បឹងកង្កែបកាន់តែរួញតូច អ្នកស្រុកទាមទារឱ្យដកបង្គោលចេញ
ខេត្តព្រះសីហនុ ៖ អ្នកស្រុករស់នៅជុំវិញបឹងកង្កែប ដែលមានទីតាំងស្ថិតក្នុងភូមិបត់គគីរ ឃុំបិតត្រាំង ស្រុកព្រៃនប់ កំពុងមានប្រតិកម្មយ៉ាងខ្លាំង
ខេត្តព្រះសីហនុ ៖ អ្នកស្រុករស់នៅជុំវិញបឹងកង្កែប ដែលមានទីតាំងស្ថិតក្នុងភូមិបត់គគីរ ឃុំបិតត្រាំង ស្រុកព្រៃនប់ កំពុងមានប្រតិកម្មយ៉ាងខ្លាំង ជុំវិញការបោះបង្គោលវាតទីយកដីនៅក្នុងតំបន់បឹងកង្កែប ជាបឹងធម្មជាតិ ដែលបច្ចុប្បន្ននៅរួមតូច ក្រោយពីមានការរំលោភឈ្លានពានកាន់កាប់ ពីសំណាក់អ្នកមានអំណាចខ្លះកន្លងមក ។
ប្រជានេសាទឈ្មោះ អិុង ឌុក បានបង្ហាញក្តីបារម្ភថា អ្វីដែលរូបគាត់ និងប្រជាពលរដ្ឋធ្វើការតវ៉ា ស្នើឱ្យមន្ត្រីជំនាញចុះធ្វើការទប់ស្កាត់នា ពេលនេះ គឺដោយសារតែខ្លាចការបោះបង្គោលនេះយកធ្វើជាកម្មសិទ្ធិ ព្រោះធ្លាប់មានមកហើយដូចជាការបោះបង្គោលមុនៗដែលការបោះបង្គោលហ៊ុមព័ទ្ធនេះ វាអាចធ្វើឱ្យប៉ះពាល់យ៉ាងធ្ងន់ធ្ងរដល់ការនេសាទលក្ខណៈគ្រួសារ និងជីវៈចម្រុះនៅក្នុងបឹងធម្មជាតិមួយនេះ ។
ប្រភពដដែលបានបន្តថា បើពួកគាត់ពុំធ្វើការតវ៉ាទេនោះ វាខ្លាចតែទីតាំងនេះក្លាយជាទីតាំងកម្មសិទ្ធិ ដូចការបោះបង្គោល ចាក់ដីលុបបឹងកាលពីពេលកន្លងមក អ្នកស្រុកនិយាយថា ផ្ទៃបឹងនេះកាលពីដើម មានវិសាលភាពធំធេងណាស់ ដោយផ្ទៃបឹងមានរហូតដល់រាប់រយហិកតា ប៉ុន្តែពេលនេះ នៅមិនដល់៥០ហិកតាទេ ។
ឆ្លើយតបទៅនឹងបញ្ហានេះ លោក ឯម ភា នាយសង្កាត់រដ្ឋបាលជលផលព្រៃនប់ បានឱ្យដឹងថា នៅថ្ងៃទី២៣ កុម្ភៈនេះ លោកបាននាំកំលាំងចុះធ្វើការទប់ស្កាត់ ការបោះបង្គោលហ៊ុមព័ទ្ធនៅចំណុចក្នុងបឹងកង្កែប ក្រោយពីមានបណ្តឹងពីប្រជានេសាទជាច្រើនគ្រួសារ ។
លោកបន្តថា ការបោះបង្គោលនេះ គឺពុំមានច្បាប់ទម្លាប់អ្វីនោះទេ វាពិតជាខុសច្បាប់ ហើយអ្វីដែលសំខាន់ជាងនោះ គឺវាធ្វើឱ្យមានការប៉ះពាល់ដល់ការប្រកបរបរនេសាទប្រចាំថ្ងៃ របស់ប្រជានេសាទជាលក្ខណៈគ្រួសារ និងជីវចម្រុះទៅថ្ងៃខាងមុខ ។ ដូចនេះបញ្ហាចំពោះមុខ ក្នុងនាមលោកជាមន្ត្រីជំនាញ មិនអនុញ្ញាតជាដាច់ខាតនូវការបោះបង្គោលនេះ ។
អ្នកទទួលម៉ៅការបោះបង្គោលចូលទៅក្នុងទឹកបឹងកង្កែប លោក ជា ឡុង បានឲ្យដឹងថា ការបោះបង្គោលនេះ គឺដើម្បីធ្វើរនាំងបាំងស្បៃ សម្រាប់របរចិញ្ចឹមគ្រែងឈាម និងបង្គា តាមបែបធម្មជាតិ ហើយមិនប៉ះពាល់ដល់ព្រៃកោងកាងទេ ។ ផ្ទុយទៅវិញលោកថា ថៅកែរបស់ខ្លួន ក៏មានផែនការដាំដើមកោងកាង នៅជុំវិញបរិវេណបឹងកង្កែបជាប់ទីតាំងត្រៀមចិញ្ចឹមកូនគ្រែង និងបង្គាធម្មជាតិនេះ ដើម្បីធ្វើជាជម្រកឲ្យត្រីសមុទ្របន្តពូជឲ្យបានច្រើនឡើង វិញ ។ លោកមិនទំទាស់ចំពោះការចុះផ្អាករបស់អាជ្ញាធរសង្កាត់រដ្ឋបាលជលផលស្រុកព្រៃនប់នោះទេ ។ ចាំមើលទៀត តើរដ្ឋបាលជលផលធ្វើការមានប្រសិទ្ធភាពដែរឬអត់ ?
សូមបញ្ជាក់ផងដែរថា បឹងកង្កែប គឺជាបឹងធម្មជាតិទឹកប្រៃ មានដុះដើមកោងកាងនៅជុំវិញផ្ទៃបឹងរាប់រយហិកតា មានទីតាំងនៅភូមិអុង ឃុំរាម និងឃុំបិតត្រាំង ស្រុកព្រៃនប់ ខេត្តព្រះសីហនុ ។ បឹងនេះបច្ចប្បន្នមានផ្ទៃរួមតូចព្រោះតែត្រូវឈ្មួញ និងមន្ត្រីមានអំណាចខ្លះនោះបានឃុបឃិតជាមួយស្ថាប័នជំនាញ បានចាក់ដីទន្ទ្រានកាន់កាប់ធ្វើកម្មសិទ្ធិឯកជនអនាធិបតេយ្យ ចង់អស់៥០ភាគរយទៅហើយ ។ ជាមួយនឹងបញ្ហានេះលោក យន្ត មីន អភិបាលខេត្តព្រះសីហនុ បានណែនាំដល់មន្ត្រីស្ថាប័នពាក់ព័ន្ធមានរដ្ឋបាលជលផល និងមន្ទីររៀបចំដែនដីនគរូបណីយកម្ម សំណង់ និងសុរិយោដីជាដើម ឲ្យពិនិត្យសើរើការកាន់កាប់ដី នៅជុំវិញបរិវេណបឹងកង្កែបជាថ្មីឡើងវិញ ដើម្បីឈានដល់ថែរក្សា និងចុះបញ្ជីជាទ្រព្យសម្បត្តិរដ្ឋឲ្យបានត្រឹមត្រូវ ៕
ចែករំលែកព័តមាននេះ