ប្រទេសចិន ៖ យោងតាមទិន្នន័យពី JLL ឲ្យដឹងថា ទីក្រុងសៀងហៃរបស់ប្រទេសចិនបានក្លាយទៅជាទីតាំងល្អជាងគេសម្រាប់ការវិនិយោគអចលនទ្រព្យក្នុងអាស៊ីប៉ាស៊ីហ្វិក និងធ្វើឲ្យក្រុងតូក្យូបាត់បង់តំណែងនេះនាត្រីមាសទី៤ឆ្នាំមុន ។
យោងតាមក្រុមហ៊ុនខាងលើ សកម្មភាពដ៏រឹងមាំរបស់សៀងហៃ ត្រូវបានជំរុញដោយការទិញលក់ធំៗដូចជា ការវិនិយោគតម្លៃ២,៩១ប៊ីលានដុល្លារបស់ ARA Asset Management លើ Century Link កាលពីខែតុលា ជាដើម ។
កិច្ចព្រមព្រៀងទិញលក់ធំៗផ្សេងទៀតរួមមាន ការទិញភាគហ៊ុនរបស់ SCPG Holdings Properties ដោយ Blackstone Group ក្នុងតម្លៃ១,៩ប៊ីលានដុល្លារ ។
Joe Zhou ប្រធានផ្នែកស្រាវជ្រាវរបស់ JLL ពីប្រទេសចិន បានថ្លែងក្នុងសេចក្តីថ្លែងការណ៍មួយថា ៖ « ធនធានក្នុងស្រុក គឺជាកត្តាជំរុញសំខាន់ជាងគេនៃការទិញលក់អចលនទ្រព្យក្នុងឆ្នាំ២០១៦ ដោយមានវិនិយោគិនក្នុងស្រុកភាគច្រើនឲ្យតម្លៃថ្លៃជាងវិនិយោគិនបរទេស ។ ពួកយើងជឿជាក់ថា ចិនបន្តមានភាពទាក់ទាញវិនិយោគិនបរទេស ខណៈទីផ្សារលូតលាស់ឡើង » ។
កាលពីឆ្នាំមុន សៀងហៃជាប់ចំណាត់ថ្នាក់លេខ៥ ជាទីតាំងល្អជាងគេសម្រាប់ការវិនិយោគអចលនទ្រព្យរបស់ពិភពលោក បន្ទាប់ពីក្រុងញូវយ៉ក, ឡុងដ៍, Los Angeles និងប៉ារីស ។
យោងតាម JLL ការទិញលក់អចលនទ្រព្យសរុបក្នុងអាស៊ីប៉ាស៊ីហ្វិកបានកើនឡើង៥%ឯណោះក្នុងឆ្នាំ២០១៦ និងកើនឡើង២១% ក្នុងត្រីមាសទី៤ បើធៀបនឹងឆ្នាំ២០១៥ ។
លោក Zhou បន្តថា ៖ « ដោយមានបញ្ហានយោបាយកើតឡើងដូចជា Brexit និងលទ្ធផលការបោះឆ្នោតដ៏គួរឲ្យភ្ញាក់ផ្អើលរបស់សហរដ្ឋអាមេរិក មានវិនិយោគិនកាន់តែច្រើនស្វែងរកឱកាសក្នុងអាស៊ីប៉ាស៊ីហ្វិក និងជាពិសេសក្នុងប្រទេសចិន » ។
គួរបញ្ជាក់ថា ការទិញលក់អចលនទ្រព្យក្នុងត្រីមាសទី៤ឆ្នាំមុន សរុបមានដល់ទៅ១៥,៥ប៊ីលានដុល្លារនៅចិន, ៧,៤ប៊ីលានដុល្លារនៅកូរ៉េខាងត្បូង និង៧,២ប៊ីលានដុល្លារនៅជប៉ុន ៕
ចែករំលែកព័តមាននេះ