លោក ឡុង ឌីម៉ង់ អភិបាលរងខេត្តព្រះសីហនុ បានចេញប្រតិកម្មចំៗទៅលើអ្នករិះគន់មួយចំនួន ដែលបានបង្ហោះចែកចាយយ៉ាងព្រោងព្រាតនូវរូបភាពហ្វូងសត្វពាហនៈដើរលើកំណាត់ផ្លូវល្បឿនលឿន ហើយថែមទាំង
ខេត្តព្រះសីហនុ ៖ លោក ឡុង ឌីម៉ង់ អភិបាលរងខេត្តព្រះសីហនុ បានចេញប្រតិកម្មចំៗទៅលើអ្នករិះគន់មួយចំនួន ដែលបានបង្ហោះចែកចាយយ៉ាងព្រោងព្រាតនូវរូបភាពហ្វូងសត្វពាហនៈដើរលើកំណាត់ផ្លូវល្បឿនលឿន ហើយថែមទាំងធ្វើអត្ថាធិប្បាយបន្តុះបង្អាប់ យ៉ាងចុកចាប់ដល់អ្នកទទួលខុសត្រូវការដ្ឋានសាងសង់ផ្លូវទៅវិញ ទាំងដែលផ្លូវល្បឿនលឿនមិនទាន់បានបើកឱ្យដំណើរការក្តី។
ប្រតិកម្មរបស់លោក ឡុង ឌីម៉ង់ ធ្វើឡើង ក្រោយពីមានបងប្អូនអ្នកប្រើប្រាស់បណ្តាញសង្គមហ្វេសប៊ុកមួយចំនួនបានបង្ហោះរូបភាពប៉ុន្មានសន្លឹកបង្ហាញពីហ្វូងគោ និងក្របី ដើរលើកំណាត់ផ្លូវល្បឿនលឿន ឬ Express Way ពីភ្នំពេញទៅខេត្តព្រះសីហនុ និងបានចែកចាយយ៉ាងផុសផុល។
បន្ថែមពីលើនេះ បងប្អូនខ្លះក៏បានសរសេរសារជាភាសាខ្មែរអមនឹងសំនៀងភាសាបងប្អូនវៀតណាមថា «ផ្លូវល្បឿនលឿនស្រុកយើង ប្រយ័ត្នចេតរ៉យ» និងខ្លះបានពោលថា «ផ្លូវល្បឿនលឿននៅស្រុកខ្មែរ។ តើរូបចាស់ ឬក៏រូបបច្ចុប្បន្ន សូមបងប្អូនជួយប្រាប់ផង»។
ដោយមើលឃើញថា ការចែកចាយនូវរូបភាព និងការធ្វើអត្ថាធិប្បាយបន្តុះបង្អាប់លើម្ចាស់ការដ្ឋានមិនអាចទទួលយកបាននោះ លោក ឡុង ឌីម៉ង់ បានមានប្រសាសន៍កាលពីថ្ងៃទី២៦ ខែកញ្ញា ថា «សុំនិយាយមួយចុះ…ខ្ញុំពិតជាមិនយល់នូវការគិត និងទង្វើរបស់បុគ្គលដែលបានសុំអង្វរកអ្នកទទួលខុសត្រូវការដ្ឋាន ផ្លូវល្បឿនលឿនភ្នំពេញ-ព្រះសីហនុ បានជិះជាលក្ខណៈបណ្ដោះអាសន្ន និងដោយសារការយោគយល់ផងនោះ ហើយបានថតរូបការបម្លាស់ទីរទេះក្របី-គោមួយចំនួន យកទៅបង្ហោះចែកចាយព្រោងព្រាត ព្រមទាំងអត្ថាធិប្បាយបន្តុះបង្អាប់យ៉ាងចុកចាប់ដល់អ្នកទទួលខុសត្រូវការដ្ឋានទៅវិញ»។
អភិបាលរងខេត្តព្រះសីហនុរូបនេះ បានបន្តដោយលើកជាសំណួរថា «តើអ្នកមានដឹងទេថា ផ្លូវល្បឿនលឿននេះ កំពុងស្ថិតនៅក្នុងស្ថានភាពជាការដ្ឋាននៅឡើយ? ហើយផ្ទុយទៅវិញ គឺអ្នកទេ ដែលមិនមានសិទ្ធិប្រើប្រាស់ផ្លូវល្បឿនលឿននេះ មុនការបើកឲ្យដំណើរការជាសាធារណៈពីក្រសួងសាធារណការ និងដឹកជញ្ជូន។ ហេតុដូចនេះហើយ បានសូម្បីតែអ្នកក៏ពេលខ្លះគេតម្រូវឲ្យបើកផ្លូវបញ្ច្រាសទិសផងដែរ។
ហើយបើជាសីលធម៌វិញ តើអ្នកមានវប្បដិសារីទេ ដែលខ្លួនត្រូវបានអ្នកទទួលខុសត្រូវការដ្ឋានអធ្យាស្រ័យ ដោយសារតែជាវប្បធម៌យោគយល់របស់ខ្មែរដូចគ្នា បែរជាមកបន្ទោសបង្អាប់ទម្លាក់ការទទួលខុសត្រូវយ៉ាងអាម៉ាស់មកដល់គេទៅវិញ?»។ លោកបានបន្ថែមថា «ហើយដែលតាមការពិតនោះ ការបម្លាស់ទីរទេះក្របី-គោមួយចំនួននេះ គឺត្រូវបានអនុញ្ញាតដោយអ្នកគ្រប់គ្រងការដ្ឋាន ដើម្បីបិទច្រកជាស្ថាពរតាមបណ្ដោយផ្លូវ»។ ជាមួយគ្នានោះ លោកបានសុំចិត្តមហាជនអ្នកប្រើប្រាស់បណ្តាញសង្គមថា «សូមអ្នកប្រព្រឹត្ត ព្រមទាំងអ្នកចែកចាយបន្ត ឈប់បានក៏ឈប់ទៅ!»។
សូមជម្រាបជូនថា គម្រោងផ្លូវល្បឿនលឿនភ្នំពេញ-ព្រះសីហនុ មានប្រវែង ១៨៧,០៥ គីឡូម៉ែត្រ ដែលបានបើកការដ្ឋានសាងសង់ កាលពីថ្ងៃទី២២ ខែមីនា ឆ្នាំ២០១៩ គិតត្រឹមថ្ងៃទី២៦ ខែមេសា ឆ្នាំ២០២២នេះ ដំណើរការ នៃការដ្ឋានសាងសង់ គឺស្ថិតក្នុងដំណាក់កាល នៃការសាងសង់បញ្ចប់ ហើយនឹងគ្រោងបញ្ចប់នៅថ្ងៃទី៣១ ខែឧសភា ឆ្នាំ២០២៣ និងគ្រោងដាក់ឱ្យដំណើរការសាកល្បងនៅក្នុងខែកក្កដា ឆ្នាំ២០២២ ខាងមុខ ។ ដែលផ្លូវនេះ តភ្ជាប់ពីភូមិ១ សង្កាត់សំរោងក្រោម ខណ្ឌពោធិ៍៍សែនជ័យ រាជធានីភ្នំពេញ ដល់ភូមិ១ សង្កាត់លេខ៣ ក្រុងព្រះសីហនុ ខេត្តព្រះសីហនុ ។
ផ្លូវនេះ អនុវត្តការសាងសង់ដោយក្រុមហ៊ុន PPSHV Expressway Co., Ltd និងក្រុមហ៊ុនបុត្រសម្ព័ន្ធនៃ ក្រុមហ៊ុនសាជីវកម្មស្ពានថ្នល់ចិន (CRBC) និងត្រួតពិនិត្យបច្ចេកទេសដោយក្រុមហ៊ុន MINCONSULT SDN. BHD. ប្រើរយៈពេលសាងសង់ ៤៨ខែ គ្រោងចំណាយថវិកាប្រមាណ ២,០១៩លានដុល្លារសហរដ្ឋអាមេរិក មានគន្លងផ្លូវចំនួន៤គន្លង ទទឹងផ្លូវសរុប ២៤,៥ ម៉ែត្រ មានផ្លូវបំបែកទិស៧កន្លែង មានកន្លែងឈប់សម្រាកចំនួន៣កន្លែង ចំណតរថយន្ត១កន្លែង មណ្ឌលប្រតិបត្តិការ និងថែទាំចំនួន៤កន្លែង ស្ពានធំ និងស្ពានមធ្យមចំនួន៤០កន្លែង ស្ពានតូចចំនួន៥កន្លែង ដែលឆ្លងកាត់រាជធានីភ្នំពេញ ប្រមាណ៨គីឡូម៉ែត្រ និងខេត្តចំនួន០៤បួន ក្នុងនោះ ៖ ខេត្តកណ្តាលប្រវែង៩,១គីឡូម៉ែត្រ ខេត្តកំពង់ស្ពឺ ប្រវែង៨០,៨គីឡូម៉ែត្រ ខេត្តកោះកុង ប្រវែង១,៩២ គីឡូម៉ែត្រ និងខេត្តព្រះសីហនុ ប្រវែង៨៩,៨៩គីឡូម៉ែត្រ ។
គម្រោងសាងសង់ផ្លូវល្បឿនលឿន-ភ្នំពេញព្រះសីហនុ គឺជាគម្រោងផ្លូវល្បឿនលឿនទី១ និងជាគម្រោងផ្លូវ របៀងយុទ្ធសាស្ត្រសំខាន់បំផុតនៅកម្ពុជា ជួយកាត់បន្ថយពេលវេលាធ្វើដំណើរ ពីរាជធានីភ្នំពេញ ទៅផែសមុទ្រក្រុងព្រះសីហនុ ពីចំនួនប្រាំម៉ោងមកត្រឹមតែពីរម៉ោងប៉ុណ្ណោះ និងជួយកាត់បន្ថយតម្លៃភស្តុភារកម្មផងដែរ។
រដ្ឋមន្ត្រីក្រសួងសាធារការ និងដឹកជញ្ជូន ឯកឧត្តមទេសរដ្ឋមន្ត្រី ស៊ុន ចាន់ថុល ធ្លាប់បានសម្ដែងនូវជំនឿយ៉ាងមុតមាំថា ផ្លូវនេះនឹងចូលរួមចំណែកក្នុងការជំរុញឱ្យប៉ូលសេដ្ឋកិច្ចភ្នំពេញ និងប៉ូលសេដ្ឋកិច្ចក្រុងព្រះសីហនុ មានការរីកចម្រើនលឿនជាងធម្មតា ដោយសារការធ្វើដំណើរឆាប់រហ័ស កាត់បន្ថយចំណាយ កាត់បន្ថយពេលវេលា និងកាត់បន្ថយគ្រោះថ្នាក់ចរាចរណ៍ នៅលើផ្លូវជាតិលេខ៤ និងបានបន្ថែមថា រាជរដ្ឋាភិបាល កំពុងសិក្សាធ្វើផែនការមេ ដើម្បីឲ្យខេត្តព្រះសីហនុក្លាយទៅជាតំបន់សេដ្ឋកិច្ចពិសេសពហុបំណង ហើយផ្លូវល្បឿនលឿននេះ នឹងចូលរួមបម្រើផែនការមេនេះ ក្នុងការទាក់ទាញវិនិយោគិនជាតិ និងអន្តរជាតិបន្ថែមទៀត ។
ក្រៅពីបម្រើដល់ការដឹកជញ្ជូនទំនិញ ផ្លូវល្បឿនលឿន ដ៏មានសក្តានុពលនេះ នឹងបម្រើដល់ការធ្វើដំណើរទេសចរណ៍ផងដែរ។ #ផ្លូវល្បឿនលឿនភ្នំពេញព្រះសីហនុ នឹងបើកឱ្យប្រើប្រាស់សាកល្បង មួយខែ ដោយឥតគិតថ្លៃ ចាប់ពីថ្ងៃទី០១-៣១ តុលា ២០២២៕
ចែករំលែកព័តមាននេះ