សហរដ្ឋអាមេរិក កាលពីថ្ងៃសុក្រ ទី៣០ កញ្ញា បានប្រកាសដាក់ទណ្ឌក.ម្មលើរុស្ស៊ី បន្ទាប់ពីមេដឹកនាំរុស្ស៊ី Vladimir Putin ប្រកាសដាក់បញ្ជូលទឹកដីវា.យដណ្តើមបានពីអ៊ុយក្រែនជាទឹកដីផ្លូវការរបស់រុស្ស៊ី។ទណ្ឌកម្មអាមេរិកដាក់លើមនុស្ស និងក្រុមហ៊ុនរាប់រយ រួមទាំងសមាជិកសភាផងដែរ។
ប្រធានាធិបតីអាមេរិក Joe Biden និយាយក្នុងសេចក្តីប្រកាសថា «យើងនឹងប្រមូលផ្តុំសហគមន៍អន្តរជាតិឱ្យថ្កោលទោសចំពោះទង្វើទាំងនេះ និងឱ្យរុស្ស៊ីទទួលខុសត្រូវ។ យើងនឹងបន្តផ្តល់ឱ្យអ៊ុយក្រែននូវឧបករណ៍ដែលខ្លួនត្រូវការដើម្បីការពារខ្លួន”»។
ក្រសួងរតនាគារសហរដ្ឋអាមេរិក និងក្រសួងពាណិជ្ជកម្មបានព្រមានថា នរណាម្នាក់ដែលនៅក្រៅប្រទេសរុស្ស៊ី រួមទាំងក្រុមហ៊ុននានាដែលផ្តល់ការគាំទ្រផ្នែកនយោបាយ សេដ្ឋកិច្ច ឬសម្ភារៈដល់ទីក្រុងម៉ូស្គូ ប្រឈមនឹងហានិភ័យខ្ពស់នៃការដាក់ទណ្ឌកម្ម។ទណ្ឌកម្មរបស់រតនាគារ ជាទូទៅបង្កកទ្រព្យរបស់ពួកគេនៅសហរដ្ឋអាមេរិក និងហាមជនជាតិអាមេរិកមិនឱ្យពាក់ព័ន្ធជាមួយពួកគេ។
ក្រសួងពាណិជ្ជកម្មអាមេរិកបានដាក់បន្ថែមអង្គភាពចំនួន ៥៧ នៅរុស្ស៊ី និងតំបន់គ្រីមៀ ចូលក្នុងបញ្ជីខ្មៅនៃការនាំចេញ។
ក្រសួងរតនាគារអាមេរិកនិយាយថា ខ្លួនបានដាក់ទណ្ឌកម្មលើមនុស្ស ១៤នាក់នៅក្នុងឧស្សាហកម្មយោធារុស្ស៊ី មេដឹកនាំ ២រូបនៃធនាគារកណ្តាលរុស្ស៊ី សមាជិកគ្រួសារមន្ត្រីជាន់ខ្ពស់ និងសមាជិកសភារុស្ស៊ីចំនួន ២៧៨នាក់ ដែលបើកសិទ្ធិប្រជាមតិក្លែងក្លាយរបស់រុស្ស៊ី និងការប៉ុនប៉ងដាក់បញ្ជូលអធិបតេយ្យភាពទឹកដីអ៊ុយក្រែន។
ក្នុងចំណោមអ្នករងទណ្ឌកម្មមានឧបនាយករដ្ឋមន្ត្រី Alexander Novak សមាជិកសភា Duma ចំនួន ១០៩រូប ក្រុមប្រឹក្សាសហព័ន្ធនៃសភាសហព័ន្ធរុស្ស៊ី និងសមាជិករបស់ខ្លួនចំនួន ១៦៩រូប និងទេសាភិបាលនៃធនាគារកណ្តាលរុស្ស៊ី៕ (យោងតាមប្រភព៖ Reuters)
ចែករំលែកព័តមាននេះ