វិបត្តិគីមឈីធ្ងន់ធ្ងរ! រដ្ឋាភិបាលកូរ៉េខាងត្បូងបើកកញ្ចប់ថវិកាជួយអន្តរាគមន៍
កូរ៉េខាងត្បូង ៖ ក្រុមហ៊ុនផលិតគីមឈី (Kimchi) របស់កូរ៉េខាងត្បូងកំពុងជួបវិបត្តិធ្ងន់ធ្ងរ ដោយសារ
កូរ៉េខាងត្បូង ៖ ក្រុមហ៊ុនផលិតគីមឈី (Kimchi) របស់កូរ៉េខាងត្បូងកំពុងជួបវិបត្តិធ្ងន់ធ្ងរ ដោយសារកង្វះស្ពៃសម្រាប់ធ្វើគីមឈី ដែលបង្កឡើងដោយការប្រែប្រួលអាកាសធាតុបានធ្វើឱ្យតម្លៃកើនឡើងយ៉ាងខ្លាំងនៅឆ្នាំនេះ រួមនឹងការផ្តល់តម្លៃទាបពីប្រទេសចិនដែលជាដៃគូប្រកួតប្រជែង។
ទាំងនេះគឺជាអារម្មណ៍នៃវិបត្តិដ៏ធ្ងន់ធ្ងរជុំវិញមុខម្ហូបមានរសជាតិហឹរ ដែលប្រជាជនកូរ៉េជាច្រើនបានបរិភោគជារៀងរាល់ថ្ងៃ និងជាម្ហូបអត្តសញ្ញាណជាតិរបស់កូរ៉េខាងត្បូងផងដែរ។ កាលពីពេលថ្មីៗនេះ រដ្ឋាភិបាលកូរ៉េខាងត្បូងបានដាក់ចេញគម្រោងសាងសង់កន្លែងស្តុកស្ពៃដ៏ធំចំនួន២ ដែលក្នុងមួយកន្លែងមានទំហំ ៩,៩០០ម៉ែត្រការ៉េ ដោយនឹងត្រូវសាងសង់ឡើងក្នុងស្រុក Goesan ភាគខាងជើងខេត្ត Chungcheong និងស្រុក Haenam ភាគខាងត្បូងខេត្ត Jeolla ដែលទាំង២កន្លែងរួមបញ្ចូលគ្នា ស្មើនឹងទីលានបាល់ទាត់ចំនួន៣ឯណោះ។
ទីតាំងទាំង២នេះ នឹងអាចស្តុកស្ពៃបានប្រមាណ១ម៉ឺនតោន និងប្រមូលផលស្ពៃបាន ៥០តោនក្នុងមួយថ្ងៃ។ ហើយការសាងសង់ត្រូវបានរំពឹងថា នឹងប្រើប្រាស់ថវិកាអស់ប្រមាណ ៥៨ពាន់លានវ៉ុន ស្មើនឹងជាង ៤០លានដុល្លារអាមេរិក ដែលនឹងត្រូវបញ្ចប់នៅក្នុងឆ្នាំ ២០២៥។
អ្នកផលិតគីមឈីក្នុងស្រុកត្អូញត្អែរអំពីផលលំបាកក្នុងការទិញស្ពៃឱ្យបានគ្រប់គ្រាន់នៅក្នុងតម្លៃខ្ពស់នាពេលបច្ចុប្បន្ននេះ។ ប៉ុន្តែការអន្តរាគមន៍របស់រដ្ឋាភិបាលក្នុងការរក្សាទុកផលិតផល និងផ្គត់ផ្គង់ឧស្សាហកម្មក្នុងតម្លៃសមរម្យគឺមិនអាចកើតឡើងក្នុងពេលឆាប់ៗបាននោះទេ។
ការប្រែប្រួលអាកាសធាតុរយៈពេលប៉ុន្មានឆ្នាំចុងក្រោយនេះ ដែលនាំមកនូវសីតុណ្ហភាពខ្ពស់ និងភ្លៀងធ្លាក់ខ្លាំងបានធ្វើឱ្យដំណាំស្ពៃខូច ជាហេតុឈានដល់ការកាត់បន្ថយការផ្គត់ផ្គង់។ នៅឆ្នាំនេះ តម្លៃស្ពៃបានកើនឡើងទ្វេដងក្នុងរយៈពេលតិចជាង៣ខែ ដែលជាផ្នែកមួយនៃការកើនឡើងអតិផរណាដល់កម្រិតខ្ពស់បំផុតក្នុងរយៈពេល ២៤ឆ្នាំ នៅក្នុងខែកក្កដាកន្លងទៅ។
លោក Ahn Ik-jin នាយកប្រតិបត្តិក្រុមហ៊ុនផលិតគីមឈី Cheongone Organic បាននិយាយថា «យើងធ្លាប់ទិញស្ពៃក្នុងខែមិថុនា បន្ទាប់មករក្សាទុកសម្រាប់ប្រើប្រាស់នៅពេលក្រោយ នៅពេលដែលតម្លៃស្ពៃឡើង។ ប៉ុន្តែឆ្នាំនេះ យើងអស់ស្តុកហើយ។ យើងធ្លាប់ផលិតគីមឈី ១៥តោនក្នុងមួយថ្ងៃ ប៉ុន្តែឥឡូវយើងផលិតបានតែ ១០តោន ឬតិចជាងនេះ។ ដូច្នេះក្រុមហ៊ុនត្រូវដំឡើងថ្លៃគីមឈីចំនួនពីរភាគបី ដល់៥ពាន់វ៉ុន ដែលស្មើនឹង ៣.៥ដុល្លារក្នុងមួយគីឡូក្រាម»។
ការនាំចូលរបស់ចិន ដែលជារឿយៗមានតម្លៃប្រហែលមួយភាគបីនៃគីមឈីផលិតក្នុងស្រុកបានកើនឡើងក្នុងរយៈពេល២ទសវត្សចុងក្រោយនេះ ដែលស្មើនឹង ៤០ភាគរយនៃទីផ្សារក្នុងស្រុក សម្រាប់គីមឈីដែលផលិតក្នុងលក្ខខណ្ឌពាណិជ្ជកម្ម។
រដ្ឋាភិបាលសង្ឃឹមថា កម្រោងការស្តុកស្ពៃនឹងចូលរួមចំណែកយ៉ាងធំធេងក្នុងការពង្រឹងទីតាំងផលិតគីមឈីក្នុងស្រុកទាំងអស់។ ស្របពេលដែលលោក Lim Jeung-guen អនុប្រធានផ្នែកផ្សព្វផ្សាយឧស្សាហកម្មម្ហូបអាហាររបស់ក្រសួងកសិកម្មបានមានប្រសាសន៍ថា ការសាងសង់បន្ថែមអាចនឹងត្រូវធ្វើឡើង ប្រសិនបើទីតាំង២ដំបូងដំណើរការបានល្អ៕ (ដកស្រង់ចេញពី Reuters)
ចែករំលែកព័តមាននេះ