រាជធានីភ្នំពេញ ៖ អាជ្ញាធររាជធានីភ្នំពេញបានធ្វើពិធីសមយុទ្ធបង្ការ និងទប់ស្កាត់ ពន្លត់អគ្គិភ័យ ដើម្បីដាស់អារម្មណ៍ឲ្យប្រជាពលរដ្ឋចូលរួមបង្ការ និងទប់ស្កាត់គ្រោះអគ្គិភ័យទាំងអស់គ្នា ។ ពិធីនេះបានធ្វើឡើងនៅទីលានប្រជាធិបតេយ្យ កាលពីព្រឹកថ្ងៃទី២៦ ខែកុម្ភៈ ឆ្នាំ២០១៧ និងបានកំណត់យកថ្ងៃទី២២ កុម្ភៈ ធ្វើសមយុទ្ធរួមគ្នា ទប់ស្កាត់គ្រោះអគ្គិភ័យ ដើម្បីដាស់តឿនក្រើនរំលឹកដល់ប្រជាពលរដ្ឋបានយល់ពីវិធីបង្ការ និងទប់ស្កាត់គ្រោះអគ្គិភ័យនេះតែម្តង ។
មន្ត្រីរដ្ឋបាលរាជធានីភ្នំពេញបានឲ្យដឹងថា ដើម្បីបង្ការ និងទប់ស្កាត់អគ្គិភ័យកុំកើតមានបន្តទៀតនោះ អាជ្ញាធររាជធានី អង្គការ ស្ថាប័នពាក់ព័ន្ធ បានរួមគ្នាប្រារព្ធពិធីសមយុទ្ធបង្ការ និងទប់ស្កាត់ ពន្លត់អគ្គិភ័យ ដោយយកថ្ងៃទី២២ កុម្ភៈ តាមប្រសាសន៍របស់សម្តេចក្រឡាហោម ស ខេង រដ្ឋមន្ត្រីក្រសួងមហាផ្ទៃ មកអនុវត្តន៍ ដើម្បីរួមគ្នាទប់ស្កាត់គ្រោះអគ្គិភ័យឲ្យមានការថយចុះឈានទៅលុបបំបាត់ និងជាការដាស់តឿនក្រើនរំលឹកដល់ប្រជាពលរដ្ឋបានយល់ពីបញ្ហាគ្រោះអគ្គិភ័យនេះ ។
មន្ត្រីដដែលបន្តថា បើទោះបីជារដ្ឋាភិបាលខិតខំពង្រឹងវិធានការ និងបង្កើនកម្លាំងសមត្ថកិច្ចដើម្បីបង្ការអគ្គិភ័យក៏ដោយ តែចំនួននៃការកើតអគ្គិភ័យនៅតែកើនឡើងពីមួយឆ្នាំទៅមួយឆ្នាំ ដែលក្លាយជាក្តីកង្វល់ដល់ពលរដ្ឋ និងជាបន្ទុកដ៏ធំរបស់រដ្ឋាភិបាលផងដែរ ។
លោក ប៉ា សុជាតិវង្ស អភិបាលរាជធានីភ្នំពេញបានចាត់ទុកថ្ងៃ២២ កុម្ភៈ ជាស្នូរជួងដាស់ស្មារតីប្រជាពលរដ្ឋឲ្យចូលរួមទប់ស្កាត់ និងបង្ការគ្រោះអគ្គិភ័យនៅរាជធានីភ្នំពេញ ដែលជាគ្រោះមហន្តរាយដ៏ធំបង្កឲ្យមានសោកនាដកម្មយ៉ាងខ្លោចផ្សាចំពោះប្រជាពលរដ្ឋយើង និងជំរុញឲ្យមានភាពក្រីក្រកាន់តែខ្លាំង ។
ថ្លែងទៅកាន់ប្រជាពលរដ្ឋ និងកងកម្លាំងអាជ្ញាធររាប់រយនាក់នៅទីលានប្រជាធិបតេយ្យក្នុងកម្មវិធីខាងលើនេះ លោក មានប្រសាសន៏ថា ប្រជាពលរដ្ឋគ្រប់ៗរូបបានរស់នៅជាមួយឧបករណ៍ដែលអាចបង្កើតជាគ្រោះអគ្គិភ័យបាន ដូច្នេះយើងទាំងអស់គ្នាមានកាតព្វកិច្ចចូលរួមទប់ស្កាត់ និងបង្ការគ្រោះអគ្គិភ័យ ។ លោកបន្តថា ទីណា កន្លែងណា ក៏អាចកើតមានគ្រោះអគ្គិភយ័បានដែរ មិនថាសំណង់មិនរៀបរយ ឬអគារខុនដូ សណ្ឋាគារ ក្លិបកំសាន្ត ឬសំណង់នានានោះទេ ឲ្យតែយើងធ្វេសប្រហែស ហើយនៅពេលគ្រោះអគ្គិភ័យកើតឡើង វាមិនត្រឹមតែប៉ះពាល់តែផ្ទះយើងមួយទេ គឺវាប៉ះពាល់ដល់លំនៅដ្ឋានអ្នកដទៃក្នុងសហគមន៍របស់ខ្លួនយ៉ាងអាណោចអាធ័មថែមទៀតផង មានន័យថា បើឆេះផ្ទះ គឺស្មើសូន្យ គ្មានសល់អ្វីនោះទេ ។
លោក ប៉ា សុជាតិវង្ស មានប្រសាសន៍ទៀតថា ហានីភ័យអគ្គិភ័យគឺនៅជាប់ជានិច្ចជាមួយយើង ដូច្នេះទាមទាឲ្យប្រជាពលរដ្ឋម្នាក់ៗចូលរួមបង្ការ និងទប់ស្កាត់ ចំណែករដ្ឋបាលភ្នំពេញ បានជំរុញឲ្យម្ចាស់លំនៅដ្ឋាន, គ្រឹះស្ថាន, ក្លិបកំសាន្ត, សណ្ឋាគារ, ផ្ទះសំណាក់ ជាដើម ត្រូវតែមានបំពង់ពន្លត់អគ្គិភ័យឲ្យបានគ្រប់ទីតាំង ដើម្បីងាយស្រួលក្នុងការពន្លត់បឋមពេលមានគ្រោះអគ្គិភ័យកើតឡើង ឯម្ចាស់សំណង់ ពេលសាងសង់ត្រូវទុកផ្លូវសុវត្ថិភាពឲ្យបានគ្រប់គ្រាន់ បើមិនដូច្នេះទេត្រូវផ្អាកការដ្ឋានសំណង់នោះសិន ។ លោកបន្តថា មូលហេតុផ្តើមឲ្យមានអគ្គិភ័យមកពីទុស្សេខ្សែភ្លើង ការផ្សាដែក និងការធ្វេសប្រហែសផ្សេងៗទៀត ដូច្នេះការបង្កើតឲ្យមានទិវានេះឡើង ដើម្បីឲ្យយើងទាំងអស់គ្នាចូលរួមបង្ការ និងទប់ស្កាត់គ្រោះអគ្គិភ័យ ដែលជាកាតព្វកិច្ចរបស់យើងទាំងអស់គ្នាតែម្តង ។
លោក ជួន សុវណ្ណ អគ្គស្នងការរងនគរបាលជាតិ និងជាស្នងការដ្ឋាននគរបាលរាជធានីភ្នំពេញ បានឲ្យដឹងថា បញ្ហាគ្រោះអគ្គិភ័យនៅតែជាបញ្ហាប្រឈមមួយរបស់រាជធានីភ្នំពេញ និងមានការកើនឡើងពីឆ្នាំទៅមួយឆ្នាំ ជាក់ស្តែងក្នុងឆ្នាំ២០១៦កន្លងទៅ គ្រោះអគ្គិភ័យបានកើតឡើងក្នុងរាជធានីភ្នំពេញចំនួន៧១លើក បណ្តាលឲ្យស្លាប់មនុស្សម្នាក់ និងរបួស៦នាក់ ឆេះរថយន្ត១គ្រឿង, ម៉ូតូសណ្តោងរ៉ឺម៉ក១គ្រឿង, ឆេះផ្ទះ២៤៣ខ្នង, តូប៧តូប, បន្ទប់១៥, រោង៤កន្លែង, ក្លិបកំសាន្ត១ និងសម្ភារៈជាច្រើនទៀត ដែលបណ្តាលមកពីការឆ្លងចរន្តអគ្គិសនី ការស្តុក ការបញ្ចូល និងការទុកដាក់ប្រេងឥន្ធនៈ ហ្គាស ដោយខុសបច្ចេកទេស, ករណីផ្សារដែក និងភ្លើងចង្ក្រាន ព្រមទាំងកត្តាធ្វេសប្រហែសមួយចំនួន ។
លោកបន្តថា រាជរដ្ឋាភិបាលបានកំណត់យកថ្ងៃទី២២ កុម្ភៈ រៀងរាល់ឆ្នាំ ធ្វើជាទិវាជាតិបង្ការ និងពន្លត់អគ្គិភ័យ នេះជាលើកទី២ ដែលរដ្ឋបាលរាជធានីភ្នំពេញបានប្រារព្វពិធី ក្នុងគោលបំណងបំផុសស្មារតីប្រជាពលរដ្ឋឲ្យចូលរួមបង្ការ និងទប់ស្កាត់គ្រោះអគ្គិភ័យដ៏មហន្តរាយនេះ ៕
ចែករំលែកព័តមាននេះ