ថៃចាប់ផ្ដើមប្រើច្បាប់បង្ក្រាបបទល្មើសរំលោ.ភកម្មសិទ្ធិបញ្ញា
ខេត្តបន្ទាយមានជ័យ ៖ នៅរសៀលថ្ងៃទី២៥ ខែកុម្ភៈ ឆ្នាំ២០១៧ សមត្ថកិច្ចថៃបានចែកលិខិតជូនដំណឹងដល់អាជីវករខ្មែរនៅផ្សាររុងក្លឿ ពីវិធានការបង្ក្រាបបទល្មើសទំនិញ …
ខេត្តបន្ទាយមានជ័យ ៖ នៅរសៀលថ្ងៃទី២៥ ខែកុម្ភៈ ឆ្នាំ២០១៧ សមត្ថកិច្ចថៃបានចែកលិខិតជូនដំណឹងដល់អាជីវករខ្មែរនៅផ្សាររុងក្លឿ ពីវិធានការបង្ក្រាបបទល្មើសទំនិញរំលោភកម្មសិទ្ធិបញ្ញាលើទឹកដីរបស់គេ ចាប់ពីថ្ងៃជូនដំណឹងនេះ ដោយក្នុងលិខិតនោះព្រមានថា អ្នកល្មើសនឹងទទួលទោស៤ឆ្នាំ និងពិន័យជាប្រាក់៤០ម៉ឺនបាត (សែសិបម៉ឺនបាត) នេះបើយោងតាមប្រភពពីអាជីវករនៅផ្សាររុងក្លឿ និងលិខិតរបស់ថៃ ។
ប្រភពព័ត៌មានបានឲ្យដឹងថា សមត្ថកិច្ចថៃបានចែកលិខិតជូនដំណឹនេះដើម្បីឲ្យអាជីវករខ្មែរបានជ្រាបមុនពេលគេចុះបង្ក្រាប ក្នុងនោះបើតាមប្រភពថា គេហាម មិនត្រូវទិញ/លក់ ឬប្រើរបស់ក្លែងក្លាយទៀតផង ។
ជុំវិញករណីខាងលើ លោក អ៊ុំ រាត្រី អភិបាលរងខេត្តបន្ទាយមានជ័យ ដែលបានដឹកនាំមន្ត្រី/សមត្ថកិច្ចខេត្ត និងក្រុងប៉ោយប៉ែត ក៏ដូចជាមន្ត្រីសមត្ថកិច្ចមាត់ច្រកទ្វារអន្តរជាតិប៉ោយប៉ែត រួមជាមួយអាជីវករខ្មែរនៅផ្សាររុងក្លឿ១០៣នាក់ជួបប្រជុំថ្នាក់ខេត្តជាមួយភាគីថៃក្នុងបន្ទាយយោធាថៃ នៅស្រុកអារញ្ញ ខេត្តស្រះកែវ កាលពីថ្ងៃទី២៤ ខែកុម្ភៈ ឆ្នាំ២០១៧ បានប្រាប់«កោះសន្តិភាព»ថា ភាគីថៃគេចាប់ផ្តើមប្រើច្បាប់បង្ក្រាបរាល់ទំនិញរំលោភកម្មសិទ្ធិបញ្ញាលើទឹកដីរបស់គេ ដោយសំអាងថា ធ្វើតាមបទបញ្ជាប្រមុខដឹកនាំប្រទេសរបស់គេនាពេលខាងមុខ ។
លោកអភិបាលរងរូបនេះបន្តថា ក្នុងនាមអាជ្ញាធរភាគីកម្ពុជា បានទទូចសុំឲ្យភាគីថៃមានការយោគយល់ ជួយដល់អាជីវករក្នុងកម្រិតណាមួយផង ។ លោកបន្តថា ភាគីថៃមិនឯកភាពតាមសំណើអាជ្ញាធរឡើយ ដោយសុំឲ្យអាជីវករផ្អាកលក់ទំនិញពាក់ព័ន្ធមួយរយៈសិន ហើយក្រុមអាជីវករបានឯកភាពគ្នាផ្អាកតាមសំណើរបស់អាជ្ញាធរខេត្តបន្ទាយមានជ័យផងដែរ ។
លោក អ៊ុំ រាត្រី បន្តថា ក្រោយជំនួបរឿងទំនិញរំលោភកម្មសិទ្ធិបញ្ញា ភាគីកម្ពុជាក៏បានបន្តជួបជាមួយស្ថាប័យគយថៃនៅច្រកទ្វារអន្តរជាតិខ្លងលឹក ដើម្បីចរចាគ្នាសម្រួលរឿងការនាំចូលត្រីរបស់អាជីវករខ្មែរទៅដីថៃនោះផងដែរ ។ រឿងការនាំចូលត្រីទៅដីថៃ ភាគីទាំងពីរបានឯកភាពគ្នាលើការសម្របសម្រួលក្នុងកម្រិតណាមួយសមរម្យ ដែលអាចទទួលយកបានទាំអស់គ្នា ៕
ចែករំលែកព័តមាននេះ