រាជធានីភ្នំពេញ ៖ ការសម្តែងរបស់តារាល្បីល្បាញប្រទេសថៃលោកJames JIនារាត្រីថ្ងៃទី២៥ កុម្ភៈ ឆ្នាំ២០១៧ នៅសាលមហោស្រពកោះពេជ្រអ្នករៀបចំកម្មវិធីបានរំលេចឡើងនូវទម្រង់សិល្បៈខ្មែរមួយចំនួនសម្តែងចែកជូនយុវវ័យយ៉ាងណែនពេញមុខឆាកទស្សនាឱ្យប្លែកអារម្មណ៍ ។
មហាជនមួយចំនួនប្រហែលជាគិតថាលោកជេម មកសម្តែងនៅលើវេទិកាដ៏ធំរបស់ឆាកមហោស្រពកោះពេជ្រ សុទ្ឋតែមានទម្រង់ជាសិល្បៈរបស់ប្រទេសថៃ ពិសេសចម្រៀងកន្ត្រាក់អារម្មណ៍របស់ប្រទេសថៃ ដែលយុវវ័យជាច្រើនបានគិតទុកជាមុន ។ យ៉ាងណាមិញបើទោះជាមានបទចម្រៀងញាក់កន្ត្រាក់អារម្មណ៍ច្រៀងដោយលោកជេម បុរសសង្ហាមានមន្តស្នេហ៍របស់អ្នកគាំទ្រនោះ ស្រាប់តែមានការលើកយកនូវបទចម្រៀងមួយចំនួនពេញនិយមរបស់ប្រទេសកម្ពុជា មកសម្តែងបញ្ចូលគ្នាគួរឱ្យទាក់ទាញ ញ៉ាំងកម្មវិធីឱ្យរឹតតែសប្បាយ និងភ្ញាក់ផ្អើលបំផុតរបស់យុវវ័យដែលទៅទស្សនា ។
នាឱកាសនោះលោកជេម ច្រៀងភាសាជាតិខ្លួនបានប៉ុន្មានបទ ក៏មានចម្រៀងខ្មែររបស់ក្រុម «ក្មេងខ្មែរ»គឺបទ«បុណ្យភូមិ»សម្តែងលើឆាក ។
តារាចម្រៀងទាំងលោកជេម និងខាងកម្ពុជាច្រៀងជាភាសាជាតិខ្មែរជូនអ្នកគាំទ្រស្តាប់ឡើងកញ្ជ្រោលពេញឆាក ដោយមិនដឹងថា ជេម អាចច្រៀងជាភាសាខ្មែរនូវបទល្បី
«បុណ្យភូមិ»បានបែបនេះឡើយ ។
ក្រៅពីច្រៀងជាភាសាខ្មែរក៏មានការលេងហ្គេមជាមួយប្រិយមិត្ត ការសំណួរសួរពីរឿងរ៉ាវដែលលោកជេម ថតខ្សែភាពយន្តដ ។ តារារូបនេះបានសម្តែងចំនួន៥រឿង មកហើយ ដោយភាគច្រើនបណ្តារឿងមួយចំនួនលោកថតតាំងពី៥ឆ្នាំមុន ។ បន្ថែមពីលើនេះមានការបង្ហាញសាច់រឿង ខ្លះៗនៅក្រៅឆាកសម្តែងដោយលោកជេមក្នុងនោះមានបទចម្រៀងមួយចំនួនដែលលោកជេមច្រៀងបញ្ចូលក្នុងខ្សែភាពយន្តដែលលោកបានសម្តែងផងដែរ ។
នេះជាលើកទី២ហើយដែលលោកជេមមកសម្តែងនៅកម្ពុជា ក្រោមការរៀបចំរបស់ស្ថានីយទូរទស្សន៍ភីអិនអិន ដោយលោកជេមមកលើកទី២នេះ សម្តែងក្នុងព្រឹត្តិការណ៍តន្ត្រីឈ្មោះថា«JAMES JI 2017 Fan Meeting Phnom Penh» ។ កំពូលតារាថៃរូបនេះបានសម្រេចចិត្តបើកការសម្តែងតាមរយៈតន្ត្រីរបស់លោកនៅអាស៊ីដោយជម្រើសទី១ លោកជ្រើសរើសកម្ពុជាមុនគេ រួចបន្តដំណើរទៅថៃ វៀតណាម មីយ៉ាន់ម៉ា និងប្រទេសឡាវ ។
លោកជេមមានគម្រោងមកជួបប្រិយមិត្តកម្ពុជាជាបន្តបន្ទាប់ទៀតគ្រាដែលលោកហាក់មានភាពកក់ក្តៅក្រោយពីដឹងថាយុវវ័យ និងប្រជាជនកម្ពុជាជាច្រើនពេញចិត្ត និងឱ្យតម្លៃចំពោះទេពកោសល្យសម្តែងរបស់លោក ៕
ចែករំលែកព័តមាននេះ