សហរដ្ឋអាមេរិក ៖ អ្នកនាង ខាត់ សុឃីម បានសម្តែងការភ្ញាក់ផ្អើល និងរំភើបយ៉ាងខ្លាំង ក្នុងពេលដែលនាងបានជួបអតីតតារាសម្តែងដ៏ល្បីនាទសវត្សន៍ឆ្នាំ៩០ គឺអ្នកនាង អម្ពរ ទេវី ដែលបានស្កាត់ជួបគ្នាលើឆាកតន្ត្រីមួយនាទឹកដីអាមេរិក។
ក្នុងពេលដែលបានជួបគ្នាដោយចៃដន្យ និងមិននឹកស្មានដល់នោះ អ្នកនាង ខាត់ សុឃីម ក៏បានឆ្លៀតធ្វើរឿងមួយដាក់អ្នកនាង អម្ពរ ទេវី គឺការនិយាយរីករាយថ្ងៃកំណើតជូនចំពោះគ្រួសារអតីតតារាសម្តែងរូបនេះ និងដើម្បីសម្តែងការអបអរសាទរ ការរក្សាចំណងមិត្តភាពរវាងគ្នាទៅវិញទៅមកអស់រយៈពេលជាច្រើនឆ្នាំមកនេះ។
អ្នកនាង ខាត់ សុឃីម បានអះអាងប្រាប់កោះសន្តិភាពតាមសារអេឡិចត្រូនិចថា អ្នកនាង ពិតជារំភើប និងអរគុណយ៉ាងខ្លាំងចំពោះអ្នកនាង អម្ពរ ទេវី និងគ្រួសារដែលបានចូលរួមមើល និងគាំទ្រ ការសម្តែង ច្រៀងរាំរបស់នាងនៅទីក្រុងវ៉ាស៊ីនតោន សហរដ្ឋអាមេរិក កាលពីថ្ងៃទី២៤ ខែកញ្ញា ឆ្នាំ២០២២។
អ្នកនាងបញ្ជាក់ថា ក្នុងពេលបានជួបគ្នានោះ អ្នកនាងក៏បាននិយាយពាក្យសួស្តីថ្ងៃកំណើត និងច្រៀងចម្រៀងជូនចំពោះគ្រួសារគាត់ ខណៈពេលដែលនាងត្រឹមបានទាក់ទងអ្នកនាង អម្ពរ ទេវី តាមរយៈឆាតហ្វេសប៊ុកតែប៉ុណ្ណោះនាពេលកន្លងមក។
នាងថា អំឡុងពេលជួបគ្នានោះ នាងមិនបាននិយាយអ្វីច្រើនជាមួយអ្នកនាង អម្ពរ ទេវី ឡើយ ដោយត្រឹមតែសួរសុខទុក្ខគ្នាទៅវិញទៅមក ដោយសារយើងទាំងពីររវល់រៀងៗខ្លួន ប៉ុន្តែនាងពិតជារំភើប និងអរគុណខ្លាំងដល់អ្នកនាង អម្ពរ ទេវី និងគ្រួសារ ដែលបានអញ្ជើញមកចូលរួមគាំទ្រនាពេលនេះ។
ជាការកត់សម្គាល់ អ្នកនាង ខាត់ សុឃីម បានចាកចេញពីប្រទេសកម្ពុជា ឆ្ពោះទៅកាន់ទឹកដីអាមេរិកក្នុងដំណើរទៅលេងកំសាន្ត និងសួរសុខទុក្ខម្តាយ និងប្អូនស្រីដែលកំពុងតែរស់នៅទីនោះក្នុងរយៈពេលប្រមាណជាង២ខែ។ ក្នុងការស្នាក់នៅដើរលេងកំសាន្តនៅលើទឹកដីអាមេរិករយៈនាពេលនោះ ក្រៅពីជួបជុំគ្រួសារ អ្នកនាងក៏បានឆ្លៀតពេលចូលរួមច្រៀងរាំកំសាន្តអោយបងប្អូនខ្មែររស់នៅទីនោះ បានសប្បាយរីករាយនៅក្នុងបណ្តារដ្ឋមួយចំនួនផងដែរ។
អ្នកនាង ខាត់ សុឃីម បានវិលមកដល់ប្រទេសកម្ពុជាវិញ កាលពីថ្ងៃទី២៨ ខែកញ្ញា ឆ្នាំ២០២២ ដោយនៅក្នុងនោះនាង និងម្តាយក៏បានប្រញាប់ប្រញាល់ទៅសួរសុខទុក្ខប្អូនប្រុសលោក ខាត់ ចំរើន ដែលកំពុងសម្រាកព្យាបាលនៅមន្ទីរពេទ្យកាល់ម៉ែត ដោយសារជំងឺរលា.កថ្លើម៕
ចែករំលែកព័តមាននេះ