ខេត្តកំពង់ស្ពឺ ៖ អ្នកស្រី យូ ស៊ីណាត អាយុ៧០ឆ្នាំ មុខរបរអាជីវករលក់ដូរ រស់នៅក្នុងភូមិទី៥ ឃុំត្រែងត្រយឹង ស្រុកភ្នំស្រួច ខេត្តកំពង់ស្ពឺ បានប្រាប់តាមទូរស័ព្ទឱ្យអ្នកយកព័ត៌មានយើងដឹងកាលពីថ្ងៃទី០១ ខែតុលា ឆ្នាំ២០២២នេះថា បើទោះបីជានគរបាលព្រហ្មទណ្ឌខេត្តកំពង់ស្ពឺមកជួបអ្នកស្រី សុំធ្វើការសម្របសម្រួលជាមួយគាត់នូវពាក្យសុំទោស និងលុយកាក់តិចតួចយ៉ាងណាក៏ដោយ ក៏អ្នកស្រីនៅតែមានជំហរមិនដកពាក្យបណ្តឹងឡើយ។ អ្នកស្រីបានពោលបញ្ជាក់ច្បាស់ៗថា គឺអ្នកស្រី សូមឱ្យសមត្ថកិច្ចស្នងការនគរបាលខេត្តកំពង់ស្ពឺ ក៏ដូចជាស្ថាប័នពាក់ព័ន្ធនឹងច្បាប់ ជួយរកយុត្តិធម៌ដល់កូនប្រុសរបស់គាត់ជាមនុស្សគ-ថ្លង់ផង ហើយអ្នកស្រីមានជំនឿចិត្តថា សមត្ថកិច្ចក្នុងខេត្តកំពង់ស្ពឺនឹងរកយុត្តិធម៌ជូនក្រុមគ្រួសាររបស់អ្នកស្រីបាន។
រហូតមកដល់ពេលនេះ មិនទាន់ធ្វើការដោះស្រាយនៅឡើយទេ ប្រសិនបើថ្នាក់ខេត្ត មិនធ្វើការដោះស្រាយ និងជួយរកយុត្តិធម៌ឱ្យកូនប្រុសរបស់គាត់ទេ គាត់នឹងដាក់ពាក្យបណ្តឹងបន្តទៅថ្នាក់លើៗបន្ថែមទៀត ដើម្បីបានយុត្តិធម៌ ភាពស្អាតស្អំ និងកិត្តិយសមកដល់កូនប្រុសរបស់គាត់ដែលជាមនុស្សមិនគ្រប់លក្ខណៈ (គ-ថ្លង់) ដោយសារតែលោកនាយប៉ុស្តិ៍នគរបាលឃុំត្រែងត្រយឹង ចេះច្បាប់ហើយ បែរជាបំពានលើច្បាប់ទៅវិញ។ អ្នកស្រីនឹងដាក់ពាក្យបណ្តឹងបន្តទៅអគ្គស្នងការនគរបាលជាតិ និងសម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ដើម្បីអន្តរាគមន៍ជួយរកយុត្តិធម៌ទៀតផង។
តាមការបង្ហើបរបស់នគរបាលខេត្តកំពង់ស្ពឺ បានឱ្យដឹងថា លោកវរសេនីយ៍ត្រី សែម វុឌី នាយប៉ុស្តិ៍នគរបាលឃុំត្រែងត្រយឹង មានលិខិតមួយច្បាប់កោះហៅឱ្យទៅបំភ្លឺនៅនាយកដ្ឋានបុគ្គលិក ពីរឿងដែលប្រជាពលរដ្ឋដាក់ពាក្យបណ្តឹង។
ពាក់ព័ន្ធនឹងការលើកឡើងរបស់ម្តាយបុរសគ-ថ្លង់ខាងលើនេះដែរ អ្នកយកព័ត៌មានយើងបានទូរស័ព្ទទៅលោក សម សាមួន ស្នងការនគរបាលខេត្តកំពង់ស្ពឺ ប៉ុន្តែលោកជាប់រវល់ការងារ ដោយបានប្រាប់អ្នកយកព័ត៌មានយើងឱ្យសួរទៅលោក សម សាក់ ស្នងការរងទទួលផែនព្រហ្មទណ្ឌ បន្ទាប់មកអ្នកយកព័ត៌មានយើងក៏បានតេទៅលោក សម សាក់ គឺលោកបានប្រាប់មកវិញថា សូមសួរលោកស្នងការវិញ។
សូមរំលឹកផងដែរថា នាយប៉ុស្តិ៍នគរបាលឃុំត្រែងត្រយឹង នៃស្រុកភ្នំស្រួច ខេត្តកំពង់ស្ពឺ លោក សែម វុឌី បានរងបណ្តឹងថា បានវា.យធ្វើទារុ.ណកម្មលើជនសង្ស័យគ-ថ្លង់ ក្រោយចាប់វា.យខ្នោះនាំខ្លួនទាំងកណ្តាលយប់ទៅកាន់ប៉ុស្តិ៍នគរបាលរដ្ឋបាលត្រែងត្រយឹង គ្រាដែលបុរសគ-ថ្លង់យកដុំថ្មគប់ដំបូលផ្ទះអ្នកបើកល្បែ.ងជល់មាន់អនឡាញ និងឡូតូ។
អ្នកស្រី យូ ស៊ីណាត អាយុ៧០ឆ្នាំ រស់នៅភូមិទី៥ ឃុំត្រែងត្រយឹង ស្រុកភ្នំស្រួច បាននិយាយថា នៅយប់ថ្ងៃទី១៣ ខែកញ្ញា ឆ្នាំ២០២២ វេលាម៉ោងប្រមាណជាង១០និង០០នាទីយប់ កូនប្រុសរបស់គាត់ឈ្មោះ គ្រុយ ធីយ៉ា អាយុ៤០ឆ្នាំ បានយកដុំថ្មគប់ទៅលើដំបូលផ្ទះគេដែលកំពុងមានការជួបជុំលេងល្បែ.ងជល់មាន់តាមទូរទស្សន៍។ ហើយការគប់នោះ ដោយសារតែកន្លែងដែលជួបជុំលេងជល់មាន់ មានការហ៊ោកញ្ជ្រៀវបង្កសំឡេងរំខានដល់ដំណេករបស់គ្រួសារគាត់រាល់យប់។ ក្រោយពីកូនប្រុសរបស់គាត់គប់ដុំថ្មរួច ស្រាប់តែនៅម៉ោង១០និង៣០នាទីយប់ ក៏មានប៉ូលិសចំនួន០៣នាក់ បានជិះរថយន្តហាយឡែនឌ័រ ពណ៌ក្រហម មួយគ្រឿងមកដល់ផ្ទះ ហើយក៏បានចាប់វា.យខ្នោះកូនប្រុសរបស់គាត់រុញចូលឡាននាំយកទៅប៉ុស្តិ៍នគរបាលត្រែងត្រយឹងបាត់។ លុះនាំខ្លួនទៅដល់ប៉ុស្តិ៍ លោកនាយប៉ុស្តិ៍ខាងលើ ព្រមទាំងកូនចៅ ក៏បានដាល់ទៅលើផ្ទៃមុខកូនប្រុសគាត់ទាំងដៃចាប់ខ្នោះជាច្រើនដៃ បណ្តាលឱ្យដួលទៅលើដី និងចាប់លើកឡើងមកវិញ បង្ខំឱ្យផ្តិតមេដៃបញ្ចប់រឿង ហើយក៏បានដោះលែងមកផ្ទះវិញនៅម៉ោង១២និង៣០នាទីយប់ថ្ងៃដដែល។
អ្នកស្រីជាម្តាយបុរសគ-ថ្លង់ក៏បានបញ្ជាក់បន្ថែមថា ពេលដើរមកដល់ផ្ទះ គាត់បានឃើញផ្ទៃមុខកូនរបស់គាត់មានសភាពហើមជ៉ាំ និងបែកបបូរមាត់។ គ្រានោះ កូនប្រុសគាត់បានប្រាប់ពីសកម្មភាពដែលមេប៉ុស្តិ៍ និងគូកន បានវា.យធ្វើបាប និងធ្វើទារុ.ណកម្មទាំងដៃកំពុងជាប់ខ្នោះពេលចាប់យកទៅ។
គាត់ថា កូនប្រុសគាត់ត្រឹមតែទោសគប់ដុំថ្មលើដំបូលផ្ទះ មិនដល់ថ្នាក់ចាប់កៀកវា.យខ្នោះនោះទេ ហើយក៏មិនដល់វា.យធ្វើទារុ.ណនោះដែរ ម្យ៉ាងកូនគាត់ក៏មានពិការភាពផងដែរ។ គាត់សុំឱ្យផ្តល់ភាពយុត្តិធម៌ដល់កូនប្រុសពិការភាពរបស់គាត់ ដោយឱ្យមេប៉ុស្តិ៍នៃឃុំត្រែងត្រយឹង ចេញមុខទទួលខុសត្រូវលើរឿងនេះ ហើយក៏សុំឱ្យអាជ្ញាធរមានសមត្ថកិច្ចបង្ក្រាបល្បែ.ងស៊ីសងគ្រប់ប្រភេទ ដែលកំពុងបើកលេងយ៉ាងគគ្រឹកគគ្រេង ស្រែកហ៊ោបង្កការរំខានដល់ដំណេកពលរដ្ឋក្នុងពេលយប់ផងដែរ។
ពាក់ពន្ធ័នឹងការប្តឹងចោទប្រកាន់ខាងលើនេះ លោក សែម វុឌី នាយប៉ុស្តិ៍ត្រែងត្រយឹង បានប្រាប់តាមទូរសព្ទ័នៅថ្ងៃទី១៥ ខែកញ្ញា ឆ្នាំ២០២២នេះថា លោកអត់បានវា.យធ្វើបាប និងធ្វើទារុ.ណកម្មទេ ព្រោះលោកក៏ដឹងដែរថា បុរសដែលបានឃាត់មកនោះ មានកាយសម្បទាមិនគ្រប់គ្រាន់ (គ) តែអ្វីដែលលោកចាប់យកមក គឺដើម្បីធ្វើកិច្ចសន្យាបញ្ឈប់មិនឱ្យប្រព្រឹត្តដូច្នេះទៀត ខណៈសកម្មភាពបែបនេះ កើតឡើងច្រើនដងមកហើយ៕
ចែករំលែកព័តមាននេះ