រថយន្តបើកខុសប័ណ្ណបើកបរត្រូវសមត្ថកិច្ចឃាត់ លុះអៀបកៀរត្រូវផុងលូជាប់រថយន្តទៀត
- ភ្នំពេញ
នគរបាលចរាចរណ៍ផ្លូវគោកប្រចាំការគោលដៅ បានធ្វើការឃាត់រថយន្តដឹកចំណីសត្វមួយគ្រឿង ហើយក៏រកឃើញថា តៃកុងបានបើកបរ
រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា នគរបាលចរាចរណ៍ផ្លូវគោកប្រចាំការគោលដៅ បានធ្វើការឃាត់រថយន្តដឹកចំណីសត្វមួយគ្រឿង ហើយក៏រកឃើញថា តៃកុងបានបើកបរខុសប័ណ្ណបើកបរ បង្កឱ្យមានការភ្ញាក់ផ្អើលកាលពីវេលាម៉ោង៦ល្ងាច ថ្ងៃទី២៩ ខែកញ្ញា ឆ្នាំ២០២២ នៅចំណុចផ្លូវជាតិលេខ៤ ត្រង់ស្តុបទំនប់ស្រូវ ស្ថិតក្នុងភូមិព្រៃស្វាយ សង្កាត់ចោមចៅ៣ ខណ្ឌពោធិ៍សែនជ័យ ។
តាមប្រភពព័ត៌មានបញ្ជាក់ពីសមត្ថកិច្ចផ្នែកជំនាញចរាចរណ៍ផ្លូវគោកប្រចាំគោលដៅកើតហេតុបានអោយដឹងថា ខណៈពេលពួកគាត់កំពុងតែសម្រួលចរាចរណ៍ ដោយឃើញរថយន្តដឹកចំណីសត្វ ពណ៌ស ពាក់ស្លាកលេខ ភ្នំពេញ3B-6128 មានការសង្ស័យក៏ហៅអោយឈប់សួរនាំ និងឆែកឆេរមើលឯកសារបើកបរ ស្រាប់តែរកឃើញថា អ្នកបើកបរកាន់ប័ណ្ណបើកបរក្បាលពីរ ចំណែករថយន្តដែលកំពុងបើកបរជាប្រភេទក្បាលបី គឺបើកបរដោយខុសប័ណ្ណបើកបរ ទើបសមត្ថកិច្ចឃាត់រថយន្តអោយបើកត្រឡប់ក្រោយទៅដាក់អែបខាងតែម្តង។
ប្រភពដដែលបន្តថា នៅពេលអ្នកបើកបររ៉ីយែថយក្រោយ ស្រាប់តែរថយន្តបានផុងបាក់លូស្រុតជាប់ថយលែងរួច បន្ទាប់មកខាងម្ចាស់រថយន្តបានរើចំណីសត្វចេញពីលើរថយន្តទៅដាក់អែបខាង រួចទាក់ទងហៅរថយន្តស្ទូច ដើម្បីមកស្ទួចយកចេញពីកន្លែងផុង និងសាងចំណីឡើងដាក់វិញ ដើម្បីដឹកបន្តយកទៅអោយម៉ូយតាមការកំណត់។ ចំណែកការខូចខាតលូត្រូវបានខាងម្ចាស់រថយន្តធ្វើការដោះស្រាយជាមួយខាងម្ចាស់លូ ដោយសងថ្លៃខូចខាត ដើម្បីបញ្ចប់រឿងភ្លាមតែម្តង។
ក្រោយពេលកើតហេតុ សមត្ថកិច្ចផ្នែកជំនាញចរាចរណ៍ផ្លូវគោក បានធ្វើការផាកពិន័យពីម្ចាស់រថយន្តជាទឹកប្រាក់ចំនួន១៥ម៉ឺនរៀល រួចក៏អោយបើកចេញទៅធម្មតា៕
ចែករំលែកព័តមាននេះ