ប្រទេសថៃ ៖ ថៃបានសម្រេចកិច្ចព្រមព្រៀងលក់អង្ករទៅកាន់ប្រទេសអីុរ៉ង់ជាលើកដំបូងក្នុងរយៈពេល១០ឆ្នាំមកនេះ ដែលការទិញមានចំនួនពី៥ម៉ឺន ទៅ១០ម៉ឺនតោននាពេលមួយខែ ឬពីរខែខាងមុខ ។
លោក Sombat Chalermwutinan ប្រធានក្រុមហ៊ុន Asia Golden Rice Co ថ្លែងថា ៖ « ក្រុមហ៊ុនលោកបានសម្រេចកិច្ចព្រមព្រៀងលក់អង្ករទៅកាន់រដ្ឋាភិបាលអីុរ៉ង់ហើយ បន្ទាប់ពីក្រសួងសុខភាព និងវេជ្ជសាស្ត្រចុះមកត្រួតពិនិត្យរោងចក្ររបស់ Asia Golden Rice កាលពីចុងឆ្នាំមុន ។ តម្រូវការទិញដំបូង គឺរវាងពី៥ម៉ឺន ទៅ១០ម៉ឺនតោន» ។
ក្រុមហ៊ុននេះក៏មានការស្នើសហការពី Export-Import Bank of Thailand ដើម្បីជួយដល់ពួកគេលើផ្នែកបង់ប្រាក់ ។ ការដឹកជញ្ជូនប្រហែលជាត្រូវការរយៈពេល១ទៅ២ខែខាងមុខ ឬនៅមុនខែមិថុនា ឆ្នាំនេះ ។
លោកថ្លែងថា ៖ « ការទិញនេះ គឺជាព័ត៌មានដ៏ល្អសម្រាប់ប្រទេសថៃ បន្ទាប់ពីការសហការយ៉ាងជិតដិតរវាងរដ្ឋាភិបាល និងវិស័យឯកជនបានបន្តការដឹកជញ្ជូនអង្ករថៃទៅកាន់អីុរ៉ង់ បន្ទាប់ពីខានអស់រយៈពេល១០ឆ្នាំ ព្រោះតែការដាក់ទណ្ឌកម្មពីអង្គការសហប្រជាជាតិ » ។
កាលពីអតីតកាល អីុរ៉ង់ធ្លាប់នាំចូលអង្កររវាង៧០ម៉ឺន ទៅ១លានតោនពីប្រទេសដទៃ ក្នុងនោះនាំចូលចំនួន៣០ម៉ឺន ទៅ៥០ម៉ឺនតោនពីប្រទេសថៃ ។
ដោយស្ថានការណ៍នៅអីុរ៉ង់ល្អប្រសើរឡើង វិញ ថៃ និងអីុរ៉ង់បានចុះអនុស្សរណៈយោគយល់គ្នាកាលពីដើមឆ្នាំ២០១៦ ដើម្បីបន្តការលក់អង្ករចំនួន៣០ម៉ឺនតោន ក្នុងតម្លៃ៤,៣លានបាត ។
ប្រទេសថៃ និងអីុរ៉ង់បានយល់ព្រមនៅខែតុលាឆ្នាំមុន ទៅលើកិច្ចព្រមព្រៀងអនុគ្រោះពាណិជ្ជកម្ម ដែលមានគោលបំណងជំរុញការធ្វើពាណិជ្ជកម្មទ្វេភាគីឲ្យស្មើ៣ប៊ីលានដុល្លារ ឬ១០៤,៧ប៊ីលានបាតក្នុងឆ្នាំ២០២១ ។ ភាគីទាំងសងខាងយល់ព្រមថា នឹងកាត់បន្ថយពន្ធលើផលិតផលនាំចូលចំនួន១០០ ។
អីុរ៉ង់ គឺជាដៃគូពាណិជ្ជកម្មធំជាងគេលេខ៩របស់ប្រទេសថៃ ក្នុងមជ្ឈិមបូព៌៌ា ។ នៅឆ្នាំ ២០១៦ ការធ្វើពាណិជ្ជកម្មរវាងប្រទេសទាំងពីរសរុបមានតម្លៃដល់ទៅ៤២១លានដុល្លារ ឬច្រើនជាងឆ្នាំ២០១៥ ស្មើ៣៦,១% ។ ការនាំចេញពីប្រទេសថៃ ស្មើ២៦៧លានដុល្លារ ច្រើនជាងឆ្នាំ២០១៥ ស្មើ២៣,១% ។
រដ្ឋមន្ត្រីពាណិជ្ជកម្ម លោកស្រី Apiradi Tantraporn ថ្លែងថា នាដើមឆ្នាំនេះ មានសញ្ញាល្អៗសម្រាប់អង្ករថៃ ដោយមានទាំងតាមរយៈរដ្ឋាភិបាលជាមួយរដ្ឋាភិបាល និងឯកជនជាមួយឯកជន ។
ក្រសួងពាណិជ្ជកម្មថៃគិតថា ប្រទេសថៃនឹងនាំចេញអង្ករ១០លានតោនក្នុងឆ្នាំនេះ ប៉ុន្តែសមាគមអ្នកនាំចេញអង្ករនិយាយថា ការនាំចេញនឹងស្មើតែ៩,៥លានតោនប៉ុណ្ណោះ ៕
ចែករំលែកព័តមាននេះ