រាជធានីភ្នំពេញ ៖ មនុស្សចំនួន២៣១នាក់ត្រូវបានឃាត់ខ្លួន និងបន្ទប់ជួលចំនួន៩៨បន្ទប់ត្រូវបានអាជ្ញាធរ ខណ្ឌសែនសុខរុះរើនៅក្នុងយុទ្ធនាការបង្ក្រាបគ្រឿងញៀ.ន …
រាជធានីភ្នំពេញ ៖ មនុស្សចំនួន២៣១នាក់ត្រូវបានឃាត់ខ្លួន និងបន្ទប់ជួលចំនួន៩៨បន្ទប់ត្រូវបានអាជ្ញាធរ ខណ្ឌសែនសុខរុះរើនៅក្នុងយុទ្ធនាការបង្ក្រាបគ្រឿងញៀននៅក្នុងតំបន់ត្រពាំងឈូក ដែលបច្ចុប្បន្នហៅថា ភូមិបុរីកម្មករ សង្កាត់ទឹកថ្លា ខណ្ឌសែនសុខ រយៈពេលប្រមាណ១ខែកន្លងមកនេះ ។ នេះបើតាមរបាយការណ៍បូកសរុបល ទ្ធផលការងាររបស់គណៈបញ្ជាការឯកភាពខណ្ឌសែនសុខ នៅក្នុងកិច្ចប្រជុំបូកសរុបលទ្ធផល និងដាក់ទិសដៅជាយុទ្ធសាស្ត្រដើម្បីលប់បំបាត់គ្រឿងញៀននៅតំបន់ត្រពាំងឈូកកាលពីរសៀលថ្ងៃទី២៧ ខែកុម្ភៈ ឆ្នាំ ២០១៧ ។
តាមរបាយការណ៍របស់រដ្ឋបាលខណ្ឌសែនសុខបានឲ្យដឹងថា លទ្ធផលការងារនៃយុទ្ធនាការបង្ក្រាបគ្រឿងញៀននេះ គណៈកម្មការត្រួតពិនិត្យគ្រឿងញៀនរបស់ខណ្ឌសែនសុខបានចុះស្រង់ស្ថិតិ ចំនួនក្បាលដី ចំនួនគ្រួសារ និងបានរុះរើបន្ទប់ជួល ដែលជាទីតាំងជួញដូរ និងប្រើប្រាស់គ្រឿងញៀន ប្រព្រឹត្តិល្បែងស៊ីសងខុសច្បាប់គ្រប់ប្រភេទ នៅភូមិបុរីកម្មករ (តំបន់ត្រពាំងឈូក) សង្កាត់ទឹកថ្លា ទទួលបានជាលទ្ធផលដូចខាងក្រោម ៖ បង្ក្រាបគ្រឿងញៀនបានចំនួន៤៤ករណី ឃាត់មនុស្សចំនួនន២៣១នាក់ ក្នុងនោះមានស្រី១៨នាក់ ដកហូតបានគ្រឿងញៀនចំនួន៧១កញ្ចប់តូច និងថ្នាំគ្រាប់បានចំនួន២០គ្រាប់ និងបានរុះរើបន្ទប់ជួលបានចំនួន៩៨បន្ទប់ ។
តាមរបាយការណ៍បានអោយដឹងទៀតថា នៅក្នុងយុទ្ធនាការនោះ គណៈកម្មការបានចុះស្រង់ក្បាលដីបាន ចំនួន៣៩៨ក្បាលដី សរុបជាគ្រួសារចំនួន៦៦៣គ្រួសារ និងមានប្រជាពលរដ្ឋចំនួន២៩៨៤នាក់ស្នាក់នៅ ។
នៅក្នុងរបាយការណ៍ក៏បានបញ្ជាក់ថា ស្ថានភាពទូទៅនៅតំបន់ត្រពាំងឈូកមានការថយចុះបទល្មើសស្ទើរតែ ទាំងស្រុង ប្រៀធៀបមុនពេលយុទ្ធនាការ ។ ទោះបីជាយ៉ាងណា គណៈកម្មការនឹងបន្តជំរុញកងកម្លាំងប្រចាំការ២៤ម៉ោង លើ២៤ម៉ោង បម្រើសេវាកម្មសន្តិសុខសាធារណៈ និងបង្កើតការអនុវត្តវិធានការល្បាតការពារសន្តិសុខ សុវត្ថិភាព សណ្តាប់ធ្នាប់ នៅគោលដៅឧស្សាហ៍កើតបទល្មើសនានា អន្តរាគមន៍បានឆាប់រហ័ស ៕
ចែករំលែកព័តមាននេះ