ប្រទេសចិន ៖ ឆ្លើយតបទៅកាន់ការចោទប្រកាន់របស់លោកប្រធានាធិបតី Donald Trump ថា ចិនគឺជាជើងឯកទម្លាក់តម្លៃប្រាក់ ប្រទេសនេះបាននិយាយកាលពីថ្ងៃសុក្រថា ពួកគេគ្មានបំណងប្រើប្រាស់ការទម្លាក់តម្លៃប្រាក់
ប្រទេសចិន ៖ ឆ្លើយតបទៅកាន់ការចោទប្រកាន់របស់លោកប្រធានាធិបតី Donald Trump ថា ចិនគឺជាជើងឯកទម្លាក់តម្លៃប្រាក់ ប្រទេសនេះបាននិយាយកាលពីថ្ងៃសុក្រថា ពួកគេគ្មានបំណងប្រើប្រាស់ការទម្លាក់តម្លៃប្រាក់ ដើម្បីទទួលបានអត្ថប្រយោជន៍នៃការធ្វើពាណិជ្ជកម្មទេ ។
លោក Trump បាននិយាយក្នុងបទសម្ភាសន៍មួយកាលពីថ្ងៃព្រហស្បតិ៍ថា លោកមិនបានដកការចោទប្រកាន់ថា ប្រទេសចិនទម្លាក់តម្លៃប្រាក់យន់ទេ ។
អ្នកនាំពាក្យរបស់ក្រសួងការបរទេសចិន លោក Geng Shuang និយាយថា លោកសង្ឃឹមថា សហរដ្ឋអាមេរិកនឹងមើលលើបញ្ហាអត្រាប្តូរប្រាក់ឲ្យបានទាំងស្រុង និងត្រឹមត្រូវ។ លោកនិយាយថា ៖ « ប្រទេសចិនគ្មានបំណងទទួលបានអត្ថប្រយោជន៍សម្រាប់ការធ្វើពាណិជ្ជកម្មអន្តរជាតិ តាមរយៈការទម្លាក់តម្លៃប្រាក់នោះទេ » ។
លោកបន្ថែមថា ៖ « ប្រសិនបើអ្នកដាក់ងារដល់ប្រទេសចិនមែន ខ្ញុំគិតថា ចិនគឺជាជើងឯកពិតប្រាកដ ប៉ុន្តែពួកយើងគឺជាជើងឯកនៃការអភិវឌ្ឍសេដ្ឋកិច្ច » ។
ភ្នាក់ងារសារព័ត៌មានក្នុងស្រុករបស់ចិននិយាយថា ការរិះគន់ថា ចិនបានទម្លាក់តម្លៃប្រាក់ដើម្បីជំរុញការធ្វើពាណិជ្ជកម្ម គឺជារឿងប្រឌិតដែលកើតមានឡើងក្នុងសហរដ្ឋអាមេរិកជាយូរមកហើយ ។
លោក Trump តែងចោទប្រកាន់ប្រទេសចិនថា បានរក្សាតម្លៃប្រាក់របស់ខ្លួនទាបជាងប្រាក់ដុល្លារ ដើម្បីធ្វើឲ្យការនាំចេញមានតម្លៃថោក និងលួចយកការងារផលិតកម្មរបស់អាមេរិក ។
តម្លៃប្រាក់យន់បានធ្លាក់ចុះ៦,៦% បើធៀបនឹងប្រាក់ដុល្លារក្នុងឆ្នាំ២០១៦ និងជាការធ្លាក់ចុះច្រើនជាងគេតាំងពីឆ្នាំ១៩៩៤មក ដោយសារធ្លាក់ក្រោមសម្ពាធនៃការព្រួយបារម្ភពីការលូតលាស់របស់ចិន និងតម្លៃប្រាក់ដុល្លារកើនឡើងនាពេលថ្មីៗនេះ ៕
ចែករំលែកព័តមាននេះ