រាជធានីភ្នំពេញ ៖ ថ្លែងក្នុងជំនួបពិភាក្សាការងារជាមួយលោក ង្វៀន ជីយុ៉ង (Nguen Chi Dung) រដ្ឋមន្ត្រីក្រសួងផែនការ និងវិនិយោគនៃសាធារណរដ្ឋសង្គមនិយមវៀតណាមនាព្រឹកថ្ងៃទី២៤ កុម្ភៈ នៅវិមានសន្តិភាព លោកឧបនាយករដ្ឋមន្ត្រី ហោ ណាំហុង បានស្នើភាគីវៀតណាមទិញទំនិញរបស់កម្ពុជាឲ្យបានច្រើន ដើម្បីកុំឲ្យជញ្ជីងពាណិជ្ជកម្មរវាងប្រទេសទាំងពីរបាត់តុល្យភាពគ្នាខ្លាំងពេក ។
លោកឧបនាយកដ្ឋមន្ត្រីថ្លែងយ៉ាងដូច្នេះថា ៖ « ខ្ញុំបានស្នើវៀតណាមទិញទំនិញកម្ពុជាឲ្យបានច្រើន ដើម្បីឲ្យជញ្ជីងពាណិជ្ជកម្មរវាងប្រទេសទាំងពីរកុំឲ្យបាត់តុល្យភាពខ្លាំងពេក ហើយខ្ញុំក៏អរគុណវៀតណាម ដែលបានសម្រេចពីឆ្នាំ២០១៦ ទិញអង្ករកម្ពុជា៣០ម៉ឺនតោន » ។
ចំពោះបញ្ហាវិនិយោគរវាងកម្ពុជា និងវៀតណាម លោកឧបនាយករដ្ឋមន្ត្រីក៏បានរំលឹកថា ចាប់តាំងពីឆ្នាំ២០០៩មក មានក្រុមហ៊ុនចំនួន៥២មកវិនិយោគនៅកម្ពុជា ដែលមានទឹកប្រាក់ចំនួន១,៨ពាន់លានដុល្លារអាមេរិក ។ នៅក្នុងឆ្នាំ២០១៥ មានចំនួន៤គម្រោង មានទឹកប្រាក់ជិត៩០លានដុល្លារអាមេរិក និងនៅឆ្នាំ២០១៦ មានចំនួន២គម្រោង មានទឹកប្រាក់ជិត៨១លានដុល្លារអាមេរិក ។ ក្នុងនោះលោកក៏បានស្នើវៀតណាមមិនគួរគិតតែទីផ្សារកម្ពុជាទេ តែត្រូវគិតដល់ការនាំចេញទៅសហគមន៍ ASEAN ដែលមានប្រជាជនជាង៦០០លាននាក់ និងប្រទេសផ្សេងទៀត ។
ទន្ទឹមនឹងនេះ លោកឧបនាយករដ្ឋមន្ត្រីក៏បានលើកឡើងអំពីភ្ញៀវទេសចរវៀតណាមចាប់តាំងពីឆ្នាំ២០១០មក អ្នកទេសចរវៀតណាម គឺឈរលើលេខរៀងទី១ ហើយក្នុងឆ្នាំ២០១៥-២០១៦មានទេសចរវៀតណាមជិត១លាននាក់បានមកទស្សនាកម្ពុជា ដោយសារមានការហោះហើរត្រង់ពីវៀតណាមមកកម្ពុជា ចំនួន៨១ជើងក្នុងមួយសប្តាហ៍ ។
ក្នុងឱកាសនោះ លោកឧបនាយករដ្ឋមន្ត្រីបានលើកឡើងអំពីកិច្ចព្រមព្រៀងរួមនៃការតភ្ជាប់រវាងកម្ពុជា និងវៀតណាម ដោយសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី និងលោក Nguyen Tan Dung នាយករដ្ឋមន្ត្រីនៃសាធារណរដ្ឋសង្គមនិយមវៀតណាមកាលពីឆ្នាំ២០១៤ ។ ជាមួយគ្នានេះ លោកឧបនាយករដ្ឋមន្ត្រី ក៏បានស្នើឲ្យមានផែនការមេ (Master Plan) ដើម្បីងាយស្រួលអនុវត្តការងារជាក់ស្តែងផងដែរ ៕
ចែករំលែកព័តមាននេះ