ចៅក្រមស៊ើបសួរសាលាដំបូងរាជធានីភ្នំពេញ កាលល្ងាចថ្ងៃទី២៧ ខែកញ្ញា ឆ្នាំ២០២២ បានចេញដីកាសម្រេចឃុំខ្លួន អ្នករកស៊ីទទួលបញ្ចាំម៉ូតូនៅម្តុំឃ្លាំងរំសេវចំនួន៩នាក់ ដាក់ពន្ធនាគារជាបណ្ដោះអាសន្ន ក្រោមការចោទប្រកាន់ពីបទ
រាជធានីភ្នំពេញ ៖ ចៅក្រមស៊ើបសួរសាលាដំបូងរាជធានីភ្នំពេញ កាលល្ងាចថ្ងៃទី២៧ ខែកញ្ញា ឆ្នាំ២០២២ បានចេញដីកាសម្រេចឃុំខ្លួន អ្នករកស៊ីទទួលបញ្ចាំម៉ូតូនៅម្តុំឃ្លាំងរំសេវចំនួន៩នាក់ ដាក់ពន្ធនាគារជាបណ្ដោះអាសន្ន ក្រោមការចោទប្រកាន់ពីបទ «ទទួលផលចោ.រកម្ម» ហើយក្នុងចំណោមជនជាប់សង្ស័យទាំង៩នាក់នោះ គឺមានស្ត្រីម្នាក់កំពុងបែកបាក់ប្តីប្រពន្ធ ដោយបន្សល់ទុកកូន៣នាក់ឈឺ ដោយខ្លះដេកនៅផ្ទះ និងខ្លះទៀតកំពុងដេកមន្ទីរពេទ្យ ។
ជនសង្ស័យទាំង៩នាក់ខាងលើនោះ រួមមាន ៖ ១- ឈ្មោះ លី វ៉ានឆៃ ភេទប្រុស អាយុ២៦ឆ្នាំ មុខរបរកម្មកររុញម៉ូតូនៅហាងបញ្ចាំ ពន្លឺខ្សាច់មាស ។ ២- ឈ្មោះ ធន់ ធី ភេទប្រុស អាយុ២៦ឆ្នាំ មុខរបរបុគ្គលិក។ ៣- ឈ្មោះ ស៊ុន ហាច ភេទប្រុស អាយុ៥៨ឆ្នាំ មុខរបរទិញ-លក់ម៉ូតូ។ ៤- ឈ្មោះ ស៊ឹម សុខា ភេទប្រុស អាយុ២២ឆ្នាំ មុខរបរបុគ្គលិក។ ៥- ឈ្មោះ ប៉េង ឡេង ភេទប្រុស អាយុ៤០ឆ្នាំ មុខរបរបុគ្គលិក។ ៦- ឈ្មោះ រឿង សុវណ្ណរ៉េត ភេទប្រុស អាយុ២២ឆ្នាំ មុខរបរអ្នកយាមឃ្លាំង។ ៧- ឈ្មោះ ប៊ុន សុខលីម ភេទស្រី អាយុ៤២ឆ្នាំ អ្នកបោសសម្អាត និងមើលផ្ទះ។ ៨- ឈ្មោះ និត នឿន ភេទប្រុស អាយុ៤១ឆ្នាំ មុខរបរបុគ្គលិក និង៩- ឈ្មោះ មួង សុណា ហៅ ស្រីមុំ ភេទស្រី អាយុ៣៩ឆ្នាំ មុខរបរលក់ដូរ។
សូមជម្រាបថា កាលពីរសៀលថ្ងៃទី២២ ខែកញ្ញា ឆ្នាំ២០២២ កម្លាំងខណៈបញ្ជាការឯកភាពខណ្ឌទួលគោក រាជធានីភ្នំពេញ បានចុះធ្វើការត្រួតពិនិត្យឃ្លាំង និងកន្លែងទទួលបញ្ចាំយានយន្តគ្រប់ប្រភេទ នៅម្តុំឃ្លាំងរំសេវ ស្ថិតក្នុងសង្កាត់ទឹកល្អក់៣ ខណ្ឌទួលគោ ជាលទ្ធផលសមត្ថកិច្ចបានដកហូតម៉ូតូចំនួន៣០គ្រឿងពីផ្ទះរបស់ឈ្មោះ មួង សុណា ដែលពុំមានឯកសារគ្រប់គ្រាន់ទេ។ ក្នុងចំណោមម៉ូតូទាំង៣០គ្រឿងនោះ គឺមានម៉ូតូឌ្រីម១២៥ ពណ៌ខ្មៅមួយគ្រឿង ត្រូវបានគេយកទៅបញ្ចាំ ដែលម្ចាស់ឈ្មោះ ធិន ស្រីយឿន អាយុ៤០ឆ្នាំ ហើយម្ចាស់បានបង់ការប្រាក់ចំនួន៧០ដុល្លារអាមេរិកមួយខែ។ ស្រាប់តែនៅថ្ងៃសមត្ថកិច្ចចុះត្រួតពិនិត្យឃ្លាំងបញ្ចាំទាំងអស់នោះ ឈ្មោះ ធិន ស្រីយឿន បានទៅដាក់ពាក្យប្ដឹងថា មានគេដាក់ថ្នាំសណ្ដំកូនប្រុសគាត់ឲ្យយកម៉ូតូនោះទៅបញ្ចាំទៅវិញ ជាហេតុធ្វើឲ្យសមត្ថកិច្ចឃាត់ខ្លួនស្ត្រីឈ្មោះ មួង សុណា ក្រោមការចោទប្រកាន់ពីបទ.ទទួលផលចោ.រកម្ម។
ក្រោយពីឃាត់ខ្លួនស្ត្រីឈ្មោះ មួង សុណា ហៅស្រីមុំ និងមនុស្សចំនួន៨នាក់ទៀត សមត្ថកិច្ចក៏បានកសាងសំណុំរឿងបញ្ជូនពួកគេទៅកាន់សាលាដំបូងរាជធានីភ្នំពេញ ដើម្បីឲ្យស្ថាប័នអយ្យការបើកការស៊ើបសួរ និងចោទប្រកាន់ជនសង្ស័យជាផ្លូវការ រួចចាត់បញ្ជូនទៅចៅក្រមស៊ើបសួរសម្រេចឃុំខ្លួនដាក់ពន្ធនាគារជាបណ្តោះអាសន្ន ដោយរង់ចាំបើកសវនាការជំនុំជម្រះទោសលើអង្គសេចក្តី ។
ប៉ុន្តែអ្វីដែលបន្សល់ទុកនៅពីក្រោយនៃការឃុំខ្លួនជនសង្ស័យទាំង៩នាក់នោះ មានស្ត្រីម្នាក់ឈ្មោះ មួង សុណា ហៅស្រីមុំ ស្នាក់នៅផ្ទះលេខ៤A ស្ថិតក្នុងភូមិ៣ ផ្លូវលេខ១៨៦ សង្កាត់ទឹកល្អក់៣ ខណ្ឌទួលគោក រាជធានីភ្នំពេញ ជាស្ត្រីដែលរងនូវវិបត្តិដ៏ធ្ងន់ធ្ងរជាងគេ គឺកំពុងជួបការបែកបាក់ប្តីប្រពន្ធ និងត្រូវទទួលបន្ទុកក្នុងរង្វង់គ្រួសារមានកូនតូចៗចំនួន២នាក់កំពុងមានជំងឺធ្ងន់ធ្ងរដេកនៅមន្ទីរពេទ្យ ដោយកូនប្រុសឈ្មោះ ហ៊ាង រតនៈ អាយុ៨ឆ្នាំ មានករខ្ទុះនៅក្នុងក្បាលផ្នែកខាងមុខ ហើយត្រូវការវះកាត់បន្ទាន់ និងកូនស្រីតូចអាយុ១ឆ្នាំ មានជំងឺគ្រុនឈា.មកំពុងព្យាបាលបន្ទាន់ និងកូនម្នាក់ទៀតត្រូវការថែទាំដោយជីដូនចាស់ជរា។
ករណីខាងលើនេះដែរ សាច់ញាតិ និងអ្នករស់នៅក្បែរខាងជនសង្ស័យស្ត្រីឈ្មោះ មួង សុណា ហៅស្រីមុំ បានលើកដៃសំពះអង្វករដល់គណៈបញ្ជាការឯកភាពខណ្ឌទួលគោក ក៏ដូចជាគណៈបញ្ជាការឯកភាពរាជធានីភ្នំពេញ និងស្ថាប័នតុលាការ ជាពិសេសសម្ដេចនាយករដ្ឋមន្ត្រី ហ៊ុន សែន និងសម្ដេចគតិព្រឹទ្ធបណ្ឌិត ប៊ុន រ៉ានី ហ៊ុន សែន មេត្តាសុំការសណ្ដោសប្រណីដោះលែងជនសង្ស័យឈ្មោះ មួង សុណា ហៅស្រីមុំ ឲ្យនៅក្រៅឃុំជាបណ្ដោះអាសន្នវិញ ដើម្បីបានមើលថែទាំកូនតូចៗ ដែលកំពុងមានជំងឺត្រូវការសង្គ្រោះបន្ទាន់ ដោយខ្លះដេកផ្ទះ និងខ្លះទៀតដេកនៅមន្ទីរពេទ្យ៕
ចែករំលែកព័តមាននេះ