រាជធានីភ្នំពេញ ៖ រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ កាលពីរសៀលថ្ងៃទី២៥ កុម្ភៈ កន្លងទៅ បានដឹកនាំគណៈ ប្រតិភូជាន់ខ្ពស់ទៅចូលរួមពិធីចុះហត្ថលេខាលើកិច្ចព្រមព្រៀងឥណទានសម្បទានលើ «គម្រោងជំរុញទីផ្សារសម្រាប់កសិកម្មខ្នាតតូច» ជាមួយមូលនិធិអន្តរជាតិសម្រាប់អភិវឌ្ឍន៍កសិកម្ម (International Fund for Agricultural Development – IFAD) នៅទីស្នាក់ការកណ្តាលរបស់ IFAD ក្នុងទីក្រុងរ៉ូម ប្រទេសអីុតាលី ។
យោងតាមមន្ត្រីក្រសួងសេដ្ឋកិច្ច និងហិរញ្ញវត្ថុ បានឲ្យដឹងថា ពិធីចុះហត្ថលេខានេះ គ្រោងប្រព្រឹត្តនៅថ្ងៃទី២៨ កុម្ភៈ ឆ្នាំ២០១៧ ខាងមុខ។ កិច្ចព្រមព្រៀងឥណទានសម្បទាននេះ នឹងត្រូវចុះហត្ថលេខាដោយលោកទេសរដ្ឋមន្ត្រី អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ជាមួយលោក Gilbert Fossoun Houngbo ប្រធាន IFAD មានទឹកប្រាក់ចំនួន ប្រមាណ៣៦,៣០លានដុល្លារអាមេរិកសម្រាប់ជាឥណទានរួមចំណែកគាំទ្រអនុវត្ត «គម្រោងជំរុញទីផ្សារសម្រាប់កសិកម្មខ្នាតតូច» ដែលត្រូវការទឹកប្រាក់សរុបចំនួនប្រមាណ៦១,៦៥លានដុល្លារអាមេរិក ។
មន្ត្រីរូបនេះបន្តថា ៖ « គម្រោងនឹងត្រូវដឹកនាំអនុវត្តដោយក្រសួងពាណិជ្ជកម្ម ដែលមានការចូលរួមដោយក្រសួងសេដ្ឋកិច្ច និងហិរញ្ញវត្ថុ និងធនាគារអភិវឌ្ឍន៍ជនបទ ហើយមានរយៈពេលអនុវត្តចំនួន៦ឆ្នាំ ចាប់ពីឆ្នាំ២០១៧ ដល់២០២២ » ។ ក្រៅពីហិរញ្ញប្បទានដោយ IFAD គម្រោងនេះនឹងត្រូវចូលរួមសហហិរញ្ញប្បទានដោយអ្នកទទួលផល និងដៃគូក្នុងវិស័យឯកជន មានទឹកប្រាក់ចំនួនប្រមាណ ១៦,៧០លានដុល្លារអាមេរិក និងដោយថវិកាបដិភាគរបស់រាជរដ្ឋាភិបាលចំនួនប្រមាណ៨,៦៥លានដុល្លារអាមេរិក ។
លោកបន្ដថា ៖ « គម្រោងជំរុញទីផ្សារសម្រាប់កសិកម្មខ្នាតតូចមានគោលដៅចូលរួមលើកកម្ពស់ជីវភាពកសិករខ្នាតតូចឱ្យទទួលបានផលចំណេញខ្ពស់ពីការធ្វើកសិកម្ម តាមរយៈការចូលធ្វើអន្តរាគមន៍ជំនះដោះស្រាយរាល់បញ្ហាប្រឈមក្នុងវិស័យកសិកម្មទាំងនៅក្នុងដំណាក់កាលខ្សែសង្វាក់ ផលិតកម្ម ទាំងក្នុងការធ្វើកសិពាណិជ្ជកម្ម និងជាពិសេស ការជំរុញតភ្ជាប់ឱ្យដល់ទីផ្សារកសិកម្ម ។ ក្នុងជំហានដំបូង គម្រោងនឹងផ្តោតលើមុខទំនិញចំនួន៥មុខ រួមមាន ៖ ស្រូវ, បន្លែ, មាន់ចិញ្ចឹមលក្ខណៈគ្រួសារ, ដំឡូង និងសូត្រ » ។
លោកបញ្ជាក់ថា ៖ « គម្រោងនេះនឹងផ្តល់ប្រយោជន៍ដោយផ្ទាល់ដល់កសិករក្រីក្រ ចំនួនប្រមាណ៧ម៉ឺន៥ពាន់គ្រួសារក្នុងខេត្តចំនួន ១៥ រួមមាន ៖ ខេត្តកំពត, តាកែវ, កណ្តាល, ព្រៃវែង, ត្បូងឃ្មុំ, កំពង់ចាម, កំពង់ធំ, ក្រចេះ, រតនគិរី, ស្ទឹងត្រែង, ព្រះវិហារ, សៀមរាប, បន្ទាយមានជ័យ, បាត់ដំបង និងប៉ៃលិន ។ គម្រោងនឹងពិនិត្យលទ្ធភាពពង្រីកមុខទំនិញនៅជំហានបន្តបន្ទាប់ទៀតតាមតម្រូវការជាក់ស្តែង»៕
ចែករំលែកព័តមាននេះ