-៣០រូពី ដែលស្មើនឹង ០.២៥-០.៣៧ដុល្លារ បានដែរឬទេ? ហើយនាងក៏បាននិយាយអំពីបញ្ហាបង្គន់ខូចនៅសាលារបស់នាង និងផ្តល់ការលំបាកក្នុងការប្រើប្រាស់ផងដែរ។
ភ្លាមៗនោះ លោកស្រី Bhamra ដែលជាមន្ត្រីការិយាល័យជាន់ខ្ពស់នៃក្រសួងសុខុមាលភាពស្ត្រី និងកុមារ និងជាប្រធានសាជីវកម្មអភិវឌ្ឍន៍ស្ត្រី និងកុមារនៅក្នុងរដ្ឋ Bihar ហាក់មិនពេញចិត្តចំពោះសំណួរនេះ ដោយគាត់បាននិយាយថា «ហេតុអ្វីចាំបាច់យកអ្វីៗទាំងអស់ពីរដ្ឋាភិបាល? វិធីនៃការគិតនេះត្រូវតែផ្លាស់ប្តូរ។ ធ្វើវាដោយខ្លួនឯងទៅ»។ ហើយនៅពេលដែល Kumari នៅតែបន្តទាមទារដំណោះស្រាយពីរដ្ឋាភិបាលដែលទទួលបានការបោះឆ្នោតពីប្រជាពលរដ្ឋ។ ភ្លាមៗនោះ អ្នកស្រី Bhamra បានឆ្លើយតបដោយកំហឹងថា «នេះគឺជាកម្ពស់នៃភាពល្ងង់ខ្លៅ។ អញ្ចឹងកុំបោះឆ្នោត។ ក្លាយជាប្រទេសប៉ាគីស្ថានទៅ។ តើអ្នកបោះឆ្នោតដើម្បីប្រាក់និងសេវាកម្មឬ?»។
អ្នកស្រីថែមទាំងបាននិយាយថា ក្មេងស្រីរូបនេះ នឹងរំពឹងថា រដ្ឋាភិបាលនឹងផ្តល់សម្លៀកបំពាក់ ស្បែកជើង និងស្រោមអនាម័យដោយឥតគិតថ្លៃ។
បន្ទាប់ពីវីដេអូនៃការដោះដូរពាក្យសម្តីរវាងអ្នកទាំង២ ត្រូវបានចែករំលែកលើប្រព័ន្ធផ្សព្វផ្សាយសង្គម មនុស្សជាច្រើនបានហៅការអត្ថាធិប្បាយរបស់អ្នកស្រី Bhamra ថា «គួរឱ្យខ្មាស់អៀន ហើយមន្ត្រីរូបនេះ មិនសមក្នុងការធ្វើជាមន្ត្រីសាធារណៈនោះទេ»។
ឆ្លើយតបជុំវិញការរិះគន់នេះ លោកស្រី Bhamra បានអះអាងថា ការរាយការណ៍អំពីព្រឹត្តិការណ៍នោះគឺជារឿងមិនពិត ការព្យាបាទ និងខុសឆ្គងទាំងស្រុងតែម្តង។ ហើយបានគំរាមចាត់វិធានការផ្លូវច្បាប់ប្រឆាំងនឹងកាសែតហិណ្ឌូដែលបានរាយការណ៍ពីមតិរបស់នាងជាលើកដំបូងផងដែរ។
សូមជម្រាបជូនថា ការមករដូវគឺជាប្រធានបទហាមឃាត់មួយនៅឥណ្ឌា ដោយស្ត្រីដែលមករដូវជារឿយៗត្រូវបង្ខំឱ្យរស់នៅក្រោមការរឹតបន្តឹងធ្ងន់ធ្ងរ។ ហើយក្មេងស្រីជិត២៣លាននាក់ បានបោះបង់ការសិក្សាជារៀងរាល់ឆ្នាំ បន្ទាប់ពីពួកគេចាប់ផ្តើមមករដូវ ដោយសារកង្វះលទ្ធភាពទទួលបានឧបករណ៍អនាម័យ។
នៅក្នុងរដ្ឋ Bihar ដែលជារដ្ឋក្រីក្របំផុតមួយរបស់ឥណ្ឌា មានតែស្ត្រី ៥៩% ប៉ុណ្ណោះដែលប្រើវិធីសាស្ត្ររក្សាអនាម័យការពារនៅពេលមករដូវ។ នេះបើយោងតាមការស្ទង់មតិសុខភាពគ្រួសារជាតិចុងក្រោយបំផុត (NFHS-5) ហើយជាការស្ទង់មតិដ៏ទូលំទូលាយបំផុតអំពីសុខភាព និងសង្គមដោយរដ្ឋាភិបាល៕ (ដកស្រង់ចេញពី BBC និង Times Now News)
ចែករំលែកព័តមាននេះ