ពុទ្ធោ…! ដួលចូលក្រោមរថយន្តអូសជាង១០ម៉ែត្រ
រាជធានីភ្នំពេញ ៖ បុរស២នាក់បើកបរក្នុងល្បឿនលឿន និងបានព្យាយាមវ៉ាជែងជាមួយនឹងរថយន្តដឹកដែក
រាជធានីភ្នំពេញ ៖ បុរស២នាក់បើកបរក្នុងល្បឿនលឿន និងបានព្យាយាមវ៉ាជែងជាមួយនឹងរថយន្តដឹកដែកតែវ៉ាមិនផុតក៏បណ្តាលឱ្យទាក់ដៃចង្កូតដួលចូលក្រោមរថយន្តអូសប្រហែល១០ម៉ែត្រ ធ្វើឲ្យអ្នកបើកម៉ូតូរងរបួសបាក់ជើងទាំង២ ចំណែកអ្នកអង្គុយខាងក្រោយរងរបួសស្រាល ។
ហេតុការណ៍គ្រោះថ្នាក់ចរាចរណ៍នេះបានកើតឡើងនៅវេលាម៉ោង៧និង៥០នាទីយប់ ថ្ងៃទី២៦ កុម្ភៈ ២០១៧ ទុលមុខនឹងសាលាសង្កាត់ជើងឯក ផ្លូវ២១៧ ភូមិជើងឯក សង្កាត់ជើងឯក ខណ្ឌដង្កោ ។
បើតាមប្រភពពីសមត្ថកិច្ចបានឱ្យដឹងថា អ្នកបើករថយន្តបង្កមានឈ្មោះ ឡោ ប៉ុនថាត អាយុ៣៤ មុខរបរបើករថយន្ត មានស្រុកកំណើតនៅ ភូមិព្រៃឈរ ឃុំសាងាវ ស្រុកព្រៃឈរ ខេត្តកំពង់ចាម ចំណែកជនរងគ្រោះដែលជិះម៉ូតូមិនបានឱ្យដឹងអត្តសញ្ញាណឡើយ ។
តាមប្រភពព័ត៌មានពីកន្លែងកើតហេតុឱ្យដឹងទៀតថា គេបានឃើញយុវជន២នាក់ អាយុប្រហែល២៥ឆ្នាំមិនដឹងថា គោលដៅទៅណានោះទេគឺបានជិះម៉ូតូម៉ាកឌ្រីមសង់ សេរីឆ្នាំ២០០៨ ពណ៌ខ្មៅ ពាក់ស្លាកលេខ ភ្នំពេញ 1Y-8522 បានធ្វើដំណើរក្នុងល្បឿនលឿន ខណៈមកដល់ចំណុចកើតហេតុស្រាប់តែអ្នកបើកម៉ូតូបានខំប្រឹងវ៉ាជែងជាមួយនឹងរថយន្តដឹកដែកម៉ាកហ៊ីយ៉ានដាយ ពណ៌ស ពាក់ស្លាកលេខ ព្រះសីហនុ 3A-4940 ដែលធ្វើដំណើរស្របទិសគ្នា តែវ៉ាមិនផុត ក៏បណ្ដាលឲ្យទាក់ដៃចង្កូតជាមួយនឹងរថយន្តធ្វើឲ្យដួលម៉ូតូចូលទៅក្រោមរថយន្តអូសប្រហែល១០ម៉ែត្រ ធ្វើឱ្យរថយន្តកិនពីម៉ូតូព្រមទាំងមនុស្ស និងធ្វើឱ្យអ្នកបើកម៉ូតូ រងរបួសបាក់ជើងទាំងសង្ខាង ចំណែកឯអ្នកអង្គុយខាងក្រោយរងរបួសស្រាលទាំងពីរនាក់ត្រូវបានរថយន្តសង្គ្រោះដឹកយកទៅសង្គ្រោះនៅគ្លីនិកឯកជន ។
ហើយភ្លាមៗនោះដែរអ្នកបើកបររថយន្តបង្កមិនបានឈប់ដោះស្រាយនៅកន្លែងកើតហេតុនោះទេ គឺព្យាយាមបើករថយន្តរត់គេច ខ្លួនរហូតដល់មុខសាលាខណ្ឌដង្កោ ទើបសមត្ថកិច្ចស្ទាក់ចាប់បានទាំងរថយន្ត និងអ្នកបើកបរបានតែម្តង ។
ក្រោយពេលកើតហេតុរថយន្ត និងម៉ូតូព្រមទាំងអ្នកបើករថយន្តត្រូវសមត្ថកិច្ចវាស់វែងរួចបានយកទៅរក្សាទុកនៅអធិការដ្ឋានខណ្ឌដង្កោដើម្បីធ្វើការដោះស្រាយ ៕
ចែករំលែកព័តមាននេះ