រាជធានីភ្នំពេញ ៖ មហោស្រពគីហ៊្សុណាជប៉ុន-កម្ពុជាលើកទី៦បានបញ្ចប់ដោយភាពសប្បាយរីករាយ និងស្និទ្ធស្នាលបំផុតរវាងយុវជនកម្ពុជា និងជប៉ុន ក៏ដូចជាចំណងមិត្តភាព កិច្ចសហប្រតិបត្តិការរវាងប្រទេស
រាជធានីភ្នំពេញ ៖ មហោស្រពគីហ៊្សុណាជប៉ុន-កម្ពុជាលើកទី៦បានបញ្ចប់ដោយភាពសប្បាយរីករាយ និងស្និទ្ធស្នាលបំផុតរវាងយុវជនកម្ពុជា និងជប៉ុន ក៏ដូចជាចំណងមិត្តភាព កិច្ចសហប្រតិបត្តិការរវាងប្រទេសទាំងពីរកាន់តែរឹងមាំថែមទៀត តាមរយៈការចែករំលែកនូវវប្បធម៌ ប្រពៃណីរបស់ប្រទេសទាំងពីរនៅក្នុងមហោស្រពនេះ ។
ក្នុងរយៈពេល៤ថ្ងៃនៃការប្រារព្ធមហោស្រព«គីហ៊្សុណាជប៉ុន-កម្ពុជា»មានយុវជន យុវនារីខ្មែរបានចូលរួមលេងកម្សាន្ដយ៉ាងសប្បាយរីករាយទៅតាមកម្មវិធី សំខាន់ៗដែលបានរៀបចំដូចជា ការសម្ដែងសិល្បៈ សិក្ខាសាលានៃការសម្ដែងក្បាច់រាំទំនើបជប៉ុន ការបង្ហាញជូនកីឡាយុទ្ធសិល្ប៍ ការបង្ហាញម៉ូដសម្លៀកបំពាក់ ការស្លៀកពាក់បែបតុក្កតាជប៉ុន(ខូសផ្លេ) ការបង្ហាញជូននូវការគណនាលេខយ៉ាងរហ័សដោយប្រើក្បាច់គិតលេខបុរាណ ការបង្ហាញសិល្បៈតុបតែងផ្កា និងការសរសេរអក្សរផ្ចង់ ថ្នាក់រៀនធ្វើមីជប៉ុនការតាំងពិព័រណ៍ ផ្សេងៗទៀត និងចុងបញ្ចប់នៃកម្មវិធីគឺការរាំលេងសប្បាយ ។
មន្ត្រីស្ថានទូតជប៉ុន ប្រចាំនៅកម្ពុជាដែលជាអ្នកទទួលបន្ទុកខាងផ្នែកវប្បធម៌ និងព័ត៌មាន បានសម្ដែងក្ដីសោមនស្សរីករាយដោយបានឃើញមហោស្រពលើកទី៦នេះ បញ្ចប់ដោយជោគជ័យ និងផុសផុលបំផុត ។
លោកស្រីកាអូរិ តាណាបេ លេខាទី២ប្រចាំស្ថានទូតជប៉ុននៅកម្ពុជា ឱ្យដឹងថា មហោស្រពនេះគឺមជ្ឈមណ្ឌលសហប្រតិបត្តិការកម្ពុជា-ជប៉ុន ហៅកាត់ថា (CJCC) ជាអ្នករៀបចំទាំងអស់ ទាំងការរៀបចំចាត់ចែងកម្មវិធី ផ្សេងៗគ្រាន់តែស្ថានទូតជប៉ុនឈរជាបង្គោល ។ នៅឆ្នាំនេះឃើញថាមានការចូលរួមយ៉ាងផុលផុសពីយុវវ័យដែលញ៉ាំងឱ្យមហោស្រពមួយនេះកាន់តែល្បីល្បាញនៅកម្ពុជា ។
លោកស្រីកាអូរិ តាណាបេថ្លែងថា៖«មហោស្រពនេះលើកទី៦ យើងរំពឹងថានឹងមានអ្នកមកចូលរួមក្នុងមហោស្រពនេះប្រមាណ២ម៉ឺននាក់ ប៉ុន្ដែភាពជាក់ស្ដែងបើតាមតួលេខដែលយើងទទួលបាន គ្រាន់តែរយៈពេល៣ថ្ងៃ គឺមានអ្នកចូលរួមច្រើនជាង២ម៉ឺននាក់ទៅហើយ គឺលើសការគ្រោងទុកយ៉ាងច្រើន» ។
អ្នកធ្វើបទបង្ហាញក្នុងកម្មវិធីធ្វើមីអ៊ូដុង បានឱ្យដឹងថា កម្មវិធីនេះគឺតម្រូវឱ្យចុះឈ្មោះជាមុន ព្រោះតែកន្លែងមានកំណត់ ប៉ុន្ដែនៅពេលកម្មវិធីចាប់ផ្ដើមស្រាប់តែមានអ្នកចូលរួមច្រើន ។
កញ្ញាសូដា ដែលជាអ្នកធ្វើបទបង្ហាញរូបនេះបាននិយាយថា៖«កម្មវិធីធ្វើមីអ៊ូដុងនេះយើងជ្រើសរើសតែ៣០នាក់មកចូលរួមទេ ព្រោះកន្លែងមានកំណត់ ប៉ុន្ដែនៅពេលចាប់ផ្ដើមស្រាប់អ្នកចូលរួមយ៉ាងច្រើន សរុបមាណជា៥០នាក់ ព្រោះពួកគាត់ចាប់អារម្មណ៍ពីរបៀបនៃការធ្វើមីអ៊ូដុងនេះ ដោយអ្នកខ្លះសុខចិត្តឈរមើលក៏បាន បើទោះបីជាមិនបានចូលរួមធ្វើក៏ដោយ» ។
បើតាមលោកស្រីកាអូរិ តាណាបេ ថ្លែងថា៖«ពាក្យ គីហ្សុ៊ណា មានន័យថាចំណងទាក់ទងជាមួយមនុស្ស សំខាន់ៗដូចជាគ្រួសារ សមាជិកក្រុមគ្រួសារ ឬមិត្តភក្ដិដែលសំខាន់បំផុតសម្រាប់យើង ដូច្នេះហើយយើងប្រើពាក្យហ្នឹងគឺសម្រាប់តែមនុស្ស សំខាន់ៗប៉ុណ្ណោះ អីុចឹងហើយបានជាយើងដាក់ឈ្មោះមហោស្រពគីហ្សុ៊ណា ជប៉ុន-កម្ពុជា ដើម្បីផ្សារភ្ជាប់ទំនាក់ទំនងរវាងប្រទេសទាំងពីជប៉ុន-កម្ពុជាឱ្យកាន់តែរឹងមាំថែមទៀត» ។
មហោស្រពគីហ៊្សុណាជប៉ុន-កម្ពុជាលើកទី៦នេះ បានប្រព្រឹត្តទៅរយៈពេល៤ថ្ងៃចាប់ពីថ្ងៃទី២៣ ដល់ថ្ងៃទី២៦ កុម្ភៈ ឆ្នាំ២០១៧នៅមជ្ឈមណ្ឌលCJCCស្ថិតក្នុងបរិវេណនៃសាកលវិទ្យាល័យភូមិន្ទភ្នំពេញ ។
កាលពីឆ្នាំ២០១៦កន្លងទៅ មហោស្រពនេះបានទាក់ទាញអ្នកចូលរួមទាំងភ្ញៀវជាតិ និងអន្តរជាតិប្រមាណជាង១៨.០០០នាក់ ហើយក្នុងឆ្នាំ២០១៧នេះបានព្យាករថា នឹងមានអ្នកចូលរួមប្រមាណជាង២ម៉ឺននាក់ ៕
ចែករំលែកព័តមាននេះ