World Cup 2022 ៖ ដាណឺម៉ាកនឹងពាក់ឈុតរចនាជាពិសេស ប្រឆាំងនឹងម្ចាស់ផ្ទះកាតា
ដាណឺម៉ាក ៖ ក្រុមជម្រើសដាណឺម៉ាកនឹងពាក់អាវរចនាឡើងយ៉ាងពិសេស សម្រាប់ការប្រកួតព្រឹត្តិ
ដាណឺម៉ាក ៖ ក្រុមជម្រើសដាណឺម៉ាកនឹងពាក់អាវរចនាឡើងយ៉ាងពិសេស សម្រាប់ការប្រកួតព្រឹត្តិការណ៍បាល់ទាត់ពិភពលោក World Cup ឆ្នាំ ២០២២ ដើម្បីតវ៉ាប្រឆាំងនឹងកំណត់ត្រារំលោភសិទ្ធិមនុស្សរបស់ម្ចាស់ផ្ទះកាតា រួមនិងការកេងប្រវ័ញ្ចលើពលករចំណាកស្រុកផងដែរ។
ក្រុមហ៊ុនផលិតសម្លៀកបំពាក់កីឡា Hummel ដែលជាអ្នករ៉ាប់រងលើការរចនាឯកសណ្ឋានក្រុមជម្រើសជាតិដាណឺម៉ាកក៏បានរចនាឈុតទី៣ ដែលមានពណ៌ខ្មៅទាំងអស់ ដើម្បីតំណាងឱ្យពណ៌នៃការកាន់ទុក្ខ។ ដោយក្រុមហ៊ុនរបស់ដាណឺម៉ាកមួយនេះ បានប្រកានជំហរថា «យើងគាំទ្រក្រុមជម្រើសជាតិដាណឺម៉ាក ប៉ុន្តែវាមិនដូចគ្នាទៅនឹងការគាំទ្រកាតាក្នុងនាមជាប្រទេសម្ចាស់ផ្ទះនោះទេ»។
ឯកសណ្ឋានក្នុងដីរបស់ដាណឺម៉ាកនឹងមានពណ៌ក្រហមសុទ្ធ ចំណែកឈុតទី២ នឹងមានពណ៌ស។
ដោយឡែកអ្នកឧបត្ថម្ភឧបករណ៍ហ្វឹកហ្វឺនរបស់ដាណឺម៉ាក បានសម្រេចថានឹងដកស្លាកសញ្ញារបស់ពួកគេ ដើម្បីផ្តល់កន្លែងសម្រាប់សាររិះគន់ម្ចាស់ផ្ទះកាតា។
ប្រទេសកាតាទទួលបានការរិះគន់ និងការតវ៉ាប្រឆាំងយ៉ាងច្រើនពីសំណាក់មហាជន និងបុគ្គលល្បីល្បាញជាច្រើននៅក្នុងវិស័យបាល់ទាត់ ចំពោះការរំលោភបំពានសិទ្ធមនុស្ស ច្បាប់ប្រឆាំងអ្នកស្រឡាញ់ភេទដូចគ្នាយ៉ាងតឹងរ៉ឹងបំផុត (LGBT) ជាពិសេសការកេងប្រវ័ញ្ចកម្លាំងពលកម្មលើកម្មករចំណាកស្រុក ដែលបានសាងសង់ហេដ្ឋារចនាសម្ព័ន្ធ និងកីឡដ្ឋានត្រៀមសម្រាប់ការប្រកួត World Cup ឆ្នាំ ២០២២ ដែលនឹងចាប់ដំណើរការនាថ្ងៃទី២០ ខែវិច្ឆិកា រហូតដល់ថ្ងៃទី១៨ ខែធ្នូ រហូតលេចចេញរបាយការណ៍នៃការស្លាប់កម្មករជាច្រើនផងដែរ។ ប៉ុន្តែកាតា បានចេញបដិសេធតួលេខសរុបពិតប្រាកដកាលពីឆ្នាំ២០២១ ដែលមានកម្មករស្លាប់រហូតដល់ ៣៧នាក់។
មិនត្រឹមតែដាណឺម៉ាកប៉ុណ្ណោះទេ ដែលប្រឆាំងនឹងទង្វើម្ចាស់ផ្ទះកាតា។ ជាក់ស្តែងខ្សែប្រយុទ្ធឆ្នើម Harry Kane ប្រធានក្រុមជម្រើសជាតិអង់គ្លេសគ្រោងនឹងពាក់ស្លាកប្រធានក្រុមមានពាក្យ «OneLove» អំឡុងការប្រកួត World Cup ជាផ្នែកនៃយុទ្ធនាការដែលបានចាប់ផ្តើមដំបូងដោយប្រទេសហូឡង់ ដើម្បីលើកកម្ពស់ភាពចម្រុះ ការរួមបញ្ចូលគ្នា និងការឈររួមគ្នាប្រឆាំងនឹងការរើសអើង។ ហើយបែលហ្ស៊ិក បារាំង អាល្លឺម៉ង់ ន័រវេស ស៊ុយអែត វេលស៍ និងស្វីស ក៏កំពុងគាំទ្រគំនិតផ្តួចផ្តើមនេះផងដែរ៕ (ប្រភពពី BBC)
ចែករំលែកព័តមាននេះ