បុរសម្នាក់បានបើករថយន្តជ្រុលធ្លាក់ទឹកក្នុង «អាងកំពីងពួយ» ទាំងកណ្ដាលយប់ ដោយពុំមានអ្នកណាម្នាក់ដឹង បណ្ដាលឲ្យស្លា.ប់នៅក្នុងរថយន្តយ៉ាងអាណោចអធ័ម កាលពី
ខេត្តបាត់ដំបង ៖ បុរសម្នាក់បានបើករថយន្តជ្រុលធ្លាក់ទឹកក្នុង «អាងកំពីងពួយ» ទាំងកណ្ដាលយប់ ដោយពុំមានអ្នកណាម្នាក់ដឹង បណ្ដាលឲ្យស្លា.ប់នៅក្នុងរថយន្តយ៉ាងអាណោចអធ័ម កាលពីវេលាម៉ោង១០យប់ ថ្ងៃទី២៦ ខែកញ្ញា ឆ្នាំ២០២២ នៅចំណុចភូមិតាង៉ែន ឃុំតាគ្រាម ស្រុកបាណន់ ដែលគេសង្ស័យថា ជនរងគ្រោះទំនងស្ថិតក្នុងស្ថានភាពស្រវឹងផង។
លោកអធិការស្រុកបាណន់ បានឲ្យដឹងថា ជនរងគ្រោះខាងលើមានឈ្មោះ ហេង បណ្ឌិត ភេទប្រុស អាយុ២៨ឆ្នាំ រស់នៅភូមិចំការឬស្សី សង្កាត់ព្រែកព្រះស្ដេច ក្រុងបាត់ដំបង។ ហើយជនរងគ្រោះបានបើករថយន្តម៉ាក ISUZU. DMAX ពណ៌ស ពាក់ស្លាកលេខ បាត់ដំបង 2G-9989។
លោកអធិការបានបញ្ជាក់ថា ជនរងគ្រោះបានបើករថយន្តម្នាក់ឯង ដែលទំនងស្ថិតក្នុងស្ថានភាពស្រវឹងផង បានជ្រុលធ្លាក់ទឹកអាងកំពីងពួយ នៅពេលព្យាយាមបើកឡើងលើទំនងអាងកំពីងពួយ។ លោកថា គ្មាននរណាម្នាក់បានដឹងហេតុការណ៍នេះភ្លាមៗទេ លុះនៅព្រឹកថ្ងៃទី ២៧ ខែកញ្ញា ទើបមានអ្នកដឹង ហើយមានការភ្ញាក់ផ្អើល ដោយសារឃើញតួរថយន្តលិចនៅក្នុងទឹកសល់តែដំបូលតែប៉ុណ្ណោះ។
បើតាមអ្នកឃើញហេតុការណ៍ដំបូង បាននិយាយថា អ្នកដំណើរបានប្រទះឃើញដំបូលរថយន្តនៅក្នុងទឹកអាងកំពីងពួយ ដែលនាំឲ្យមានចម្ងល់គ្រប់ៗគ្នា ហើយមនុស្សជាច្រើនបានចោមរោមមើលរថយន្តធ្លាក់ទឹកនោះ ដោយអ្នកខ្លះបានចុះហែលទឹកទៅមើលរថយន្តនោះ ដើម្បីចង់ដឹងមានមនុស្សនៅក្នុងរថយន្តនោះឬអត់0x017d7 ប៉ុន្តែពេលទាញទ្វារបើកមិនរួច ទើបមានការសង្ស័យថា នឹងអាចមានមនុស្សស្លា.ប់នៅក្នុងរថយន្តជាក់ជាមិនខាន តែស្របពេលនោះ គេក៏បានរាយការណ៍ប្រាប់សមត្ថកិច្ចភ្លាមៗដែរ។
ពាក់ព័ន្ធនឹងហេតុការណ៍ខាងលើនេះ បើតាមប្រភពខ្លះបាននិយាយថា នៅមុនពេលកើតហេតុ ជនរងគ្រោះ និងគូកនប៉ុន្មាននាក់ទៀត បានផឹកស៊ីជុំគ្នានៅម្ដុំដីចំការមួយកន្លែងខាងកើតអាងកំពីងពួយ (ខាងកើតកន្លែងកើតហេតុ)។
ប្រភពដដែលបានឲ្យដឹងទៀតថា លុះយប់ជ្រៅបន្តិច ពួកគេក៏បានបែកគ្នាចេញដំណើរទៅផ្ទះរៀងៗខ្លួន។ ដោយជនរងគ្រោះបានបើករថយន្តម្នាក់ឯងចេញពីកន្លែងផឹកស៊ីនោះ ហើយក៏បានព្យាយាមបើកឡើងលើទំនប់អាងកំពីងពួយ ដើម្បីត្រឡប់ទៅផ្ទះ តែបានជ្រុលចង្កូតហួសទៅធ្លាក់ទឹកអាងទាំងកណ្ដាលយប់ ដោយពុំមានអ្នកដឹងឡើយ លុះព្រឹកឡើងទើបមានអ្នកដឹងផ្អើលឆោឡោ ដោយសារឃើញដំបូលរថយន្តពណ៌សប៉ប្រះទឹក។
លោក ប៉ាន់ វ៉ាន់នី អធិការស្រុកបាណន់ ក៏បានអះអាងស្រដៀងគ្នាទៅនឹងការលើកឡើងរបស់អ្នកឃើញហេតុការណ៍ខាងលើនេះដែរ។ លោកអធិការ បានប្រាប់ថា ជនរងគ្រោះបានផឹកស៊ីជុំគ្នាជាមួយមិត្តភក្ដិនៅម្ដុំស្រែថ្មីខាងកើតកន្លែងកើតហេតុនោះមែន មុនពេលជួបគ្រោះថ្នាក់។ លោកថា ជនរងគ្រោះអាចស្រវឹងស្រាផង ពេលបើករថយន្តចេញពីកន្លែងផឹកស៊ី លុះពេលព្យាយាមបើកឡើងលើទំនប់អាងកំពីងពួយ ក៏ជ្រុលហូសផ្លូវទៅធ្លាក់ទឹកតែម្ដង។
បើតាមការពិនិត្យមើលស្ថានភាព នៃការស្លា.ប់នៅក្នុងរថយន្ត ជនរងគ្រោះទំនងបានព្យាយាមបើកទ្វាររថយន្ត ដើម្បីចេញក្រៅ តែទ្វាររថយន្តជាប់ឡុកទាំងអស់ ទើបជនរងគ្រោះថប់ខ្យល់ស្លា.ប់យ៉ាងអាណោចអធ័មនៅក្នុងរថយន្តតែម្ដង។
លោក ប៉ាន់ វ៉ាន់នី បានបញ្ជាក់ថា សមត្ថកិច្ច និងក្រុមគ្រួសារជនរងគ្រោះ បានអូសរថយន្តឡើងពីក្នុងទឹក និងបានប្រគល់សាកស.ពជនរងគ្រោះឲ្យទៅក្រុមគ្រួសារយកទៅធ្វើបុណ្យតាមប្រពៃណីហើយ ក្រោយមន្ត្រីបច្ចេកទេសបញ្ចប់ការត្រួតពិនិត្យ៕
ចែករំលែកព័តមាននេះ