ព្យុះទីហ្វុង Noru កំពុងវា.យប្រហារវៀតណាម បណ្តាលឱ្យភ្លៀងធ្លាក់ខ្លាំង និងខ្យល់ខ្លាំង
វៀតណាម ៖ ព្យុះទីហ្វុង Noru បានបោកបក់ចូលឆ្នេរសមុទ្រភាគកណ្តាលរបស់វៀតណាមនៅព្រឹកថ្ងៃ
វៀតណាម ៖ ព្យុះទីហ្វុង Noru បានបោកបក់ចូលឆ្នេរសមុទ្រភាគកណ្តាលរបស់វៀតណាមនៅព្រឹកថ្ងៃពុធ ទី ២៨ កញ្ញនេះ ដោយនាំមកនូវភ្លៀង និងខ្យល់ខ្លាំង ខណៈមនុស្សរាប់សែននាក់កំពុងស្ថិតនៅក្នុងទីជម្រកសុវត្ថិភាព។
នៅក្នុង Danang ដែលជាទីក្រុងធំបំផុតទី ៣របស់វៀតណាម អគារខ្ពស់បានអន្រួនដោយសារខ្យល់ដ៏ខ្លាំង ខណៈដើមឈើបានដួលរលំ និងផ្ទះរាប់សិបខ្នងបានរហែកដំបូលនៅទូទាំងតំបន់ភាគកណ្តាល។ មានសេចក្តីរាយការណ៍ពីការដាច់ចរន្តអគ្គិសនីទ្រង់ទ្រាយធំផងដែរ។
មនុស្សជាង ២០០.០០០នាក់នៅក្នុងប្រទេសវៀតណាមបានជ្រកកោនកន្លែងមានសុវត្ថិភាពនៅពេលយប់ ក្រោយពេលអ្នកព្យាករណ៍បានព្យាករណ៍ថានឹងមានព្យុះដ៏ធំបំផុតមួយនឹងវា.យប្រហារវៀតណាម។
ល្បឿនខ្យល់យឺតជាងការទស្សន៍ទាញដំបូង ប៉ុន្តែការព្យាករណ៍និយាយថា ភ្លៀងខ្លាំងនឹងបន្តរហូតដល់ពេលថ្ងៃ និងបានព្រមានពីគ្រោះរអិលបាក់ដី និងគ្រោះទឹកជំនន់ធ្ងន់ធ្ងរ។
ក្រសួងការពារជាតិវៀតណាមបានចល័តទាហានប្រហែល ៤០.០០០នាក់ និងសមាជិកកងជីវពល ២០០.០០០នាក់ ដែលមានរថពាសដែល និងទូក ដើម្បីត្រៀមសម្រាប់ប្រតិបត្តិការជួយសង្គ្រោះ។
ព្រលានយន្តហោះវៀតណាមស្ទើរតែពាក់កណ្តាលត្រូវបានបិទ។ សាលារៀន និងការិយាល័យទូទាំងខេត្តភាគកណ្តាល រួមមាន Danang ត្រូវបានបិទ ហើយប្រជាជនបានប្រញាប់ប្រញាល់ទៅផ្ទះរបស់ពួកគេតាំងពីថ្ងៃអង្គារ។
ផ្លូវហាយវេ ដែលភ្ជាប់ពីទីក្រុង Hanoi ទៅកាន់ Ho Chi Minh ក៏ត្រូវបានបិទផងដែរ។
សូមបញ្ជាក់ថា មុនពេលធ្វើដំណើរមកដល់វៀតណាម ព្យុះទីហ្វុង Noru បានវា.យប្រហារហ្វីលីពីនកាលពីដើមសប្តាហ៍នេះបណ្តាលឱ្យមនុស្សចំនួន ៦នាក់បាត់បង់ជីវិត៕ (យោងតាមប្រភព៖ AFP)
ចែករំលែកព័តមាននេះ