រាជធានីភ្នំពេញ ៖ សមាគមអ្នកវាយតម្លៃ និងភ្នាក់ងារអចលនវត្ថុកម្ពុជា (CVEA)បាននិងកំពុងពង្រឹងសមត្ថភាពសមាជិករបស់ខ្លួន និងសាធារណជន តាមរយៈការរៀបចំវេទិកាសាធារណៈដើម្បីចែករំលែកចំណេះដឹងទាក់ទងនឹងវិស័យច្បាប់ ក៏ដូចជាបទដ្ឋានគតិយុត្តទាក់ទងនឹងវិស័យសំណង់ និងអចលនវត្ថុនានា ។
វេទិកាសាធារណៈរៀបចំឡើងកាលពីព្រឹកថ្ងៃទី២៦ កុម្ភៈ មានការចូលរួមពីមន្ត្រីជំនាញមកពីក្រសួងរៀបចំដែនដី នគរូបនីយកម្ម និងសំណង់ អគ្គនាយកដ្ឋានពន្ធដារ និងគណៈមេធាវីជាដើម ។
ប្រធានបទសំខាន់ៗចំនួនបី ត្រូវបានលើកឡើងក្នុងវេទិកាសាធារណៈនេះ រួមមាន ប្រវត្តិនៃការលក់-ទិញ និងជួលអចលនវត្ថុនៅកម្ពុជា បទបង្ហាញស្តីពីពន្ធអចលនទ្រព្យ និងប្រភេទប័ណ្ណសម្គាល់សិទិ្ធកាន់កាប់អចលនវត្ថុ របៀបនៃការផ្ទេរកម្មសិទ្ធិអចលនវត្ថុ និងទស្សនៈស្តីពីប្លង់រឹង និងប្លង់ទន់ ។
លោក ម៉ាន់ ច័ន្ទឌី អនុប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា ថ្លែងថា ការរៀបចំវេទិកាសាធារណៈនេះ បានផ្តល់ផលប្រយោជន៍ដល់សមាជិកសមាគម ក៏ដូចជានិស្សិត និងសាធារណជនមានការយល់ដឹងច្រើនទាក់ទងនឹងប័ណ្ណកម្មសិទិ្ធ ច្បាប់ពាក់ព័ន្ធ និងការទទួលខុសត្រូវរបស់ប្រជាពលរដ្ឋទាក់ទងនឹងការបង់ពន្ធ ព្រោះប្រសិនជាពួកគេមិនបង់ពន្ធ ពួកគេប្រឈមមុខនឹងការផាកពិន័យពីអគ្គនាយកដ្ឋានពន្ធដារ និងមន្ត្រីជំនាញពាក់ព័ន្ធ ។
លោកបន្តថា ៖ « គោលដៅរបស់យើង គឺចង់បញ្ជ្រាបចំណេះដឹងដល់សាធារណជនទាក់ទងនឹងវិស័យសំណង់ និងអចលនវត្ថុ ដោយសារចំណេះដឹងរបស់ពួកគេមានកម្រិតនៅឡើយទាក់ទងនឹងវិស័យនេះ ។ វេទិកានេះគ្រោងនឹងរៀបចំ២ខែម្តងដើម្បីឲ្យសាធារណជនបានចូលរួម និងយល់ពីកាតព្វកិច្ចរបស់ពួកគេម្នាក់ៗ ព្រោះប្រជាពលរដ្ឋគ្រប់រូបមានកាតព្វកិច្ចត្រូវបង់ពន្ធ » ។
នេះជាអាណិត្តទី៥របស់សមាគមអ្នកវាយតម្លៃ និងភ្នាក់ងារអចលនវត្ថុកម្ពុជា សម្រាប់ឆ្នាំ២០១៧-២០១៨ ។
លោក ម៉ាន់ ច័ន្ទឌី បន្តថា វេទិកាសាធារណៈបែបនេះផ្តល់ឱកាសឲ្យអ្នកចូលរួមស្តាប់ និងសិក្សាឈ្វេងយល់ដោយឥតគិតថ្លៃ ។ ជាក់ស្តែង វេទិកាលើកទី១សម្រាប់អាណត្តិទី៥នេះ មានសាធារណជន និងសមាជិកសមាគមចូលរួមប្រមាណ៤០០នាក់ ។
លោក គីម ហ៊ាង ប្រធានសមាគមអ្នកវាយតម្លៃ និងអចលនវត្ថុកម្ពុជា ថ្លែងថា ស្របពេលវិស័យសំណង់ និងអចលនវត្ថុកម្ពុជាកំពុងមានការរីកចម្រើន ការបញ្ជ្រាបចំណេះដឹងដល់សាធារណជនមានសារសំខាន់ណាស់ដើម្បីឲ្យប្រជាពលរដ្ឋបានឈ្វេងយល់ ព្រោះទន្ទឹមនឹងការរីកចម្រើនរបស់វិស័យនេះ បញ្ហាប្រឈមក៏កើតមានផងដែរទាក់ទងនឹងការយល់ដឹងពីបទដ្ឋានច្បាប់ គតិយុត្តិនានាក្នុងការទិញ លក់ ជួល ការប្រើប្រាស់ប្លង់រឹង ឬប្លង់ទន់ ដើម្បីបញ្ចៀសទំនាស់ផលប្រយោជន៍ ។
លោកបន្តថា ៖ « សមាគមបាននិងកំពុងដើរតួនាទីដ៏មានសារសំខាន់ទាក់ទងនឹងវិស័យអចលនវត្ថុដល់ប្រជាពលរដ្ឋកម្ពុជា ជាពិសេស អ្នកវិនិយោគដើម្បីឲ្យពួកគេមានទំនុកចិត្តក្នុងការវិនិយោគនៅកម្ពុជា » ៕
ចែករំលែកព័តមាននេះ