ប្រទេសឥណ្ឌូណេស៊ី ៖ រដ្ឋាភិបាលឥណ្ឌូណេស៊ីគ្រោងនឹងពង្រីកទីផ្សារនាំចេញទៅកាន់ទ្វីបអាហ្វ្រិក និងអាមេរិកឡាទីន ។ នេះបើតាមមន្ត្រីរដ្ឋាភិបាលបានថ្លែងកាលពីថ្ងៃពុធ។
រដ្ឋមន្ត្រីពាណិជ្ជកម្ម លោក Engartiasto Lukita ថ្លែងថា ខណៈទីផ្សារក្នុងប្រទេសមានសក្តានុពលសម្រាប់ការនាំចេញផលិតផលរបស់ខ្លួន ប៉ុន្តែរនាំងពន្ធនាំចូលនៅតែជាឧបសគ្គក្នុងការជ្រៀតចូលទីផ្សារ ។
ដើម្បីជម្នះនូវឧបសគ្គនេះ លោកបានស្នើសុំការពង្រឹងកិច្ចសហប្រតិបត្តិការទ្វេភាគីជាមួយបណ្តាប្រទេសនៅក្នុងទឹកដីនេះ ។
លោក Lukita ថ្លែងថា ៖ « នេះជាចំណុចចាប់ផ្តើមសម្រាប់ពួកយើង ក្នុងការបង្កើតកិច្ចសហប្រតិបត្តិការជាមួយបណ្តាប្រទេសដែលយើងមិនទាន់ចូលទៅកាន់ទីផ្សារ » ។
យោងតាមលោក Lukita ប្រទេសអាហ្វ្រិក និងអាមេរិកឡាទីនបានកំណត់ពន្ធនាំចូលខ្ពស់សម្រាប់ផលិតផលពីបរទេស ។
លោកប្រធានាធិបតី Joko Widodo បានបញ្ជាឱ្យពង្រីកការនាំចេញទៅកាន់ប្រទេស ដែលធ្វើពាណិជ្ជកម្មមិនមែនប្រពៃណី ។
ការនាំចេញរបស់ឥណ្ឌូណេស៊ីបានកើនឡើងដល់១៤៤,៤៣ប៊ីលានដុល្លារអាមេរិកនៅឆ្នាំ២០១៦ ។ នេះបើយោងតាមការិយាល័យស្ថិតិជាតិ ។
ឥណ្ឌូណេស៊ី គឺជាប្រទេសនាំចេញប្រេងដូងឆៅ និងធ្យូងថ្មធំជាងគេបំផុតរបស់ពិភពលោក ខណៈបាននាំចេញកៅស៊ូ និងកាកាវធំជាងគេទី៣ ហើយប្រទេសនេះក៏មានអណ្តូងរ៉ែទង់ដែងធំជាងគេទី២ ផងដែរ ៕
ចែករំលែកព័តមាននេះ