ភ្លៀងកក់ខែ ខ្យល់កន្ត្រាក់វាយប្រហារក្រុងសៀមរាប
ខេត្តសៀមរាប ៖ ភ្លៀងកក់ខែ១មេធំលាយឡំនឹងខ្យល់កន្ត្រាក់នារដូវប្រាំងផង បណ្តាលឱ្យដើមឈើតូចធំ និងលំនៅឋានពលរដ្ឋចំនួន៣សង្កាត់ក្នុងក្រុងសៀមរាប
ខេត្តសៀមរាប ៖ ភ្លៀងកក់ខែ១មេធំលាយឡំនឹងខ្យល់កន្ត្រាក់នារដូវប្រាំងផង បណ្តាលឱ្យដើមឈើតូចធំ និងលំនៅឋានពលរដ្ឋចំនួន៣សង្កាត់ក្នុងក្រុងសៀមរាប
ខេត្តសៀមរាប ៖ ភ្លៀងកក់ខែ១មេធំលាយឡំនឹងខ្យល់កន្ត្រាក់នារដូវប្រាំងផង បណ្តាលឱ្យដើមឈើតូចធំ និងលំនៅឋានពលរដ្ឋចំនួន៣សង្កាត់ក្នុងក្រុងសៀមរាប រងការខូចខាតចំនួន៣០ខ្នង បង្គោលភ្លើងបំភ្លឺផ្លូវ១ដើម សាលាបឋមសិក្សាវត្តពោធិលង្កាមួយខ្នង ព្រមទាំងដើមឈើដួលរលំសង្កត់លើបណ្តាលឱ្យរងការខូចខាតដំបូល ដួលស្លាកប៉ាណូចំនួន៤ និងរបើកធ្លាក់ ។
ជាមួយគ្នានេះ ស្ត្រីជាអ្នកដំណើរម្នាក់បានរងរបួស ម៉ូតូ១គ្រឿងខូចខាត ។ សរុបដើមឈើទាំងតូចទាំងធំបានបាក់ និងដួលរលំអស់ចំនួន១៥ដើម ។ មហន្តរាយបាក់ដើមឈើដោយសារភ្លៀងនិងខ្យល់កន្ត្រាក់នៅតាមដងផ្លូវមាត់ស្ទឹងសៀមរាបនេះ បានកើតឡើងកាលពីវេលាម៉ោងជាង១២ថ្ងៃត្រង់រហូតដល់ម៉ោងជិត៣រសៀលថ្ងៃទី២៣ កុម្ភៈ ទើបស្ងប់ស្ងាត់ ។
តាមប្រភពពីមន្ត្រីសាលាខេត្តដែលចុះដល់ទីតាំងខាងលើបានប្រាប់ថា មុនដំបូងមានភ្លៀងមួយមេធំព្រមទាំងមានខ្យល់បោកបក់ខ្លាំងថែមទៀតកាលពីរសៀលថ្ងៃទី២៣ កុម្ភៈ បណ្តាលឱ្យរលំផ្ទះប្រជាពលរដ្ឋអស់ជាច្រើនខ្នង និងដើមឈើមួយចំនួនក៏បានបាក់រលំ ។ បាតុភូតធម្មជាតិនេះបានបង្កឱ្យកកស្ទះចរាចរណ៍មួយសន្ទុះធំនៅតាមដងផ្លូវមាត់ស្ទឹងសៀមរាប ប៉ុន្តែត្រូវបានកម្លាំងសមត្ថកិច្ចនគរបាលចរាចរណ៍ដែលប្រចាំនៅគោលដៅមុខព្រះអង្គចេកព្រះអង្គចមជួយសម្រួលបានទាន់ពេលវេលា ។
ប្រភពបានបន្តថា ចំពោះដើមឈើដែលបានបាក់រលំមួយចំនួននោះត្រូវខាងមន្ត្រីជំនាញរបស់រដ្ឋបាលព្រៃឈើយករថយន្តស្ទួចមកដឹកយកទៅរក្សាទុកនៅផ្នែករដ្ឋបាលព្រៃឈើបន្ទាយស្រី ។
ចំណែកខ្សែភ្លើងដែលបានដាច់វិញត្រូវបានមន្ត្រីអគ្គិសនីមកតភ្ជាប់ឡើងវិញដើម្បីឱ្យបងប្អូនប្រជាពលរដ្ឋ និងម្ចាស់សណ្ឋាគារមួយចំនួនដែលដាច់ចរន្តភ្លើងបានប្រើប្រាស់ដូចដើមវិញ ។
ប្រភពពីមន្ត្រីអគ្គិសនីដែលកំពុងតចរន្តភ្លើងបានប្រាប់ថា ខ្សែភ្លើងដែលបានដាច់នៅតាមបង្គោលភ្លើងមាត់ស្ទឹងសៀមរាបដោយសារភ្លៀង និងខ្យល់កន្ត្រាក់បក់រំលំដើមឈើមកសង្កត់លើនោះត្រូវបានតភ្ជាប់ឡើងវិញអស់ហើយដើម្បីឱ្យបងប្អូនអាជីវករ និងម្ចាស់សណ្ឋាគារនៅតាមដងស្ទឹងសៀមរាបមានអគ្គិសនីប្រើប្រាស់ឡើងវិញ ។
សូមបញ្ជាក់ថា ដើមឈើធំៗចំនួន៣ដើមនៅកន្លែងផ្សេងគ្នាតាមដងស្ទឹងសៀមរាប បានបាក់សង្កត់មកលើផ្ទាំងលម្អភ្លើងកាត់ទទឹងដងផ្លូវដែលជារបស់សាលាខេត្តសៀមរាបនោះបានបង្កឱ្យមានការកកស្ទះចរាចរណ៍មួយសន្ទុះធំ ។
វាយប្រហារ៣ភូមិនៅក្រុងសំរោង ឧត្តរមានជ័យ
នៅខេត្តឧត្តរមានជ័យឯណោះវិញ លំនៅឋានប្រជាពលរដ្ឋចំនួន៣១ខ្នងផ្ទះក៏រងការខូចខាតដោយសារខ្យល់កន្ត្រាក់វាយប្រហារមកលើកាលពីវេលាម៉ោង៦និង១០នាទីល្ងាចថ្ងៃដដែលផងដែរ ។ ហេតុការណ៍នេះបានកើតឡើងលើភូមិចំនួន៣ គឺភូមិទំនប់ចាស់ ភូមិសំរោងតាហែ ភូមិគោកកំប៉ុល ស្ថិតនៅក្នុងក្រុងសំរោង និងបណ្តាលឱ្យរងរបួសស្រាលម្នាក់ផងដែរ ។
អ្នកភូមិបានឱ្យដឹងថា មុនពេលកើតហេតុគេឃើញមេឃពណ៌ខ្មៅលាយឡំដោយផ្លេកបន្ទោរ បន្តិចក្រោយមកស្រាប់តែមានខ្យល់កន្ត្រាក់បក់បោកយ៉ាងខ្លាំងមកលើលំនៅឋានពលរដ្ឋ បណ្ដាលឱ្យខ្លះប៉ើងដំបូល ជញ្ជាំង ខ្លះទៀតដួលរលំបាក់ដល់ដីខូចខាតទាំងស្រុង ។
មន្ត្រីអាជ្ញាធរ និងសមត្ថកិច្ចបានឱ្យដឹងថា ក្រោយកើតមានគ្រោះធម្មជាតិបំផ្លិចបំផ្លាញលំនៅឋានពលរដ្ឋនោះ ក្រុមការងារមូលដ្ឋានរួមទាំងសមត្ថកិច្ចបានចុះទៅដល់កន្លែងកើតហេតុដើម្បីជួយសង្គ្រោះ និងបូកសរុបលំនៅឋានពលរដ្ឋដែលរងការខូចខាតឃើញមានចំនួន៣១ខ្នងក្នុងនោះស្រាល២០ខ្នង និងបាក់ដល់ដី១ខ្នង ។
ទាក់ទិននឹងគ្រោះធម្មជាតិនេះ ក្រុមអាជ្ញាធរមូលដ្ឋានបានរៀបចំឯកសាររបាយការណ៍ជូនទៅថ្នាក់ដឹកនាំខេត្ត ដើម្បីនាំយកជំនួយសង្គ្រោះបឋមដល់ពលរដ្ឋសម្រាប់ដោះស្រាយជីវភាពបានមួយរយៈពេល ៕
ចែករំលែកព័តមាននេះ