ADផ្ទាំងផ្សព្វផ្សាយពាណិជ្ជកម្ម

រយៈពេល៣ថ្ងៃនៃពិធីបុណ្យភ្ជុំបិណ្ឌ ភ្ញៀវទេសចរបានចាយលុយជាង៦,៥លានដុល្លារ

1 ឆ្នាំ មុន

បាត់ដំបង
២៩ ខែ កញ្ញា ឆ្នាំ ២០២២ ម៉ោង ១១:១៤

ខេត្តបាត់ដំបង ៖ មន្ទីរទេសចរខេត្តបានបង្ហាញរបាយការណ៍ក្រោយបញ្ចប់នៃពិធីបុណ្យភ្ជុំបិណ្ឌរយៈពេល០៣ថ្ងៃ អំពីការចំណាយថវិការបស់ភ្ញៀវទេសចរ ដែលបានធ្វើដំណើរមកកម្សាន្តនៅក្នុងទឹកដីខេត្តបាត់ដំបងបានឲ្យដឹងថា «រយៈពេល០៣ថ្ងៃនៃដំណើរកម្សាន្តក្នុងឱកាសបុណ្យភ្ជុំបិណ្ឌ ភ្ញៀវទេសចរបានចាយប្រាក់ជាង៦,៥លានដុល្លារទៅលើសេវាកម្មនានានៅក្នុងខេត្តបាត់ដំបង ខណៈក្រសួងសាមីប្រកាសថា ខេត្តវ័យចំណាស់មួយនេះ ជាប់លំដាប់ថ្នាក់លេខ១…

ប្រធានមន្ទីរទេសចរណ៍ខេត្ត លោក អ៊ុច អ៊ុំភីនីស្សារ៉ា បានឲ្យដឹងថា ក្នុងដំណើរកម្សាន្តនៃពិធីបុណ្យភ្ជុំបិណ្ឌរយៈពេល០៣ថ្ងៃ (២៤ដល់២៦.៩.២២) ខេត្តបាត់ដំបង ទទូលបានចំណូលពីការចាយវាយរបស់ភ្ញៀវជាតិនិងអន្តរជាតិ បានចំនួនជាង៦៥លានដុល្លារ ។ បើតាមការគណនាបឋមអំពីខ្ទង់ចំណាយរបស់ភ្ញៀវទេសចរ លោក ភីនីស្សារ៉ា បានបញ្ជាក់ថា សម្រាប់ភ្ញៀវជាតិម្នាក់អាចចំណាយប្រាក់ចន្លោះពី៣០ ទៅ៣៧ដុល្លារក្នុងមួយថ្ងៃ ។ ដោយឡែកចំពោះភ្ញៀវអន្តរជាតិវិញ មន្ត្រីជំនាញនៃមន្ទីរទេសចរបានគណនាថា ពួកគេអាចចំណាយប្រាក់ចន្លោះពី៤៥ ទៅ៧០ដុល្លារក្នុងមួយថ្ងៃ។

មូលហេតុដែលខ្ទង់ចំណាយមិនស្មើគ្នានេះ ដោយសារតែភ្ញៀវជាង៧០% បានស្នាក់នៅចំណាយច្រើន រីឯភ្ញៀវចំនួនជាង២០% ជាភ្ញៀវវិលល្ងាចទើបពួកគេត្រូវចំណាយតិច ។ ក្នុងឱកាសនៃពីធិបុណ្យភ្ជុំបិណ្ឌរយៈពេល០៣ថ្ងៃ ចាប់ពីថ្ងៃទី២៤ ដល់២៦ កញ្ញា ឆ្នាំ២០២២ ខេត្តបាត់ដំបងបានស្វាគមន៍ភ្ញៀវទេសចរជាតិ និងអន្តរជាតិចំនួនជាង២១ម៉ឺននាក់ ក្នុងចំណោមនេះ មានភ្ញៀវអន្តរជាតិចំនួន៣៥៨នាក់ ។ នេះបើយោងលើរបាយការណ៍របស់មន្ទីរទេសចរខេត្ត ដែលបានរាយការណ៍ជូនថ្នាក់ដឹកនាំ ដែលធ្វើឲ្យខេត្តបុរាណមួយនេះជាប់លំដាប់ថ្នាក់លេខ១ នៃកំណើនភ្ញៀវទេសចរក្នុងឱកាសបុណ្យភ្ជុំបិណ្ឌ បើប្រៀបធៀបទៅនឹងបណ្ដាខេត្តផ្សេង នៃព្រះរាជាណាចក្រកម្ពុជា ។

ខេត្តបាត់ដំបងត្រូវគេចាត់ទុកថា ជាខេត្តដែលមានសក្តានុពលបំផុតលើវិស័យកសិកម្ម និងវិស័យទេសចរណ៍ ។ ហើយក៏ជាខេត្តដែលមានវ័យចំណាស់បំផុតមួយ ក្នុងចំណោម២៤ខេត្ត-រាជធានីនៃព្រះរាជាណាចក្រកម្ពុជា ។ ខេត្តនេះ មានគោលដៅទេសចរណ៍ជាច្រើនកន្លែង សម្រាប់ស្វាគមន៍ភ្ញៀវទេសចរជាតិ និងអន្តរជាតិធ្វើដំណើរមកទស្សនាកម្សាន្ត។ រមណីយដ្ឋានធម្មជាតិនៅតាមតំបន់ព្រៃភ្នំ មានទឹកធ្លាក់ ទឹកជ្រោះ និងដំណាំកសិកម្ម។ ដោយឡែក រមណីយដ្ឋានប្រវត្តិសាស្ត្រ មានប្រាសាទបុរាណ ល្អាងភ្នំ ដែលភ្ញៀវនិយមធ្វើដំណើរទៅកម្សាន្តបំផុត ៕