ខេត្តបន្ទាយមានជ័យ ៖ ដើម្បីរក្សាបាននូវសន្តិសុខ សណ្តាប់ធ្នាប់ សុវត្ថិភាព កម្លាំងនគរបាលខេត្តចំនួន៧០នាក់ បានធ្វើការហ្វឹកហាត់ជំនាញពីរបៀបប្រើប្រាស់ខែលការពារទប់ទល់ជាមួយនឹងក្រុមបាតុករ ដែលតវ៉ានេះ តវ៉ានោះជាយថាហេតុ ។
នៅថ្ងៃទី២៧ កុម្ភៈ លោកឧត្តមសេនីយ៍ទោ អាត់ ខែម ស្នងការនគរបាលខេត្តបន្ទាយមានជ័យ រួមដំណើរដោយលោកវរសេនីយ៍ឯក រ៉ែម វីរៈ ស្នងការរងទទួលការងារព្រំដែន បានចុះធ្វើការត្រួតពិនិត្យនិងសំណេះសំណាលជាមួយសិក្ខាកាម ដែលកំពុងទទួលការហ្វឹកហាត់ ។
លោកឧត្តមសេនីយ៍ទោ អាត់ ខែម ស្នងការនគរបាលខេត្តបានថ្លែងថា នៅក្នុងអំឡុងខែមិថុនា ឆ្នាំ២០១៧ខាងមុខនេះ ប្រទេសកម្ពុជាយើងនឹងធ្វើការបោះឆ្នោតជ្រើសរើសក្រុមប្រឹក្សាឃុំ-សង្កាត់ ដូច្នេះដើម្បីត្រៀមបង្ការនូវសភាពការណ៍អ្វីមួយដែលនឹងកើតមានជាយថាហេតុនោះ កងកម្លាំងយើងក៏ត្រូវតែ ត្រៀមលក្ខណៈជាស្រេច ដូច្នេះហើយទើបថ្នាក់ដឹកនាំនៃស្នងការដ្ឋានបានរៀបចំកម្លាំងឲ្យហ្វឹកហាត់ពីរបៀបប្រើប្រាស់ខែលសម្រាប់ការពារសន្តិសុខ សណ្តាប់ធ្នាប់ សុវត្ថិភាពសង្គម ឬក៏ទប់ទល់ជាមួយក្រុមបាតុករតវ៉ាអ្វីមួយដែលបង្កឲ្យប៉ះពាល់ដល់សន្តិសុខជាតិ ។ ពិសេសគឺក្រុងប៉ោយប៉ែតនេះតែម្តង ដែលតែងតែកើតមានភាពអសន្តិសុខ ផ្តើមចេញពីជនខិលខូចមួយក្តាប់តូចដែលតវ៉ានេះតវ៉ានោះ ធ្វើឲ្យប៉ះពាល់ដល់សន្តិសុខជាតិធ្ងន់ធ្ងរ ។
ជាមួយគ្នានោះដែរលោកឧត្តមសេនីយ៍ទោ អាត់ ខែម ក៏បានផ្តាំផ្ញើដល់សិក្ខាកាមទាំងអស់ ត្រូវយកចិត្តទុកដាក់ ក្នុងការហ្វឹកហាត់ពីរបៀបនៃការប្រើប្រាស់ខែលនេះឲ្យបានស្ទាត់ជំនាញ ដើម្បីការពារខ្លួនឯងពីការវាយតប់ ឬការគប់ដុំថ្មពីក្រុមជនខិលខូចមកលើយើង និងចេះទប់ទល់ជាមួយក្រុមទាំងនោះ ខណៈពេលវេលានៅកាន់តែកៀកមែនទែនហើយ ។ ទន្ទឹមនោះដែរ លោកគ្រូបង្គោលក៏យកចិត្តទុកដាក់ផងដែរ ក្នុងបង្ហាត់បង្រៀនពីវិធីនេះឲ្យសិក្ខាកាម ឆាប់បានយល់ដឹង និងចេះការពារខ្លួនគេប្រកបដោយសុវត្ថិភាព។
សូមបញ្ជាក់ថា សិក្ខាកាមដែលកំពុងហ្វឹកហាត់វិធីប្រើប្រាស់ខែលនេះមានចំនួន៧០នាក់ ក្នុងនោះ សិក្ខាកាមមកពីអង្គភាពនគរបាលវរសេនាតូចការពារព្រំដែនគោកលេខ៩១១ ចំនួន២៥នាក់ មកពីវរសេនាតូចការពារព្រំដែនគោកលេខ៨៩១ ចំនួន២៥នាក់ និងអធិការដ្ឋាននគរបាលក្រុងប៉ោយប៉ែតចំនួន២០នាក់ ៕
ចែករំលែកព័តមាននេះ