អាមេរិកពង្រីកការបន្ធូរបន្ថយបំណុលដល់ប៉ាគីស្ថាន បន្ទាប់ពីជួបគ្រោះទឹកជំនន់ដ៏អាក្រក់
ប៉ាគីស្ថាន ៖ ស្ថានទូតអាមេរិកប្រចាំទីក្រុងអ៊ីស្លាមម៉ាបាដ (Islamabad) ប្រទេសប៉ាគីស្ថានកាលពី
ប៉ាគីស្ថាន ៖ ស្ថានទូតអាមេរិកប្រចាំទីក្រុងអ៊ីស្លាមម៉ាបាដ (Islamabad) ប្រទេសប៉ាគីស្ថានកាលពីពេលថ្មីៗនេះបញ្ជាក់ថា ខ្លួនបានចុះហត្ថលេខាលើកិច្ចព្រមព្រៀងមួយ ដើម្បីផ្អាកការទូទាត់សេវាលើប្រាក់បំណុលចំនួន ១៣២លានដុល្លាររបស់ប៉ាគីស្ថាន។ ខណៈប្រទេសនៅអាស៊ីខាងត្បូងមួយនេះ កំពុងប្រឈមមុខនឹងវិបត្តិសេដ្ឋកិច្ចកាន់តែធ្ងន់ធ្ងរឡើង ដោយសារគ្រោះទឹកជំនន់ដ៏អាក្រក់បំផុត។
សេដ្ឋកិច្ចប្រទេសប៉ាគីស្ថានកំពុងប្រឈមមុខនឹងវិបត្តិតុល្យភាពនៃការទូទាត់ប្រាក់ ការពង្រីកឱនភាពគណនីជាចរន្ត ការធ្លាក់ចុះរូបិយប័ណ្ណដល់កម្រិតទាបជាប្រវត្តិសាស្ត្រ រួមនិងអតិផរណារហូតដល់ ២៧%។
គ្រោះទឹកជំនន់ដ៏អាក្រក់បានបំផ្លិចបំផ្លាញតំបន់ជាច្រើនរបស់ប៉ាគីស្ថានកាលពីចុងខែសីហាកន្លងទៅ ដោយបានឆកយកជីវីតមនុស្សជាង ១,៥០០នាក់ និងបណ្តាលឱ្យមានការខូចខាតយ៉ាងមហាសាល ដែលគិតជាទឹកប្រាក់ជាង ៣០ពាន់លានដុល្លារ។ ដោយកត្តានេះធ្វើឱ្យមានការភ័យខ្លាចថា ប៉ាគីស្ថាននឹងមិនបំពេញកាតព្វកិច្ចទូទាត់បំណុលដែលជំពាក់សហរដ្ឋអាមេរិកបានឡើយ។
លោក Donald Blome ឯកអគ្គរដ្ឋទូតអាមេរិកប្រចាំប៉ាគីស្ថានបានចុះហត្ថលេខាលើកិច្ចព្រមព្រៀង ដើម្បីពង្រីកការផ្តល់ប្រាក់កម្ចីក្រោមគំនិតផ្តួចផ្តើមនៃការព្យួរសេវាទូទាត់បំណុល «G20» ដោយលោកបន្ថែមថា «អាទិភាពរបស់យើងគឺប្តូរទិសដៅធនធានសំខាន់ៗ ដើម្បីជួយប្រទេសប៉ាគីស្ថាន»។ ហើយការបង្វិលនេះ គឺទាក់ទងនឹងកិច្ចព្រមព្រៀងក្លិបប៉ារីស (Paris Club) កាលពីខែមេសា ឆ្នាំ២០២០ ដើម្បីគាំទ្រប្រទេសមានចំណូលទាបចំនួន៧៣ អំឡុងពេលវិបត្តិកូវីដ១៩។ ហើយក្រោមនោះ អាមេរិកបានផ្តល់ជំនួយសង្គ្រោះបន្ថែមពីលើបំណុលចំនួន ១២៨លានដុល្លារដល់ប្រទេសប៉ាគីស្ថាន។
លោក Miftah Ismail រដ្ឋមន្ត្រីហិរញ្ញវត្ថុប៉ាគីស្ថានបាននិយាយថា ប៉ាគីស្ថានកំពុងស្វែងរកការបន្ធូរបន្ថយបំណុលពីម្ចាស់បំណុលទាំងអស់ជាទ្វេភាគី បន្ទាប់ពីជួបគ្រោះទឹកជំនន់។ ប៉ុន្តែលោកសង្កត់ធ្ងន់ថា រដ្ឋាភិបាលមិនបានស្វែងរកការសង្គ្រោះពីធនាគារពាណិជ្ជ ឬម្ចាស់បំណុល Eurobond នោះទេ។ ហើយលោកបានបន្ថែមទៀតថា មូលបត្របំណុលប្រមាណ ១ពាន់លានដុល្លារអាមេរិក នឹងត្រូវបង់ទាន់ពេលវេលា និងពេញកំណត់នៅចុងឆ្នាំនេះ៕ (ដកស្រង់ចេញពី Reuters)
ចែករំលែកព័តមាននេះ