កាស៊ីណូនៅច្រកព្រំដែនឡាប៉ាខេ គេបើកដៃឱ្យជនជាតិខ្មែរចូលលេងពពាក់ពពូន
ខេត្តមណ្ឌលគិរី ៖ ល្បែងបញ្ជល់មាន់ឬគេហៅថាបក្សីកីឡា និងល្បែងអាប៉ោង ត្រូវបានមហាជនរាយការណ៍ថា
ខេត្តមណ្ឌលគិរី ៖ ល្បែងបញ្ជល់មាន់ឬគេហៅថាបក្សីកីឡា និងល្បែងអាប៉ោង ត្រូវបានមហាជនរាយការណ៍ថា កំពុងបើកឲ្យជនជាតិខ្មែរចូលលេងយ៉ាងអនាធិបតេយ្យជ្រកក្រោមស្លាកកាស៊ីណូ HOANG DIEU ដោយគ្មានការរំខានពីអាជ្ញាធរឡើយ ។ សង្វៀនបញ្ជល់មាន់នេះត្រូវគេដឹងថា លោក ប៊ូ សំអុល នាយប៉ុស្តិ៍ការពារព្រំដែនគោកឡាប៉ាខេ ចំណុះឲ្យវរសេនាតូចនគរបាលការពារព្រំដែនគោកលេខ៦២១ ជាអ្នកប៉ាវផ្តាច់ពីម្ចាស់កាស៊ីណូ ដើម្បីឲ្យជនជាតិខ្មែរចូលលេងដោយសេរី ។
កាស៊ីណូដែលទើបចាប់ផ្តើមដំណើរការនេះឈ្មោះ HOANG DIEU មានទីតាំងក្បែរមាត់ច្រកទ្វារអន្តរជាតិឡាប៉ាខេ ស្ថិតក្នុងភូមិអូរអាម ឃុំស្រែខ្ទុម ស្រុកកែវសីមា បានបើកដំណើរការតាំងពីដើមឆ្នាំ២០១២ ។ ប្រភពបានឲ្យដឹងថា ក្នុង១អាទិត្យសង្វៀនបញ្ជល់មាន់ខាងលើបើកលេង៣ថ្ងៃគឺថ្ងៃអង្គារ ថ្ងៃព្រហស្បតិ៍ និងថ្ងៃសៅរ៍ ។
ប្រភពព័ត៌មានបន្តថា នៅរាល់ថ្ងៃដែលគេបើកលេងគឺមានជនជាតិខ្មែរមិនតិចជាង១០០នាក់ទេ ដែលបានយកមាន់ទៅបញ្ជល់ជាមួយជនជាតិវៀតណាម ឬបញ្ជល់ជាមួយជនជាតិខ្មែរគ្នាឯង ដោយមានភ្នាល់ដាក់លុយក្នុងមួយគូៗចាប់ពី៥០០ដុល្លារ ទៅ៥.០០០ដុល្លារ ។ មិនត្រឹមតែល្បែងបញ្ជល់មាន់ទេដែលបានបូមលុយពីហោប៉ាវជនជាតិខ្មែរ នៅមានល្បែងអាប៉ោងមួយមុខទៀត ដែលបានធ្វើឲ្យអ្នករស់នៅខេត្តមណ្ឌលគិរីខ្លះចាញ់អស់រលីងពីខ្លួន ។
ការបើកឲ្យមានជនជាតិខ្មែរចូលលេងល្បែងក្នុងកាស៊ីណូបែបនេះ គឺផ្ទុយទៅនឹងច្បាប់ដែលរាជរដ្ឋាភិបាលសម្រេចអនុញ្ញាតឲ្យមានតែជនបរទេសប៉ុណ្ណោះមានសិទ្ធិចូលលេងល្បែងក្នុងកាស៊ីណូនៅតាមព្រំដែន ។ ប៉ុន្តែជាការកត់សម្គាល់ សូម្បីអ្នកប៉ាវផ្តាច់សង្វៀនបញ្ជល់មាន់ និងល្បែងអាប៉ោងនៅស្រុកកែវសីមា បែរជាមន្ត្រីអ្នកអនុវត្តច្បាប់ទៅវិញ គឺមន្ត្រីនគរបាលឋានៈជានាយប៉ុស្តិ៍ ។ នេះគឺជាការប្រឆាំងទៅនឹងគោលនយោបាយភូមិឃុំមានសុវត្ថិភាព ដែលរាជរដ្ឋាភិបាលបានដាក់ចេញ សម្រាប់ឲ្យអាជ្ញាធរថ្នាក់ក្រោមជាតិចុះបង្ក្រាប និងបង្ការ មិនឲ្យមានល្បែងស៊ីសងក្នុងភូមិឃុំដែលខ្លួនគ្រប់គ្រង ។
សូមបញ្ជាក់ថា កាលពីថ្ងៃទី៣១ ខែមីនា ឆ្នាំ២០១៦កន្លងមក កាស៊ីណូ HOANG DIEU ត្រូវបានលោកព្រះរាជអាជ្ញារង អមសាលាដំបូងខេត្ត ដឹកនាំកម្លាំងកងរាជ អាវុធហត្ថខេត្ត អាវុធហត្ថស្រុក និងអាវុធហត្ថស្នាក់ការសន្តិសុខ ចុះទៅត្រួតពិនិត្យនិងផ្អាកដំណើរការជាបណ្តោះអាសន្ន ។ នាពេលនោះ លោក ចេង សូរិយា មេបញ្ជាការរងកងរាជអាវុធហត្ថខេត្ត បានឲ្យដឹងថា កាស៊ីណូនេះបានហួសច្បាប់អនុញ្ញាតតាំងពីខែធ្នូ ឆ្នាំ២០១៥ មកម្ល៉េះ ប៉ុន្តែថៅកែកាស៊ីណូនៅតែបន្តអនុញ្ញាតឲ្យភ្ញៀវចូលលេង ។
លោកបានបន្តថា នៅពេលសមត្ថកិច្ចសុំត្រួតពិនិត្យច្បាប់អនុញ្ញាត តំណាងរបស់កាស៊ីណូបានយកច្បាប់ដែលហួសសុពលភាពមកបង្ហាញ រួមជាមួយនឹងលិខិតស្នើសុំច្បាប់ថ្មី ដែលចុះថ្ងៃខែកាលពីខែមករា ២០១៦ មកឲ្យសមត្ថកិច្ចមើល ខណៈច្បាប់អនុញ្ញាតថ្មីមិនទាន់ធ្លាក់ ។ កាស៊ីណូនេះមិនខុសពីកាស៊ីណូខុសច្បាប់ឡើយ ព្រោះមិនទាន់មានច្បាប់អនុញ្ញាតថ្មីធ្លាក់មកផង តែម្ចាស់កាស៊ីណូនោះហ៊ានឲ្យភ្ញៀវចូលលេងពេញៗ ។
លោក សាន សុភៈ ព្រះរាជអាជ្ញារងអមសាលាដំបូងខេត្ត បានឲ្យដឹងថា នៅពេលនេះយើងគ្រាន់តែចុះមកពិនិត្យនិងធ្វើស្ថិតិចំពោះជនបរទេសដែលចូលមកលេងក្នុងកាស៊ីណូខាងលើថា តើមានច្បាប់ត្រឹមត្រូវដែរឬអត់ ? ចំពោះចំណាត់ការយ៉ាងណានោះ មិនត្រូវបានលោក សាន សុភៈ បញ្ជាក់ឲ្យដឹងនោះទេ ព្រោះសមត្ថកិច្ចកំពុងធ្វើការតាមនីតិវិធី ។
ក្នុងពេលចុះត្រួតពិនិត្យច្បាប់របស់កាស៊ីណូ HOANG DIEU នេះ គេសង្កេតឃើញមានជនជាតិវៀតណាមស្រីប្រុសក្មេងចាស់ប្រមាណជិត៣០០នាក់ កំពុងសម្ងំលេងល្បែងរាប់សិបមុខក្នុងកាស៊ីណូ ។ មិនត្រឹមតែប៉ុណ្ណោះ គេក៏ឃើញមានវត្តមានជនជាតិខ្មែរចូលទៅលេងល្បែងក្នុងកាស៊ីណូខាងលើដែរ តែមួយចំនួនធំខ្លះរត់ចេញក្រៅអស់ពេលដឹងថាសមត្ថកិច្ចទៅត្រួតពិនិត្យ ។
ប្រភពដែលកោះសន្តិភាពទទួលបាននិងទុកចិត្តបំផុតបានឲ្យដឹងថា ក្នុងចំណោមជនជាតិវៀតណាមប្រមាណ៣០០នាក់នោះ ភាគច្រើនពួកគេចូលមកលេងល្បែងដោយខុសច្បាប់ គឺមានចំនួនតិចតួចណាស់ដែលចូលមកលេងស្របច្បាប់ ព្រោះជនជាតិវៀតណាមទាំងនោះមិនមានលិខិតឆ្លងដែន ។
ប្រជាពលរដ្ឋដែលរស់នៅជិតកាស៊ីណូនិងច្រកព្រំដែនខាងលើនិយាយថា ជារៀងរាល់ថ្ងៃគេតែងឃើញមានរថយន្តកូរ៉េ២គ្រឿងដឹកជនជាតិវៀតណាមតាមច្រកទ្វេភាគីឡាប៉ាខេ ទៅកាស៊ីណូ HOANG DIEU ដែលមានចម្ងាយប្រមាណតែ២០០ម៉ែត្រពីចំណុចប៉ារាស់ព្រំដែន ។ មិនមែនមានតែជនជាតិវៀតណាមទេដែលចូលមកលេងល្បែងនៅក្នុងកាស៊ីណូនេះសូម្បីជនជាតិខ្មែរទាំងប្រុសទាំងស្រីក៏និយមចូលទៅលេងល្បែងនៅកាស៊ីណូហ្នឹងដែរ ហើយភាគច្រើនជនជាតិខ្មែរប្រុសៗចូលទៅលេងល្បែងបញ្ជល់មាន់ស្ទើររាល់ថ្ងៃ ៕
ចែករំលែកព័តមាននេះ