ខេត្តបាត់ដំបង ៖ សមត្ថកិច្ចស្រុកសំឡូតបានរាយការណ៍មកថា មានបុរសអាយុ៥៥ឆ្នាំម្នាក់បានស្លាប់ដោយសារត្រូវអម្បែងក្បាលគ្រាប់កាំភ្លើងត្បាល់ធុន៨០មីល្លីម៉ែត្រ ដែលផ្ទុះឡើងក្នុងគ្រាដែលកសិកររូបនោះកាប់ព្រៃចំការហើយប៉ះចំក្បាលគ្រាប់ កាលពីវេលាម៉ោង១២និង៣០នាទីរសៀលថ្ងៃទី៦ មីនា នៅក្នុងចំការរបស់គាត់ដែលស្ថិតក្នុងភូមិវាលរលឹម ឃុំតាតោក ស្រុកសំឡូត ។
លោកអ៊ាម សេងអឿន មេបញ្ជាការមូលដ្ឋានកងរាជអាវុធហត្ថស្រុកសំឡូតបានប្រាប់កោះសន្តិភាពតាមទូរស័ព្ទថា ជនរងគ្រោះនោះឈ្មោះអោម គឹម ភេទប្រុស អាយុ៥៥ឆ្នាំ រស់នៅភូមិ-ឃុំខាងលើ ។ ជនរងគ្រោះបានស្លាប់នៅនឹងកន្លែងកើតហេតុ ក្រោយពីត្រូវរបួសដោយការផ្ទុះក្បាលគ្រាប់ធុន៨០មីល្លីម៉ែត្រ ដែលបានប៉ះទង្គិចជាមួយកាំបិត ខណៈពេលគាត់កំពុងកាប់ឆ្ការព្រៃ ។
តាមការបំភ្លឺពីសាក្សីនៅតំបន់នោះថា ក្បាលគ្រាប់កាំភ្លើងត្បាលធុន៨០មីល្លីម៉ែត្រដែលផ្ទុះនោះ ត្រូវបានគេកែច្នៃតខ្សែសម្រាប់ដើរទាក់ កាលពីសម័យសង្គ្រាមក្នុងទសវត្សឆ្នាំ៨០ ។ គ្រាប់នេះនៅសេសសល់រាយប៉ាយពេញព្រៃនៅតំបន់នោះ ប៉ុន្តែភាគច្រើនរបូតខ្សែចេញពីក្បាលគ្រាប់ លុះពេលមានវត្ថុអ្វីមួយទៅប៉ះទង្គិចវា ទើបអាចផ្ទុះបាន ។ ជាក់ស្តែងដូចជាការស្លាប់របស់កសិករឈ្មោះអោម គឹម គឺដោយសារតែគាត់កាប់ព្រៃចំការប៉ះចំលើក្បាលគ្រាប់នោះ ដែលនៅក្បែរគល់ឈើ សេសសល់ច្រើនឆ្នាំកន្លងមកហើយ ទើបបណ្តាលឱ្យក្បាលគ្រាប់នោះផ្ទុះគ្រោះថ្នាក់តែម្តង ។
លោកអ៊ាម សេងអឿន មេបញ្ជាការមូលដ្ឋានកងរាជអាវុធហត្ថស្រុកសំឡូតបានបញ្ជាក់ថា បច្ចុប្បន្ននៅតាមតំបន់ព្រៃភ្នំនានាក្នុងស្រុកសំឡូតនៅតែមានគ្រាប់មិនទាន់ផ្ទុះគ្រប់ប្រភេទរាយប៉ាយពេញព្រៃនៅឡើយ ដែលគ្រាប់ទាំងនេះគឺសេសសល់ពីសម័យសង្គ្រាមមក ប៉ុន្តែមានកន្លែងខ្លះក៏ត្រូវបានបោសសំអាតដោយអង្គការកំចាត់មីនកម្ពុជាផងដែរ ៕
ចែករំលែកព័តមាននេះ