ដើររើសខ្យង និងចាក់ត្រីនៅវាលស្រែរាល់យប់ ព្រឹកឡើងស្រាប់តែ…
ខេត្តកណ្ដាល ៖ បុរសពោះម៉ាយម្នាក់តែងតែទៅដើររើសខ្យង និងចាក់ត្រីនៅវាលស្រែដើម្បីយកទៅលក់ជារៀងរាល់យប់ ស្រាប់តែនៅវេលាម៉ោង៥ និង៣០នាទីព្រឹក ថ្ងៃទី២៦ …
ខេត្តកណ្ដាល ៖ បុរសពោះម៉ាយម្នាក់តែងតែទៅដើររើសខ្យង និងចាក់ត្រីនៅវាលស្រែដើម្បីយកទៅលក់ជារៀងរាល់យប់ ស្រាប់តែនៅវេលាម៉ោង៥ និង៣០នាទីព្រឹក ថ្ងៃទី២៦ ខែកុម្ភៈ ឆ្នាំ២០១៧ ត្រូវបានគេប្រទះឃើញស្លាប់ផ្កាប់មុខនៅក្នុងទឹកស្រែខាងជើងភូមិត្រពាំងរកា ឃុំក្រាំងម្កាក់ ស្រុកអង្គស្នួល ខេត្តកណ្តាល ។
បុរសរងគ្រោះឈ្មោះ វី បូរិន អាយុ២៧ឆ្នាំ ជនជាតិខ្មែរ មុខរបរកម្មកររោងចក្របាញ់ថ្នាំពណ៌ ក្រុមហ៊ុនម៉ាស៊ីន ត្រជាក់ ដែលធ្វើការពេលថ្ងៃ លុះយប់ឡើងដើររើសខ្យង និងចាក់ត្រីលក់ មានទីលំនៅក្នុងភូមិខ្ចៅ សង្កាត់បឹងធំ ខណ្ឌពោធិ៍សែនជ័យ ហើយជាបុរសពោះម៉ាយ ដែលបានលែងលះគ្នាជាមួយប្រពន្ធរយៈពេលយូរហើយដែរ ។
ប្រភពព័ត៌មានបានឲ្យដឹងថា នៅវេលាម៉ោងប្រហែល១០យប់ ថ្ងៃទី២៥ ខែកុម្ភៈ បុរសរងគ្រោះបានចាកចេញពីផ្ទះទៅដើររើសខ្យង និងចាក់ត្រី នៅតាមវាលស្រែយកទៅលក់ដូចសព្វមួយដង ប៉ុន្តែរាល់ដងត្រឹមម៉ោង១ ឬម៉ោង២ គឺត្រឡប់ទៅដល់ផ្ទះវិញហើយ ។ ដោយឡែកនៅវេលាយប់ថ្ងៃនោះ ស្រាប់តែបាត់រហូត ប៉ុន្តែក្រុមគ្រួសារមិនបានតាមរកនោះឡើយ ព្រោះស្មានថា ជនរងគ្រោះជាប់រើសខ្យងមិនទាន់បានត្រឡប់ទៅ វិញ ។ លុះដល់ម៉ោង៥ និង៣០នាទីព្រឹក ថ្ងៃទី២៦ ខែកុម្ភៈ មានបុរសម្នាក់ឈ្មោះ នេត្រ ចាន់ណា អាយុ៥០ឆ្នាំ មុខរបរកសិករ មានទីលំនៅក្នុងភូមិឃុំកើតហេតុ បានទៅលើកទ្រូនៅមាត់ប្រឡាយនោះ ស្រាប់តែប្រទះឃើញដេកស្លាប់ផ្កាប់មុខនៅក្នុងទឹកស្រែ ដោយមានទ្រុងដាក់ត្រីជាប់ខ្លួន និងមានស្នរចាក់ត្រី ព្រមទាំងពិលពាក់ក្បាលមួយផងដែរ ។
សមត្ថកិច្ចនគរបាលបាននិយាយថា បុរសរងគ្រោះនេះគឺជាអ្នកទីបីហើយដែលបានស្លាប់ដោយសារតែខ្យល់គធ្លាក់ចូលទឹកបែបនេះ ដោយនៅក្នុងក្រុមគ្រួសាររបស់គេបានស្លាប់២នាក់រួចមកហើយ ដោយសារតែជម្ងឺឆ្កួតជ្រូកដួលប្រកាច់ធ្លាក់ចូលក្នុងទឹក ក្នុងនោះមានបងប្រុសបង្កើតម្នាក់ និងប្អូនប្រុសបង្កើតម្នាក់ ។
សមត្ថកិច្ចនគរបាលបន្តទៀតថា ក្រោយពីទទួលបានព័ត៌មានភ្លាម កម្លាំងនគរបាលព្រហ្មទណ្ឌស្រុកអង្គស្នួល សហការជាមួយកម្លាំងនគរបាលប៉ុស្ដិ៍ក្រាំងម្កាក់ មន្ត្រីក្រុមប្រឹក្សាឃុំក្រាំងម្កាក់ និងគ្រូពេទ្យឃុំ បានចុះទៅធ្វើការពិនិត្យ និងកោសល្យវិច័យសព ហើយលទ្ធផលគឺ ជនរងគ្រោះស្លាប់ដោយជម្ងឺខ្យល់គដួលធ្លាក់ចូលទឹក បន្ទាប់មកបានប្រគល់សពជូនក្រុមគ្រួសារ ដើម្បីយកទៅធ្វើបុណ្យតាមប្រពៃណី ៕
ចែករំលែកព័តមាននេះ