ខេត្តប៉ៃលិន ៖ នៅព្រឹកថ្ងៃទី២៧ ខែកញ្ញា ឆ្នាំ២០២២នេះ គេសង្កេតឃើញភ្ញៀវទេសចរ ដែលរស់នៅតាមបណ្តាខេត្តនានា ក្រោយពីបានចូលមកលេងកម្សាន្តក្នុងរមណីយដ្ឋាន ក្នុងខេត្តប៉ៃលិន នាឱកាសបុណ្យភ្ជុំបិណ្ឌនេះ លុះមុនពេលធ្វើដំណើរត្រឡប់ទៅស្រុកកំណើតរៀងៗ ខ្លួនវិញ ម្នាក់ៗបានកាន់យក ធូប ទៀន អ្នកខ្លះមានគ្រឿងសំណែន លាមាត់លា.ក និងសុំសេចក្តីសុខពីលោកយាយយ៉ាត។
បើតាមប្រភពព័ត៌មានពីភ្ញៀវទេសចរដែលមានឈ្មោះ សំបូរ ភេទប្រុស អាយុ៤៥ឆ្នាំ រស់នៅខេត្តបាត់ដំបង និងឈ្មោះ សេង គន្ធា ភេទស្រី អាយុ៣៨ឆ្នាំ រស់នៅរាជធានីភ្នំពេញ បានរៀបរាប់ឱ្យភ្នាក់ងារយើងដឹងថា ពួកគាត់ទាំងអស់គ្នាបាននាំក្រុមគ្រួសារមកលេងកម្សាន្តសប្បាយ នាឱកាសបុណ្យភ្ជុំបិណ្ឌនេះ អស់រយៈពេល២ទៅ៣ថ្ងៃហើយ ដោយបានជួលបន្ទប់ផ្ទះសំណាក់ និងសណ្ឋាគារស្នាក់នៅ ដើម្បីដើរលេងកម្សាន្តតាមរមណីយដ្ឋាននានាក្នុងខេត្តប៉ៃលិន ដូចជារមណីយដ្ឋានចំការខ្នុរ រមណីយដ្ឋានម្លប់សាវម៉ាវ និងរមណីយដ្ឋានទឹកធ្លាក់ភ្នំខៀវជាដើម។
ប្រភពដដែលបន្តទៀតថា ក្នុងឱកាសបុណ្យភ្ជុំបិណ្ឌនេះ គ្រប់កន្លែងកម្សាន្តទាំងអស់ មានភ្ញៀវដើរលេងយ៉ាងច្រើនកុះករ ដែលធ្វើឱ្យពួកគាត់ម្នាក់ៗមានអារម្មណ៍ស្រស់ថ្លា បំបាត់នូវទុក្ខកង្វល់ ធ្វើឱ្យស្គាល់កន្លែងដើរលេងថ្មីៗបន្ថែមទៀត ខណៈពីមុនមិនធ្លាប់ចូលមកលេងក្នុងខេត្តប៉ៃលិននេះឡើយ គឺដើរលេងតែខេត្តដែលមានទឹកសមុទ្រប៉ុណ្ណោះ។
ទោះបីជាយ៉ាងណា បន្ទាប់ពីនាំបងប្អូនកូនក្មួយដើរលេងកម្សាន្តក្នុងខេត្តប៉ៃលិនរួចរាល់ ដល់ថ្ងៃចុងបញ្ចប់ មុននឹងត្រឡប់ទៅស្រុកកំណើតវិញ គឺនាំគ្នាទិញផ្លែឈើ នំចំណី ធូបទៀន ព្រមទាំងគ្រឿងសំណែនយកទៅថ្វាយលោកយាយយ៉ាត ដើម្បីលាមាត់លា.ក ដែលបានបន់ស្រន់កាលពីមុន ព្រមទាំងសុំសេចក្តីសុខសប្បាយ ខណៈពេលដែលធ្វើដំណើរតាមដងផ្លូវ កុំឱ្យមានករណីគ្រោះថ្នាក់អ្វីកើតឡើងតាមដងផ្លូវនោះឡើយ។
លើសពីនេះ ក៏បួងសួងសូមឱ្យលោកយាយយ៉ាតជួយផ្តល់ពរជ័យ សិរីសួស្តី ក្នុងការប្រកបមុខរបររកទទួលទានឱ្យកាក់កប មានសុខភាពល្អ កម្លាំងមាំមួន ប្រាជ្ញាឈ្លាសវៃ ឈ្នះអស់មាសត្រូវមកយាយីនោះឡើយ។
ចំណែកភ្ញៀវទេសចរខ្លះទៀត ក៏បានឱ្យដឹងដែរថា ក្រោយពីបន់ស្រន់បួងសួងរួច លោកយាយយ៉ាត ពិតជាបានជួយឱ្យពួកគាត់ទទួលបាននូវអ្វីដែលប៉ងប្រាថ្នាមែន ដោយមានការលក់ដូរទំនិញតូចធំដាច់អស់ ជាពិសេសពេលកើតមានវិបត្តិក្នុងក្រុមគ្រួសារ និងជួបប្រឈមឧបសគ្គការងារ គឺលោកយាយបានជួយដោះស្រាយបញ្ហាទាំងអស់នោះមែន។ ដូច្នេះហើយ ទើបពួកគាត់នាំប្តីប្រពន្ធកូនទិញគ្រឿងបូជា និងដង្វាយយកទៅថ្វាយលោកយាយ ដើម្បីលាបំណន់ កុំឱ្យខុសពាក្យសម្តីនោះឡើយ។
សូមបញ្ជាក់ថា អ្នកខ្លះហ៊ានជួលក្រុមភ្លេងប្រពៃណី យកទៅលេងថ្វាយរូបសំណាកលោកយា យយ៉ាត ដោយសារតែទទួលបានជោគជ័យក្នុងការដោះស្រាយបញ្ហា ដែលជាប់គាំងស្ទះកាលពីកន្លងមក៕
ចែករំលែកព័តមាននេះ