រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា ជនសង្ស័យម្នាក់បានបន្លំរកទិញទូរស័ព្ទស៊េរីទំនើប លុះនៅពេលម្ចាស់ទូរស័ព្ទភ្លេចខ្លួន ជនសង្ស័យរូបនេះក៏ឆ្លៀតឱកាសយកទូរស័ព្ទចំនួន២គ្រឿងដាក់ក្នុងហោប៉ៅ រួចជិះម៉ូតូរត់គេចខ្លួន តែត្រូវបានម្ចាស់ទូរស័ព្ទឃើញទាន់ស្រែកថា «ចោរៗ» ផ្អើលអស់បងប្អូនប្រជាពលរដ្ឋជួយឃាត់បាននាំគ្នា រួចនាំគ្នាវា.យជនសង្ស័យឡើងទ្រមខ្លួនតែម្តង បង្កអោយមានការភ្ញាក់ផ្អើលកាលពីវេលាម៉ោង៦និង៣០នាទីយប់ ថ្ងៃទី២៩ ខែកញ្ញា ឆ្នាំ២០២២ នៅចំណុចហាងលក់ទូរស័ព្ទដៃយីហោ «ឡេង ម៉ីលី» នៅចំណុចផ្សារទួលពង្រ ស្ថិតក្នុងភូមិទួលពង្រ សង្កាត់ចោមចៅទី១ ខណ្ឌពោធិ៍សែនជ័យ។
សេចក្តីរាយការណ៍បន្តថា ជនសង្ស័យខាងលើមានឈ្មោះ សឿង សុខហួរ ភេទប្រុស អាយុ១៨ឆ្នាំ មុខរបរមិនពិតប្រាកដ ស្នាក់នៅភូមិជ្រៃកោង សង្កាត់ចោមចៅទី២ ខណ្ឌពោធិ៍សែនជ័យ ចំណែកជនរងគ្រោះវិញមានឈ្មោះ ឡេង សុភក្តិ ភេទប្រុស ជាម្ចាស់ហាងលក់ទូរស័ព្ទដៃរស់នៅភូមិ-ឃុំកើតហេតុខាងលើ។
តាមប្រភពព័ត៌មានពីជនរងគ្រោះ បាននិយាយប្រាប់ថា នៅមុនពេលកើតហេតុ ជនសង្ស័យបានជិះម៉ូតូមួយគ្រឿងម៉ាកហុងដាឌ្រីម ស៊េរី២០២២ (ឡើងស៊េរី) ពណ៌ខ្មៅ ពាក់ស្លាកលេខ កំពង់ធំ 1E-2931 មកម្នាក់ឯង រួចបានចូលមកសួររកទិញទូរស័ព្ទដៃម៉ាកអាយហ្វន១១ប្រូមិច។ ដំបូងជនរងគ្រោះបានយកទូរស័ព្ទម៉ាកអាយហ្វន១១ប្រូមិច អោយឱ្យជនសង្ស័យមើលចំនួន១គ្រឿង បន្ទាប់មកជនសង្ស័យមើលចុះមើលឡើង ហើយពេលនោះជនរងគ្រោះក៏បានអោយជនសង្ស័យមើលទូរស័ព្ទចំនួន១គ្រឿងទៀត ។
ជនសង្ស័យបន្តថា ខណៈពេលជនសង្ស័យកំពុងតែមើលទូរស័ព្ទដៃចុះឡើងៗនោះ ស្រាប់តែជនរងគ្រោះភ្លេចខ្លួនមួយភ្លែត ជនសង្ស័យក៏បានយកទូរស័ព្ទម៉ាកអាយហ្វន១១ប្រូមិចចំនួន២គ្រឿងខាងលើ ដាក់ក្នុងហោប៉ៅ រួចជិះម៉ូតូចេញភ្លាមតែម្តង តែត្រូវបានម្ចាស់ទូរស័ព្ទឃើញទាន់ក៏ស្រែកថា «ចោរៗ» ។
ជនរងគ្រោះបន្តទៀតថា នៅពេលនោះ ក៏ត្រូវបានបងប្អូនប្រជាពលរដ្ឋនាំគ្នាដេញតាមឃាត់ចាប់បានជនសង្ស័យភ្លាមៗ និងស្វាគមន៍មួយដៃមួយជើងម្នាក់ បណ្តាលឲ្យជនសង្ស័យរងរបួសបែកមុខ និងខៀវភ្នែករងរបួសធ្ងន់។ បន្ទាប់មក បងប្អូនប្រជាពលរដ្ឋបានទូរស័ព្ទប្តឹងនគរបាលប៉ុស្តិ៍ចោមចៅទី១ ដើម្បីនាំខ្លួនជនសង្ស័យ ព្រមទាំងម៉ូតូយកទៅសួរនាំនៅប៉ុស្តិ៍នគរបាលសង្កាត់ចោមចៅទី១តែម្តង។
ក្រោយពេលចាប់ខ្លួន ជនសង្ស័យបានសារភាពថា ខ្លួនពិតជាបានធ្វើសកម្មភាពលួចយកទូរស័ព្ទនៅហាងខាងលើនេះ ពិតប្រាកដមែន។
ក្រោយពេលកើតហេតុនគរបាលប៉ុស្តិ៍ក៏បានយកទូរស័សព្ទម៉ាកអាយហ្វន១១ប្រូមិចចំនួន២គ្រឿងប្រគល់អោយជនរងគ្រោះវិញ ចំណែកជនសង្ស័យត្រូវបាននគរបាលប៉ុស្តិ៍កសាងសំណុំរឿង រួចបញ្ជូនទៅផ្នែកជំនាញព្រហ្មទណ្ឌខណ្ឌពោធិ៍សែនជ័យ ដើម្បីចាត់ការតាមនីតិវិធីច្បាប់៕
ចែករំលែកព័តមាននេះ