ខេត្តក្រចេះ ៖ ស្ត្រីម្នាក់ខណៈកំពុងអង្គុយចិត្តបន្លែនៅផ្ទះបាយ ស្រាប់តែបុរសម្នាក់លបចូលទៅចាប់មួលបំបាក់.ករហូតស្លាប់ រួចអូសចូលទៅក្នុងបន្ទប់ទឹក ហើយយកដែកចាក់បន្ថែមទៀត ។ ករណីនេះកើតឡើងកាលពីល្ងាចថ្ងៃទី២៤ ខែកុម្ភៈ ឆ្នាំ២០១៧ នៅភូមិអូរគ្រៀង ឃុំអូរគ្រៀង ស្រុកសំបូរ ។
ស្ត្រីរងគ្រោះដែលត្រូវជនដៃដល់វាយសម្លាប់ឈ្មោះ អេង មេងជា អាយុ៤៣ឆ្នាំ ជាស្ត្រីមេម៉ាយមានកូន៣នាក់ មានមុខរបរចិញ្ចឹមជ្រូក ហើយក៏មានទ្រព្យធនសមរម្យ រស់នៅភូមិកើតហេតុ ។
លោកវរសេនីយ៍ត្រី ណយ ស៊ីថាច បញ្ជាក់ថា ស្ត្រីរងគ្រោះត្រូវជនដៃដល់ចាប់មួលបំបាក់.ក ខណៈកំពុងអង្គុយចិតបន្លែនៅផ្ទះបាយ ។ បន្ទាប់ពីធ្វើសកម្មភាពបែបនេះរួច ជនដៃដល់បានអូសសាកសពរបស់ស្ត្រីរង គ្រោះចូលបន្ទប់ទឹកក្នុងបន្ទប់ដេកនៅលើផ្ទះ និងបានយកដែកចាក់សម្លាប់បន្ថែមទៀត រួចក៏បានធ្វើសកម្មភាពរើកកាយយកសម្ភារ គ្រឿងអលង្ការ លុយកាក់មួយចំនួន នៅក្នុងបន្ទប់ក៏ដូចជានៅលើខ្លួនប្រាណរបស់ស្ត្រីរងគ្រោះ ។
ទោះបីជាយ៉ាងណា ករណីឃាតកម្មនេះ មិនត្រូវបានភ្ញាក់ផ្អើលភ្លាមៗនោះទេ ខណៈជនដៃដល់បានលួចឡើងធ្វើសកម្មភាពនៅលើផ្ទះរបស់ស្ត្រីរងគ្រោះ ដែលមានរបងសុវត្ថិភាពហ៊ុមព័ទ្ធបិទជិត ទើបធ្វើឲ្យជនដៃដល់ងាយនឹងធ្វើសកម្មភាព ។
រហូតមកដល់ពេលនេះនៅមិនទាន់មានការប៉ាន់ប្រមាណពីសម្ភារ លុយកាក់ ក៏ដូចជាគ្រឿងលង្ការរបស់ស្ត្រី រងគ្រោះដែលជនដៃដល់បានធ្វើសកម្មភាពប្លន់យកទៅនៅឡើយទេ ។ តែបើតាមការបញ្ជាក់ពីកូនស្រីស្ត្រីរងគ្រោះ បានប្រាប់នគរបាលថា មានលុយកាក់ ក៏ដូចជាគ្រឿងអលង្ការ មានមាស និងប្លាទីនរបស់ស្ត្រីរងគ្រោះជាម្តាយដែលធ្លាប់ពាក់នៅលើខ្លួន និងដាក់នៅក្នុងទូរបានបាត់ទាំងអស់ ។
លោក ណយ ស៊ីថាច អធិការរងនគរបាលស្រុក បានអះអាងថា បើទោះបីជាជនដៃដល់បានគេចខ្លូនក្រោយធ្វើសកម្មភាពរួចក៏ដោយ តែអត្តសញ្ញាជននេះត្រូវនគរបាលបានកំណត់ច្បាស់លាស់ហើយបន្ទាប់ពីចុះស៊ើបអង្កេត និងកំពុងតែប្រើវិធានការស្រាវជ្រាវផងដែរ ៕
ចែករំលែកព័តមាននេះ