អាសូរខ្លាំងណាស់ ! សម្រាលកូនដំបូងកណ្តាលវាលស្រែ
ខេត្តស្ទឹងត្រែង ៖ ពិតជាអាសូរខ្លាំងណាស់ ដែលស្ត្រីវ័យក្មេងម្នាក់បានឈឺពោះឆ្លងទន្លេកូនដំបូងនៅកណ្ដាលវាលស្រែ ស្ថិតក្នុងភូមិដំរីផុង ឃុំកោះសម្ពាយ ស្រុកសៀមបូក …
ខេត្តស្ទឹងត្រែង ៖ ពិតជាអាសូរខ្លាំងណាស់ ដែលស្ត្រីវ័យក្មេងម្នាក់បានឈឺពោះឆ្លងទន្លេកូនដំបូងនៅកណ្ដាលវាលស្រែ ស្ថិតក្នុងភូមិដំរីផុង ឃុំកោះសម្ពាយ ស្រុកសៀមបូក កាលពីព្រឹកថ្ងៃទី២៧ ខែកុម្ភៈ ឆ្នាំ២០១៧ ។
តាមការឲ្យដឹងពីប្អូនស្រីថា កាលពីព្រឹកថ្ងៃទី២៧ កុម្ភៈ រូបនាង និងបងប្អូនប្រុសស្រី៤នាក់ រួមទាំងបងស្រីមានផ្ទៃពោះផងនោះបានទៅចូលបុណ្យលើកធាតុយាយនៅភូមិចម្ងាយពីខ្ទមស្រែជិតមួយគីឡូម៉ែត្រ លុះដើរបានជាង១០០ម៉ែត្រ គាត់ប្រាប់ថា ឈឺចង្កេះ ដោយពុំនឹកស្មានថា ឈឺពោះសម្រាលកូននោះទេ បន្ទាប់មកក៏ស្រាប់ឈឺពោះកាន់តែខ្លាំង និងដើរលែងរួច ទើបសម្រាលកូននៅកណ្តាលស្រែតែម្តង ។
នារីដដែលបន្តថា គ្រាកំពុងឈឺពោះជាការដៃដន្យបំផុតមានពេទ្យឆ្មបម្នាក់ឆ្លងកាត់ ជួយពិនិត្យ និងជូនដំណឹងទៅប្រធានមណ្ឌលសុខភាពស្រែក្រសាំងឲ្យបញ្ជូនពេទ្យឆ្មបជំនាញ២នាក់ រួមទាំងសម្ភារមកជួយបន្ថែមទាន់ពេល ចំណែកប្តីរបស់គាត់ប្រឹងកាប់ដើមឫស្សីចងអង្រឹងសែងទៅបណ្តើរ តែការឈឺពោះនោះលឿនពេក ក៏សម្រាលភ្លាមៗនៅកណ្តាលស្រែនោះតែម្តង បន្ទាប់មកក្រុមគ្រូពេទ្យឆ្មបមកដល់ជួយសម្អាតសុកចេញ និងបញ្ជូនតាមម៉ូតូបន្តទៅទទួលការថែទាំនៅមណ្ឌលសុខភាពភ្លាមៗដែរ ។
ជួបជាមួយអ្នកសារព័ត៌មាន ស្ត្រីខាងលើបានរៀបរាប់ថា នាងពុំដឹងថា ខ្លួនឈឺពោះសម្រាលកូននោះទេ តែស្រាប់កើតឡើងភ្លាមៗនៅព្រឹកថ្ងៃទី២៧ កុម្ភៈនេះទាំងពុំដឹងខ្លួន ។ នាងបានរៀបរាប់បន្តថា នាងឈ្មោះ ថេង ធារី អាយុ២៦ឆ្នាំ ស្រុកកំណើតនៅភូមិច្រវ៉ា ឃុំគោលាប់ ស្រុកចិត្របូរី ខេត្តក្រចេះ និងទើបមករស់នៅធ្វើស្រែចម្ការនៅភូមិដំរីផុង ឃុំកោះសម្ពាយ ស្រុកសៀមបូក បានមួយឆ្នាំប៉ុណ្ណោះ ។ នេះជាចំណងដៃកូនទីមួយក្រោយរៀបការជាមួយប្តីបានជាងមួយឆ្នាំកន្លងទៅ ។
បុរសជាប្តីបានរៀបរាប់ដែរថា ខ្លួនមិនដឹងថា ប្រពន្ធត្រូវជួបប្រទះរឿងបែបនេះសោះ ហើយវាជាអនុស្សាវរីយ៍មួយដែលមិនអាចបំភ្លេចបានបន្ទាប់ពីប្រពន្ធសម្រាលបានកូនប្រុសម្នាក់នៅកណ្តាលវាលស្រែបែបនេះ ហើយខ្លួនក៏មានការរំភើបដែរដែលបានធ្វើជាឪពុកក្នុងប្រវត្តិជូរចត់របស់កូនគ្រានេះដែរ ។
បុរសរូបនេះបន្តថា ទន្ទឹមនឹងប្រពន្ធផ្តើមឈឺពោះ ខ្លួនមានការបារម្ភពីបញ្ហាប្រឈម ទីមួយ គ្មានពេទ្យឆ្មប ទីពីរមណ្ឌលសុខភាពនៅឆ្ងាយរាប់គីឡូម៉ែត្រ និងជាការធ្វេសប្រហែសមួយដែលមិនបានទៅពិនិត្យផ្ទៃពោះ ទទួលការណែនាំនៅមន្ទីរពេទ្យ ឬមណ្ឌលសុខភាព ដើម្បីត្រៀមលក្ខណៈជាមុន ។
លោក ឯម ប៊ុនសុំ ប្រធានមណ្ឌលសុខភាពភូមិស្រែក្រសាំង ឃុំស្រែក្រសាំង ស្រុកសៀមបូក បានបញ្ជាក់ថា សុខភាពម្តាយ និងទារក មានសុខភាពល្អធម្មតា ហើយវាជារឿងមួយដែលកម្រសម្រាប់ស្ត្រីមានផ្ទៃពោះជួបប្រទះការសម្រាលកូនដោយខ្លួនឯងដោយមិនដឹងខ្លួនបែបនេះ ។ លោកបន្តថា នេះដោយសារគាត់មិនដែលមកពិនិត្យផ្ទៃពោះក្រោយមានកូន និងជិតដល់ថ្ងៃត្រូវកើត ។ ហើយរឿងនេះជាការចៃដន្យបំផុត ដោយមានបុគ្គលិកសម្ភពយើងម្នាក់ចុះផ្សព្វផ្សាយអប់រំសុខភាពទារកម្តាយដល់សហគមន៍ភូមិ-ឃុំគាត់ជួបប្រទះពេលធ្វើដំណើរ គាត់ក៏បានរាយការណ៍មកមណ្ឌលសុខភាព លោកក៏បានបញ្ជូនបុគ្គលិកសម្ភព២នាក់ រួមទាំងសម្ភារសម្រាលទៅជាបន្ទាន់ដើម្បីសង្គ្រោះ តែទារកកើតមុនពេលបុគ្គលិកទៅដល់ និងជួយសម្អាតសុក រួចនាំមកកាន់មណ្ឌលសុខភាពដាក់សេរ៉ូមជំនួយកម្លាំង ក្រោមការថែទាំពីជំនាញផងដែរ ។
លោក ឯម ប៊ុនសុំ បានបន្ថែមថា ទាក់ទិនការសម្រាលកូនបែបនេះ មានការប្រឈមគ្រោះថ្នាក់ខ្លាំងណាស់ប្រសិនក្រោយសម្រាលមិនបានយកសុកចេញឈាម និងចាប់ផ្តើមធ្លាក់ ដែលអាចកើតមានគ្រោះថ្នាក់គ្រប់ពេលលើសុខភាពម្តាយ ។
លោកបញ្ជាក់បន្ថែមថា ខាងមណ្ឌលសុខភាពបានចុះធ្វើការផ្សព្វផ្សាយអប់រំដល់មូលដ្ឋានជាប្រចាំ តែមានប្រជាពលរដ្ឋខ្លះគាត់ចូលរួម និងខ្លះទៀតគាត់មិនបានចូលរួមស្តាប់ការផ្សព្វផ្សាយ ។ បច្ចុប្បន្នទារក និងម្តាយ កំពុងសម្រាកថែទាំសុខភាពនៅមណ្ឌលសុខភាពស្រែក្រសាំង ស្រុកសៀមបូក ៕
ចែករំលែកព័តមាននេះ