ទីភ្នាក់ងារ AFP កាលពីថ្ងៃទី២៨ កុម្ភៈ ផ្សាយថា កើតមានឧប្បត្តិហេតុធ្លាក់យន្តហោះធុនតូចមួយគ្រឿងទៅលើផ្ទះពលរដ្ឋចំនួនពីរខ្នងនៅក្រុងរីវើសាយ រដ្ឋកាលីហ្វ័រនីញ៉ា សហរដ្ឋអាមេរិក កាលពីថ្ងៃទី២៧ កុម្ភៈ កន្លងមក បណ្តាលឱ្យមានអ្នកស្លាប់បាត់បង់ជីវិតចំនួន៤នាក់ និងរបួស៥នាក់ទៀត ។ ស្របពេលជាមួយគ្នានេះ របាយការណ៍បញ្ជាក់ថា មានមនុស្សបានបញ្ជូនទៅសង្គ្រោះបន្ទាន់នៅឯមន្ទីរពេទ្យចំនួន២នាក់ ខណៈពេលយន្តហោះខាងលើបានចាកចេញពីក្រុងរីរើសាយទៅក្រុងសានចូហ្សេ ។
របាយការណ៍បានបញ្ជាក់បន្តថា យន្តហោះធុនតូចមួយគ្រឿងបានធ្លាក់លើផ្ទះចំនួន២ខ្នងនៅទីប្រជុំជនភាគខាងត្បូងរដ្ឋកាលីហ្វ័រនីញ៉ា កាលពីយប់ថ្ងៃទី២៧ កុម្ភៈ កន្លងមក ខណៈពេលកើតហេតុគឺមានមនុស្ស៥នាក់នៅលើយន្តហោះដែលបែកខ្ញែកជា២ចំណែក ។ ប្រភពខាងលើបានបន្តទៀតថា មានក្មេងស្រីម្នាក់អាចរស់រានមានជីវិតដោយខ្ទាតចេញពីយន្តហោះ និងរងរបួសតិចតួច ។ ក្រៅពីនេះ គេប្រទះឃើញមានមនុស្សក្នុងផ្ទះដែលយន្តហោះធ្លាក់លើ ប៉ុន្តែមិនបានបញ្ជាក់ពីចំនួនពិតប្រាកដនៅឡើយ ។
រហូតមកដល់ពេលនេះ មិនទាន់មានប្រភពណាមួយដឹងពីចំនួនអ្នកស្លាប់ទាំង៤នាក់ថា ជាមនុស្សនៅលើយន្តហោះ ឬនៅក្នុងផ្ទះនៅឡើយទេ៕
ចែករំលែកព័តមាននេះ