មន្ត្រីបក្សប្រឆាំង3រូបប្រកាសលាលែងពីតួនាទីក្នុងគណបក្ស
រាជធានីភ្នំពេញ ៖ ប៉ុន្មានថ្ងៃបន្ទាប់ពីការចុះសួរសុខទុក្ខរបស់មន្ត្រីជាន់ខ្ពស់គណបក្សសង្គ្រោះជាតិ ដឹកនាំដោយលោកស្រី មូរ សុខហួរ មក សមាជិកគណបក្សសង្គ្រោះជាតិ
រាជធានីភ្នំពេញ ៖ ប៉ុន្មានថ្ងៃបន្ទាប់ពីការចុះសួរសុខទុក្ខរបស់មន្ត្រីជាន់ខ្ពស់គណបក្សសង្គ្រោះជាតិ ដឹកនាំដោយលោកស្រី មូរ សុខហួរ មក សមាជិកគណបក្សសង្គ្រោះជាតិ
រាជធានីភ្នំពេញ ៖ ប៉ុន្មានថ្ងៃបន្ទាប់ពីការចុះសួរសុខទុក្ខរបស់មន្ត្រីជាន់ខ្ពស់គណបក្សសង្គ្រោះជាតិ ដឹកនាំដោយលោកស្រី មូរ សុខហួរ មក សមាជិកគណបក្សសង្គ្រោះជាតិចំនួន២រូប និងគណបក្សសម រង្ស៊ី១រូប ដែលកំពុងជាប់ពន្ធនាគារ បានសុំលាលែងពីតំណែងជាសមាជិកគណៈកម្មាធិការនាយកគណបក្ស ។
យោងតាមលិខិតដាច់ដោយឡែកពីគ្នា របស់សមាជិកគណៈកម្មាធិការនាយកគណបក្សសង្គ្រោះជាតិ លោក អ៊ុំ សំអាន បានផ្តិតមេដៃចុះថ្ងៃទី២៣ ខែកុម្ភៈ ដាក់ជូនលោក ប៉ុល ហំម ប្រធានគណៈកម្មាធិការនាយកគណបក្សសង្គ្រោះជាតិ ស្នើសុំលាលែងពីតំណែងជាសមាជិកគណៈកម្មាធិការនាយកគណបក្សសង្គ្រោះជាតិដោយមូលហេតុផ្ទាល់ខ្លូន ។
លោកបញ្ជាក់ថា «អាស្រ័យដូចជម្រាបជូន សូមលោកប្រធានគណៈកម្មាធិការនាយកគណបក្សសង្គ្រោះជាតិមេត្តាជ្រាបជាព័ត៌មាន។ សេចក្តីសម្រេចចិត្តលាលែងចេញពីតំណែងជាសមាជិកគណៈកម្មាធិការនាយកគណបក្សរបស់ខ្ញុំ ចាត់ទុកថាសេចក្តីសម្រេចនេះចូលជាធរមានចាប់ពីថ្ងៃនេះតទៅ»។
ចំណែកលិខិតមួយច្បាប់របស់លោក មាជ សុវណ្ណារ៉ា ក៏បានលាលែងពីសមាជិកគណៈកម្មាធិការនាយកគណបក្សសង្គ្រោះជាតិដែរ ។ លោកបញ្ជាក់ថា ដោយសារមូលហេតុផ្ទាល់ខ្លួន»។
លោក មាជ សុវណ្ណារ៉ា បានលើកឡើងក្នុងលិខិតថា សូមលោកប្រធានគណៈកម្មាធិការនាយកគណបក្សសង្គ្រោះជាតិ មេត្តាជ្រាបជាព័ត៌មានអំពីសេចក្តីសម្រេចចិត្តលាលែងពីតំណែងជាសមាជិកគណៈកម្មាធិការនាយកគណបក្សសង្គ្រោះជាតិរបស់ខ្ញុំ ហើយចាត់ទុកថាសេចក្តីសម្រេចនេះចូលជាធរមានចាប់ពីថ្ងៃនេះតទៅ ។
ដោយឡែក លិខិតរបស់លោក ហុង សុខហូរ អគ្គលេខាធិការនិងជាសមាជិកគណៈកម្មាធិការនាយកគណបក្សសម រង្ស៊ី ក៏បានប្រកាសលាលែងពីតំណែងជាអគ្គលេខាធិការ និងសមាជិកគណៈកម្មាធិការនាយកគណបក្សសម រង្ស៊ី ដោយសារមូលហេតុផ្ទាល់ខ្លួនដែរ ។
ជាការកត់សម្គាល់ ការប្រកាសលាលែងពីសមាជិកគណៈកម្មាធិការនាយករបស់អស់លោកទាំង៣រូបខាងលើនេះ គឺបន្ទាប់ពីមន្ត្រីជាន់ខ្ពស់គណបក្សសង្គ្រោះជាតិ ដឹកនាំដោយលោកស្រី មូរ សុខហួរ លោក អ៊ូ ច័ន្ទឫទ្ធិ និងមន្ត្រីមួយចំនួនទៀត កាលពីថ្ងៃ២១ខែកុម្ភៈ បានទៅសួរសុខទុក្ខសកម្មជនរបស់ខ្លួននៅពន្ធនាគារព្រៃស ។ ការចុះសួរសុខទុកនេះ តាមគម្រោងគឺលោក កឹម សុខា ប្រធានស្តីទីគណបក្សសង្គ្រោះជាតិទេ ប៉ុន្តែលោកបែរជាអវត្តមានទៅវិញ ។
ក្រុមអ្នកវិភាគបានមើលឃើញថា ការសុំលាលែងពីតួនាទីនៅក្នុងគណបក្សរបស់អស់លោកទាំង៣រូបនេះ បានកើតឡើងមុនច្បាប់ស្តីពីគណបក្សនយោបាយថ្មីនឹងត្រូវចូលជាធរមានក្នុងពេលដ៏ខ្លីខាងមុខ ក្រោយពីច្បាប់ដ៏ចម្រូងចម្រាសមួយនេះត្រូវតំណាងរាស្ត្រខាងគណបក្សប្រជាជនកម្ពុជាសម្រេចអនុម័តធ្វើវិសោធនកម្មដោយគ្មានវត្តមានតំណាងរាស្ត្រខាងគណបក្សសង្គ្រោះជាតិ កាលពីថ្ងៃទី២០ ខែកុម្ភៈ កន្លងទៅ ។
ច្បាប់ថ្មីនេះ ត្រូវបានគណបក្សប្រឆាំង និងអ្នកវិភាគទាំងឡាយមើលឃើញថា នឹងក្លាយជាឧបករណ៍របស់រាជរដ្ឋាភិបាលក្នុងការគាបសង្កត់ទៅលើគណបក្សសង្គ្រោះជាតិ បើទោះបីគណបក្សប្រជាជនកម្ពុជាបញ្ជាក់ហើយថា វានឹងអនុវត្តលើគ្រប់គណបក្សទាំងអស់ រួមទាំងគណបក្សកាន់អំណាចផងដែរក្តី។
សូមបញ្ជាក់ថា លោក ហុង សុខហួរ ត្រូវបានសាលាដំបូងរាជធានីភ្នំពេញ ផ្តន្ទាទោសរយៈពេល៧ឆ្នាំនៅក្នុងពន្ធនាគារក្រោមបទចោទប្រកាន់ចំនួន៣ គឺបទក្លែងឯកសារសាធារណៈ ការប្រើប្រាស់ឯកសារសាធារណៈក្លែង និងញុះញង់បង្កឲ្យមានភាពវឹកវរធ្ងន់ធ្ងរដល់សន្តិសុខសង្គម ពាក់ព័ន្ធនឹងសន្ធិសញ្ញាព្រំដែនកម្ពុជា-វៀតណាម ។
ចំណែកលោក អ៊ុំ សំអាន ត្រូវតុលាការកាត់ទោស២ឆ្នាំកន្លះ និងពិន័យជាប្រាក់ចំនួន៤លានរៀលពីបទញុះញង់នាំឲ្យមានការរើសអើងនិងប្រព្រឹត្តបទឧក្រិដ្ឋជាអាទិ៍ ទាក់ទងនឹងការផ្សព្វផ្សាយឯកសារផែនទីព្រំដែនកម្ពុជា-វៀតណាម ។
រីឯលោក មាជ សុវណ្ណារ៉ា វិញ ត្រូវបានតុលាការផ្តន្ទាទោសចំនួន២០ឆ្នាំ ពីបទដឹកនាំកុបកម្ម និងចលនាចូលរួមកុបកម្មបង្កឲ្យមានអំពើហិង្សា នៅក្បែរទៅលានប្រជាធិបតេយ្យកាលពីខែកក្កដា ឆ្នាំ២០១៤ ៕
ចែករំលែកព័តមាននេះ