រាជធានីភ្នំពេញ ៖ លោក កឹម សុខា ប្រធានស្តីទីគណបក្សសង្គ្រោះជាតិ បានអះអាងថា ចង់រៀបចំស្រុកឲ្យខ្មែរបានសុខទាំងអស់គ្នា ប៉ុន្តែត្រូវបានមន្ត្រីជាន់ខ្ពស់គណបក្សកាន់អំណាចថា កម្ពុជាមានសុខសន្តិភាពហើយ ។ លោក កឹម សុខា បានបញ្ជាក់តាមបណ្តាញសង្គមហ្វេសប៊ុករបស់លោកកាលពីថ្ងៃទី២៦ ខែកុម្ភៈថា «យើងត្រូវរៀបចំស្រុក ឲ្យខ្មែរបានសុខទាំងអស់គ្នា ។ សន្តិភាពពិត គឺសន្តិភាពទាំងរូបកាយ(ខាងក្រៅ) និងសន្តិភាពទាំងផ្លូវចិត្ត(ខាងក្នុង)» ។
លោកបន្តថា ការបញ្ចប់សង្គ្រាមប្រដាប់អាវុធ គឺជាផ្នែកមួយនៃសន្តិភាពក៏ពិតមែនហើយ ។ ផ្ទុយទៅវិញ ការដែលនៅតែធ្វើឲ្យខ្មែរបែកបាក់គ្នា ឈឺចាប់ទាំងផ្លូវកាយ ទាំងផ្លូវចិត្តយ៉ាងច្រើនសន្ធឹកសន្ធាប់ដោយអយុត្តិធម៌ពីសំណាក់អ្នកមានបំពានអ្នកក្រ អ្នកខ្លាំងរាំងខ្ទប់អ្នកខ្សោយ អ្នកឈ្នះកៀបសង្កត់អ្នកចាញ់ ។ នេះហើយគឺជាមូលហេតុនាំឲ្យមានការប្រឆាំងកាន់តែច្រើនទៅៗ ដូចពាក្យស្លោកមួយបានចែងថា៖ «ទីណាមានការជិះជាន់ទីនោះមានការរើបម្រះ» ។
លោក កឹម សុខា គូសបញ្ជាក់ថា ដូច្នេះ បើយើងចង់បានសន្តិភាពទាំងអស់គ្នា យើងត្រូវរួបរួមគ្នាកសាង និងការពារសន្តិភាពពិតប្រាកដជាមួយគ្នា ដោយបញ្ឈប់ការបំពានគ្នា ងាកមកកសាងយុត្តិធម៌សង្គមជាមួយគ្នា និងការពារសេចក្តីថ្លៃថ្នូររបស់មនុស្សដូចគ្នា។ នោះទើបយើងទទួលបាន «សន្តិភាពពិត សន្តិភាពឋិតថេរ»។
ចំពោះអ្វីដែលលោក កឹម សុខា បានលើកឡើងនេះ ត្រូវបានលោក សុខ ឥសានអ្នកនាំពាក្យគណបក្សប្រជាជនកម្ពុជា លើកឡើងតាមរយៈសារអេឡិចត្រូនិកតេឡេក្រាមដោយដាក់ជាសំណួរ តើមេដឹកនាំណាមិនចង់បានការស្រុះស្រួលជាតិ ?
ជាមួយគ្នានេះ លោកក៏បានលើកឡើងពីស្នាដៃដែលនាំឲ្យមានសន្តិភាពរបស់សម្តេចតេជោនាយករដ្ឋមន្ត្រី ហ៊ុន សែន រួមមាន ដាក់ចេញនយោបាយបង្រួបបង្រួមជាតិ នាំដល់កិច្ចព្រមព្រៀងទីក្រុងប៉ារីស២៣តុលា ១៩៩១។ ដាក់ចេញនយោយឈ្នះ-ឈ្នះ នាំដល់ការរលំរលាយខ្មែរក្រហមប៉ុល ពត នាំមកនូវសន្តិភាពពេញលេញជូនជាតិនៅឆ្នាំ១៩៩៨ ទប់ស្កាត់ការប៉ុនប៉ងនាំពួកខ្មែរក្រហមមកវិញ ។ ការពាររដ្ឋធម្មនុញ្ញ ការពារសន្តិភាព សុខសុវត្ថិភាព សណ្តាប់ធ្នាប់សាធារណៈសង្គមជូនប្រជាជន ។
ផ្តើមគំនិតធ្វើកិច្ចព្រមព្រៀងថ្ងៃទី២២ ខែកក្កដា ឆ្នាំ២០១៤ ដើម្បីដំណើរការវប្បធម៌សន្ទនា ។ ជំរុញឲ្យមានសេចក្តីប្រកាសរួមរវាងគណបក្សទាំងពីរ ថ្ងៃទី៨ ខែឧសភា ឆ្នាំ២០១៥ ដើម្បីធានាជីវិតវប្បធ៌មសន្ទនា ។
ផ្តើមហូបបាយសាមគ្គីជាមួយក្រុមគ្រួសារ សម រង្ស៊ី ដើម្បីបង្កបរិយាកាសល្អ ។ ផ្តើមនាំ សម រង្ស៊ី និងភរិយាទៅចូលរួមពិធីអង្គរសង្ក្រាន្តនៅខេត្តសៀមរាប សំណូមពរឈប់ប្រើវប្បធ៌មទឹកទ្បើងត្រសុីស្រមោច ទឹកហោចស្រមោចស៊ីត្រី លាបពណ៌គ្នា និងផ្តើមបង្កើតក្រុមតំណារាស្ត្រមតិភាគតិចនិងមតិភាគច្រើន ដើម្បីរក្សាវប្បធម៌សន្ទនាជាដើម ។ល។
លោក សុខ ឥសាន ក៏បានលើកឡើងពីកិច្ចការរបស់លោក សម រង្ស៊ី អតីតប្រធានគណបក្សសង្គ្រោះជាតិផងដែរ ដូចជាធ្វើនយោបាយដោយយកគំនុំ និងសងសឹកជាមូលដ្ឋានតែងដឹកនាំធ្វើបាតុកម្មធ្វើឲ្យរាំងស្ទះដល់ដំណើររីកចម្រើនរបស់ជាតិ ។ ប៉ុនប៉ងផ្តួលរំលំរាជរដ្ឋាភិបាលស្របច្បាប់ រហូតចង់ធ្វើបដិវត្តន៍ពណ៌ខុសច្បាប់ ។ បំផ្លាញជីវិតវប្បធម៌សន្ទនា ទោះបីបានសន្យាច្រើនដងក្តី ។ បំផ្លាញទំនាក់ទំនងល្អជាមួយសម្តេចតេជោ ហ៊ុន សែន ដោយវាយប្រហារថា សម្តេចជាជនផ្តាច់ការ ជាជនក្បត់ជាតិ លក់ទឹកដី ធ្វើឲ្យបាត់បង់ទឹកដី ប្រើប្រាស់ផែនទីក្លែងក្លាយ ចុះហត្ថលេខាលុបខ្សែព្រំដែនកម្ពុជា-វៀតណាម ធ្វើឲ្យបាត់ទឹកដីកម្ពុជាក្រោម ។ល។
សូមជម្រាបថា ការលើកឡើងរបស់លោក កឹម សុខា ខណៈការបោះឆ្នោតជ្រើសរើសក្រុមប្រឹក្សាឃុំ-សង្កាត់ កាន់តែខិតជិតមកដល់ គឺនៅថ្ងៃទី៤ ខែមិថុនា ឆ្នាំ២០១៧ ខាងមុខ ។
ជាងនេះទៀត គឺបន្ទាប់ពីលោក សម រង្ស៊ី បានប្រកាសលាលែងពីតំណែងប្រធាន និងសមាជិកភាពគណបក្សសង្គ្រោះជាតិ ព្រមទាំងគណបក្សនេះបានកំណត់យកថ្ងៃទី២ ខែមីនា ដើម្បីបោះឆ្នោតជ្រើសរើសប្រធាន-អនុប្រធានគណបក្សថ្មី ៕
ចែករំលែកព័តមាននេះ