រាជធានីភ្នំពេញ ៖ គិតត្រឹមឆ្នាំ២០១៦ កន្លងទៅនេះ ទុនវិនិយោគសរុបរបស់អ្នកធុរកិច្ចហុងកុងនៅកម្ពុជាមានប្រមាណ១,២៥ពាន់លានដុល្លារអាមេរិក ដែលមានចំនួន២៤៤គម្រោង ស្មើនឹង២,១៩%នៃទុនវិយោគសរុបនៅកម្ពុជា ។
លោក សុខ ចិន្តាសោភា រដ្ឋមន្ត្រីប្រតិភូ អមនាយករដ្ឋមន្ត្រី និងជាអគ្គលេខាធិការក្រុមប្រឹក្សាអភិវឌ្ឍន៍កម្ពុជាបញ្ជាក់ឲ្យដឹង នៅក្នុងជំនួបជាមួយក្រុមអ្នកវិនិយោគហុងកុង ដែលដឹកនាំដោយលោកម៉ា សួយឆឹង អេរិច ចេភី លេខាធិការទទួលបន្ទុកកិច្ចការអភិវឌ្ឍន៍នៃតំបន់សេដ្ឋកិច្ចពិសេសហុងកុង នៅព្រឹកថ្ងៃទី២៧ កុម្ភៈ ម្សិលមិញថា បើគិតត្រឹមតែឆ្នាំ២០១៦កន្លងមកនេះ ការវិនិយោគរបស់អ្នកធុរកិច្ចហុងកុងកាលពីឆ្នាំមុន មានទឹកប្រាក់ប្រមាណ៣២០លានដុល្លារអាមេរិក លើគម្រោងចំនួន១៤ ក្នុងនោះមាននៅក្នុងគម្រោងផលិតផលស៊ីម៉ងត៍ កាត់ដេរសម្លៀកបំពាក់ ស្បែកជើង កាបូប កសិកម្ម និងឧស្សាហកម្ម ។
ការវិនិយោគរបស់ហុងកុងនៅក្នុងឆ្នាំ២០១៦កន្លងមកនេះ បានស្ថិតក្នុងលំដាប់លេខរៀងទី៣បន្ទាប់ពីប្រទេសចិន និងជប៉ុន ។
ក្រុមប្រតិភូក្រុមប្រឹក្សាអភិវឌ្ឍន៍ពាណិជ្ជកម្មហុងកុង ដែលមកកាន់កម្ពុជានាពេលនេះមានក្រុមហ៊ុនវិនិយោគលើវិស័យសំណង់ វិស្វកម្ម ស្ថាបត្យកម្ម សេវាកម្មពាន់ពន្ធ័នឹងសំណង់ និងសេវាកម្មអាជីពច្បាប់ និងគណនេយ្យ ។ គោលបំណងសំខាន់របស់ប្រតិភូធុរកិច្ចហុងកុងនាពេលនេះគឺដើម្បីស្វែងយល់ពីកាលានុវត្តភាពវិនិយោគនៅកម្ពុជាបន្ថែមទៀត ។
លោក សុខ ចិន្តាសោភា បន្តថា៖«បច្ចុប្បន្ននេះសម្រាប់បរិយាកាសនៃការវិនិយោគនៅកម្ពុជា គឺមានភាពអំណោយផលបំផុត ព្រោះថា កម្ពុជាកំពុងស្ថិតនៅលើគន្លងនៃការអភិវឌ្ឍសេដ្ឋកិច្ចមួយដ៏រឹងមាំ ខណៈដែលអត្រាកំណើនសេដ្ឋកិច្ចកម្ពុជា ស្ថិតជាមធ្យម៧,៧%ក្នុងមួយឆ្នាំៗនោះ » ។ លោកបន្តថា៖ « កំណើនសេដ្ឋកិច្ចដ៏រឹងមាំនេះ ក៏បានធ្វើឲ្យពិភពលោកទទួលស្គាល់ថា ជាប្រទេសមួយក្នុងចំណោមប្រទេសឯតទគ្គករកំណើនទាំង៨ក្នុងពិភពលោក ដែលមានកំណើនរឹងមាំជាងគេផងដែរ ។ ជាមួយកំណើនដ៏រឹងមាំនេះ ក៏បានធ្វើឲ្យកម្ពុជាធ្វើដំណើរយ៉ាងក្លៀវក្លា ប្រកបដោយភាពជឿនជាក់ក្នុងការអភិវឌ្ឍប្រទេសជាតិ» ។
លោកបន្តថា ឈរលើភាពច្បាស់លាស់នេះ បានធ្វើឲ្យអ្នកវិនិយោគបរទេសមកបណ្ដាក់ទុនលើគ្រប់វិស័យ ក្នុងនោះ រួមទាំងវិស័យសំណង់ផងដែរ ។ ពិសេសទៀតនោះ កម្ពុជាមានភាពវ័យក្មេង និងសម្បូរបែបដោយកម្លាំងពលកម្មច្រើន ហើយតាមការព្យាករនោះបានរំពឹងថា នឹងកើនឡើងតទៀតក្នុងអំឡុង២ ទៅ៣ទសវត្សរ៍ខាងមុខ ។ តាមរយៈគោលនយោបាយខ្សែក្រវ៉ាត់មួយផ្លូវមួយរបស់ចិន ដែលបានប្រកាសកន្លងមកនេះ នឹងជួយឲ្យក្រុមហ៊ុនហុងកុង អាចទទួលបានការគាំទ្របន្ថែមពីគោលនយោបាយមួយនេះ ។
ឆ្លើយតបនឹងកាលានុវត្តភាពនេះ លោកម៉ាសួយឆឹង អេរិច ចេភី លេខាធិការទទួលបន្ទុកកិច្ចការអភិវឌ្ឍន៍នៃតំបន់សេដ្ឋកិច្ចពិសេសហុងកុងបានសន្យាថា នឹងខិតខំធ្វើការទាក់ទាញ និងផ្សព្វផ្សាយឲ្យអ្នកវិនិយោគហុងកុងមកបណ្ដាក់ទុនរកស៊ីនៅកម្ពុជាឲ្យបានកាន់តែច្រើនថែមទៀត ។
លោកបណ្ឌិត ម៉ី កល្យាណ ទីប្រឹក្សាជាន់ខ្ពស់នៃឧត្តមក្រុមប្រឹក្សាសេដ្ឋកិច្ចជាតិបានថ្លែងថា បរិយាកាសវិនិយោគនៅកម្ពុជាកាន់តែមានភាពល្អប្រសើរឡើងក្នុងប៉ុន្មានឆ្នាំចុងក្រោយនេះ ប៉ុន្តែកម្ពុជាត្រូវធ្វើការកែលម្អជាច្រើនទៀតលើប្រព័ន្ធឡូជីស្ទីក តម្លៃអគ្គិសនី និងនិតិវិធីពាក់ព័ន្ធ នានា ដើម្បីធ្វើយ៉ាងណាឲ្យបរិយាកាសកាន់តែប្រសើរជាងនេះ និងទាក់ទាញអ្នកវិនិយោគបានកាន់តែច្រើន ៕
ចែករំលែកព័តមាននេះ