ចក្រភពអង់គ្លេស ៖ ប្រជាជនក្នុងចក្រភពអង់គ្លេសកំពុងតែចាប់ផ្តើមទទួលការប៉ះពាល់ពី Brexit ។ យោងតាមការិយាល័យស្ថិតិជាតិ (ONS) របស់ប្រទេសនេះឲ្យដឹងថា នៅខែមករា ការលក់ទំនិញក្នុងចក្រភពអង់គ្លេស
ចក្រភពអង់គ្លេស ៖ ប្រជាជនក្នុងចក្រភពអង់គ្លេសកំពុងតែចាប់ផ្តើមទទួលការប៉ះពាល់ពី Brexit ។ យោងតាមការិយាល័យស្ថិតិជាតិ (ONS) របស់ប្រទេសនេះឲ្យដឹងថា នៅខែមករា ការលក់ទំនិញក្នុងចក្រភពអង់គ្លេសបានធ្លាក់ចុះដោយមិនបានគិតទុកមុន អស់រយៈពេល៣ឆ្នាំជាប់ៗគ្នាមកហើយ ។
ការលក់បានធ្លាក់ចុះ០,៣%កាលពីខែមុន ខុសពីការព្យាកររបស់អ្នកវិភាគថា នឹងកើនឡើង០,៩% ។ លើសពីនេះ ONS និយាយថា ការលក់ក៏បានធ្លាក់ចុះ២,១%ផងដែរក្នុងខែវិច្ឆិកា ដែលជាការធ្លាក់ចុះច្រើនជាងការគិតទុកមុន ។
Kate Davies ផ្នែកស្ថិតិក្នុង ONS និយាយថា ការធ្លាក់ចុះនេះ គឺមកពីកំណើនតម្លៃប្រេងសាំង និងអាហារ ។ ការលក់ត្រូវបានធ្លាក់ចុះទាំងនៅតាមហាង និងលើអីុនធើរណេត។
ការវិនិយោគបានជំរុញឲ្យតម្លៃប្រាក់ផោនធ្លាក់ចុះ០,៦% ។ កម្រិតក្នុងពេលបច្ចុប្បន្ន គឺទាបជាង១៧% បើធៀបនឹងពេលប្រទេសអង់គ្លេសបោះឆ្នោតចាកចេញពីសហភាពអឺរ៉ុប។
ការធ្លាក់ចុះនៃតម្លៃប្រាក់ផោនបន្ទាប់ពីការបោះឆ្នោតចាកចេញនោះ គឺបង្កឲ្យមានការកើនឡើងនៃតម្លៃផលិតផលនាំចូលដូចជាអាហារ និងគ្រឿងអេឡិចត្រូនិកជាដើម ។
Naeem Aslam នាយកផ្នែកវិភាគទីផ្សារក្នុង Think Markets ថ្លែងថា ៖ « ពួកយើងមើលឃើញថា ប្រាក់បៀវត្សគ្មានការប្រសើរឡើងទេ ខណៈអតិផរណាកាន់តែខ្ពស់ឡើង។ ការកើនឡើងនៃតម្លៃ គឺកំពុងបង្កជាបញ្ហា » ។
អតិផរណាបានកើនឡើងមកត្រឹម១,៨%ក្នុងខែមករា ខណៈខែធ្នូ មានតែ១,៦%ប៉ុណ្ណោះ។ Capital Economics ព្យាករថា វានឹងកើនដល់២%នៅខែក្រោយ ។
សេដ្ឋកិច្ចរបស់ចក្រភពអង់គ្លេសបានបង្ហាញពីភាពរឹងមាំយ៉ាងខ្លាំងបន្ទាប់ពីបោះឆ្នោតចាកចេញ ។ ការចំណាយក្នុងស្រុក ក៏មានភាពរឹងមាំខុសពីការគិតទុករបស់សេដ្ឋវិទូផងដែរ ប៉ុន្តែពេលនេះ អតិថិជនដូចជាកំពុងតែធ្លាក់នៅក្រោមសម្ពាធការកើនឡើងនៃតម្លៃហើយ ។
Andrew Sentance ឧត្តមអ្នកប្រឹក្សាសេដ្ឋកិច្ចក្នុង PwC ឲ្យដឹងថា ៖ « ទិន្នន័យទាំងនោះផ្តល់ជាភស្តុតាងយ៉ាងច្បាស់ថា ការកើនឡើងនៃតម្លៃ នឹងកាត់បន្ថយការចំណាយក្នុងស្រុកមួយឆ្នាំនេះពេញ រហូតដល់ឆ្នាំ២០១៨ » ៕
ចែករំលែកព័តមាននេះ